ডিব্ৰুগড়, 14 আগষ্ট : উজনি অসমৰ অন্যতম সাংবাদিক সংগঠন বৃহত্তৰ ডিব্ৰুগড় প্ৰেছ ক্লাবৰ বিংশতিতম প্ৰতিষ্ঠা দিৱস বুধবাৰে দিনজোৰা কাৰ্যসূচীৰে অনুষ্ঠিত হয় ৷ জিলাখনৰ ডিকমৰ পৰা খোৱাঙলৈকে কৰ্মৰত সাংবাদিকসকলক লৈ গঠিত বৃহত্তৰ ডিব্ৰুগড় প্ৰেছ ক্লাবৰ প্ৰতিষ্ঠা দিৱস ডিব্ৰুগড় সাহিত্য সভাৰ লক্ষ্মীনাথ বেজবৰুৱা ভৱনত আজি অনুষ্ঠিত হয় ৷
প্ৰতিষ্ঠা দিৱসৰ লগত সংগতি ৰাখি পুৱাৰ ভাগত পতাকা উত্তোলন আৰু শ্বহীদ তৰ্পন কাৰ্যসূচী সম্পন্ন হোৱাৰ পিছতেই দিনৰ ভাগত নতুন ভাৰতীয় ফৌজদাৰী আইনৰ ওপৰত এক বিশেষ কৰ্মশালা অনুষ্ঠিত কৰা হয় ৷ কৰ্মশালাত সমল ব্যক্তি হিচাপে উপস্থিত থাকে ডিব্ৰুগড়ৰ ন্যায়িক আদালতৰ প্ৰথম শ্ৰেণীৰ ন্যায়িক দণ্ডাধীশ চন্দন শইকীয়া ৷ কৰ্মশালা সমাপ্ত হোৱাৰ পিছতেই সাহিত্য সভা ভৱনত গুৰুত্বপূৰ্ণ মুকলি সভা অনুষ্ঠিত হয় ৷
বৃহত্তৰ ডিব্ৰুগড় প্ৰেছ ক্লাৱৰ সভাপতি মনজিৎ বৰাৰ সভাপতিত্বত অনুষ্ঠিত হোৱা মুকলি সভাত ডিব্ৰুগড়ৰ সাহিত্য, সাংস্কৃতি জগতৰ লগত জড়িত থকা কেইবাগৰাকীও ব্যক্তিয়ে অংশগ্ৰহণ কৰে ৷ এই অনুষ্ঠানতে অশোক কুমাৰ বৰগোহাঞি বঁটা প্ৰদান কৰা হয় খোৱাং অঞ্চলৰ জ্যেষ্ঠ সাংবাদিক বাবুল সোণোৱালক ৷ লগতে এইবাৰ বৃহত্তৰ ডিব্ৰুগড় প্ৰেছ ক্লাবে প্ৰতিষ্ঠা দিৱসৰ লগত সংগতি ৰাখি প্ৰথিতযশা সাহিত্যিক,অসম সাহিত্য সভাৰ প্ৰাক্তন সভাপতি, মিতভাষৰ স্ৰষ্টা ড৹ নগেন শইকীয়ালৈ জীৱন জোৰা সাধনা বঁটা প্ৰদান কৰে ৷
লগতে পঢ়ক : স্বাধীনতা দিৱস উপলক্ষে ভাৰত চৰকাৰৰ সেৱা পদক ঘোষণা : অসম আৰক্ষীৰ ২২ গৰাকীলৈ পদক - INDEPENDENCE DAY 2024
বিশিষ্ট সাহিত্যিকগৰাকীৰ অসুস্থতাৰ বাবে অনুষ্ঠানত উপস্থিত থাকিব নোৱৰাত প্ৰেছ ক্লাবৰ বিষয়ববীয়াসকলে তেখেতৰ বাসগৃহতে বঁটা প্ৰদান কৰে ৷ বৃহত্তৰ ডিব্ৰুগড় প্ৰেছ ক্লাবৰ সম্পাদক ৰাতুল বুঢ়াগোহাঁয়ে আঁত ধৰা অনুষ্ঠানটোত ডিব্ৰুগড় জিলাৰ বিভিন্ন প্ৰান্তৰৰ পৰা অহা সংবাদকৰ্মীসকলে অংশগ্ৰহণ কৰে ৷
লগতে পঢ়ক : খানাপাৰাত স্বাধীনতা দিৱসৰ প্ৰস্তুতি : পেৰেডৰ অন্তিম আখৰা পৰিদৰ্শন আৰক্ষী সঞ্চালক প্ৰধানৰ - Independence Day 2024
