ডিব্ৰুগড়,১১ মে': ৰাজ্যৰ আৰক্ষী অপৰাধ নিৰ্মূলৰ বাবে কঠোৰ হৈছে যদিও একাংশই সহজতে ধন ঘটাৰ বাবে লৈছে ন ন কৌশল । প্ৰৱঞ্চকৰে ভৰি পৰিছে সমগ্ৰ ৰাজ্য । সোণৰ গহণা, কাঁহ-পিতলৰ সামগ্ৰী চাফা কৰাৰ নামত চলিছে প্ৰৱঞ্চনা । ৰাজ্যৰ বিভিন্ন প্ৰান্তত এতিয়া ঘৰে ঘৰে গৈ সোণৰ গহনা চাফা কৰাৰ নামত প্ৰৱঞ্চনা কৰি অহা ঘটনা সংঘটিত হৈ অহা সময়ত ডিব্ৰুগড়তো অনুৰূপ ঘটনা সংঘটিত হ'ল আজি ।
ডিব্ৰুগড়ত এজন ব্যক্তিৰ ঘৰত সোণৰ গহণা চাফা কৰিবলৈ আহি ডেৰ লাখ টকীয়া সোণৰ চেইন লৈ উধাও হ'ল দুটা প্ৰৱঞ্চক । ডিব্ৰুগড়ৰ আমোলাপট্টীত তনুজ বৰুৱা আৰু বৰ্ণালী বৰুৱা নামৰ দম্পতীৰ বাসগৃহত দুজন অচিনাক্ত ব্যক্তিয়ে আহি সোণৰ গহনা চাফা কৰা ব্যক্তি বুলি নিজকে পৰিচয় দিয়ে । ব্যক্তি কেইজনৰ কথাত ভোল গৈ দম্পতীয়ে নিজৰ সোণৰ গহনা চাফা কৰিবলৈ উলিয়াই দিয়ে ।
লগতে গহনা লৈ চাফা কৰাৰ সময়ৰ দৃশ্য মোবাইলত আবদ্ধ কৰি থয় । গহনা চাফা কৰি অচিনাক্ত ব্যক্তি কেইজন ওলাই যোৱাৰ পাছতে সোণৰ চেইন নোহোৱা হোৱাত হাহাকাৰ লাগে । ঘটনা সন্দৰ্ভত স্থানীয় আৰক্ষীক এজাহাৰ দাখিল কৰা পাছতেই আৰক্ষীয়ে তদন্ত আৰম্ভ কৰিছে যদিও বৰ্তমানলৈকে প্ৰৱঞ্চককেইটাৰ কোনো সন্ধান লাভ কৰা নাই আৰক্ষীয়ে ।
ইফালে, মৰাণত সংঘটিত হয় আন এক ভয়ংকৰ প্ৰৱঞ্চনাৰ ঘটনা । মৰাণৰ জ্যোতিপুৰ গদাধৰ সিংহ পথত শুকুৰবাৰে বিয়লি কাঁহ-পিতলৰ সামগ্ৰী চাফা কৰিবলৈ আহি বহু লাখ টকাৰ মূল্যৰ সোণৰ অলংকাৰ লৈ উধাও হ'ল প্ৰৱঞ্চক । জানিব পৰা অনুসৰি মৰাণৰ জ্যোতিপুৰ গদাধৰ সিংহ পথৰ বিনীতা আগৰৱালা নাম মহিলাগৰাকীৰ গৃহলৈ কাঁহ-পিতলৰ সামগ্ৰী চাফা কৰা ব্যক্তি বুলি এজন ব্যক্তি আহে ।
প্ৰৱঞ্চকৰ চলাহী কথাত ভোল গৈ কাঁহৰ বাচন চাফা কৰা পাছতে সোণৰ অলংকাৰ চাফা কৰিবলৈ দিয়ে । ইয়াৰ পাছতে চক্ৰান্ত কৰি পৰিয়ালটোৰ পৰা সোণৰ চেইন, হাতৰ খাৰু আৰু এটা আঙুঠি লৈ উধাও হয় প্ৰৱঞ্চক । চুৰি হোৱা সামগ্ৰীৰ মূল্য ২ লাখ ৫০ হাজাৰ হ'ব বুলি জানিব পৰা গৈছে । ইফালে এজন ব্যক্তিয়ে এই ঘটনা সংঘটিত কৰাৰ সময়ত আন এজন ঘৰৰ বাহিৰত ৰৈ থাকে । সমগ্ৰ দৃশ্য বন্দী হৈ ৰয় চি চি টিভি কেমেৰাত । ইতিমধ্যে ঘটনা সন্দৰ্ভত ভুক্তভোগীয়ে আৰক্ষীৰ ওচৰত দাখিল কৰে এজাহাৰ । এই ঘটনাই মৰাণত চাঞ্চল্য সৃষ্টি কৰিছে ।
