ধেমাজি, 23 ফেব্ৰুৱাৰী : বজাৰত মহঙা হৈ পৰিল সকলোৰে পাকঘৰত ব্যৱহৃত এবিধ প্ৰয়োজনীয় সামগ্ৰী নহৰু ৷ যাৰ মূল্য এতিয়া সোণতকৈ চৰা হ’ল ৷ সংগোপনে নহৰুৰ দাম বৃদ্ধি হৈ বজাৰত এতিয়া প্ৰতি কিলোত তিনিশৰো অধিক হ’ল ৷ ফলত আচম্বিতে দোকানৰ পৰা অন্তৰ্ধান হ’ল নহৰু ৷ সাধাৰণ লোকৰ বাবে এতিয়া একপ্ৰকাৰ বিলাসী সামগ্ৰীত পৰিণত হ’ল নহৰু ৷ গ্ৰামাঞ্চলৰ সাধাৰণ বিক্ৰেতাইয়ো বিক্ৰী কৰিবলৈ বলে নোৱৰা হ’ল নহৰু ৷
পিছে ধেমাজিৰ আওঁহতীয়া তথা ভিতৰুৱা অঞ্চলত নহৰুৰ খেতিয়কে ভূকে নাপায় ইয়াৰ বৰ্ধিত মূল্যৰ বিষয়ে ৷ কিয়নো তেওঁলোকে উৎপাদন কৰা নহৰু নিজে বছৰটো খোৱাৰ লগতে প্ৰতি কেজিত কেঁচা নহৰু বিভিন্ন ব্যৱসায়ীক 70/80 টকা দৰত বিক্ৰী কৰি আহিছে ৷ বহিৰাগত বণিয়াই নিৰ্ধাৰণ কৰা উচ্চ মূল্যৰ নহৰুৰ দৰে এতিয়াও স্পৰ্শ কৰিব পৰা নাই এই সকল খেতিয়কক ৷ ফলত নিজৰ উৎপাদিত সামগ্ৰীৰ উচিত মূল্য লাভৰ পৰা বঞ্চিত হৈ আহিছে কৃষক সকল ৷
এইবেলিও ধেমাজি জিলাৰ বৃহত্তৰ মাচখোৱা চিচিমুখত বহ্মপুত্ৰৰ ৰাংকুপ চাপৰিত স্থানীয় লোকে বিঘাই বিঘাই কৰিছে নহৰুৰ খেতি ৷ নহৰুৰ গছবোৰ ঠন ধৰি সেউজীয়াময় হৈ পৰিছে চাপৰি ৷ শংকাৰ মাজতে এতিয়া বজাৰত নহৰুৰ দাম বৃদ্ধিৰ খবৰে অঞ্চলটোৰ কৃষক সকলৰ মুখলৈ কঢ়িয়াইছে আশাৰ হাঁহি ৷ ইফালে চৰকাৰে খেতিয়ক সকলক গুৰুত্ব দিলে অঞ্চলটোত বৃহৎ পৰিমাণৰ নহৰু উৎপাদনৰ সম্ভৱনা আছে বুলি প্ৰতিক্ৰিয়া প্ৰকাশ কৰিছে কৃষক সকলে ৷ লক্ষণীয়ভাৱে বজাৰত নহৰুৰ মূল্যই আকাশ স্পৰ্শ কৰিলেও নিৰুদ্বিগ্ন হৈ আছে চৰকাৰৰ লগতে বিভিন্ন দল-সংগঠন ৷
লগতে পঢ়ক : পদিনা খেতিৰেই মাহিলী লাখ টকা উপাৰ্জন মৰ্মে কলিতাৰ
