নিউজ ডেস্ক, 1 জুলাই : জটিল ৰূপ ধাৰণ কৰিছে ৰাজ্যৰ বান পৰিস্থিতিয়ে ৷ পূৰ্বতকৈ ৰাজ্যৰ কিছু কিছু প্ৰান্তত পৰিস্থিতি কিছু উন্নত হৈছে যদিও বহু স্থানত বৰ্তমানেও বানে নৈপৰীয়া ৰাইজৰ জীৱন-জীৱিকাৰ প্ৰতি তীব্ৰ ভাবুকিৰ সৃষ্টি কৰি অহা পৰিলক্ষিত হৈছে ৷
ধেমাজি জিলা
নেৰানেপেৰা বৰষুণৰ ফলত ধেমাজিৰো বিভিন্ন ঠাই প্লাৱিত হৈছে ৷ বিশেষকৈ বিগত বছৰৰ দৰে এইবাৰো ধেমাজি জীয়াঢল নদীৰ কাংকু সুঁতিটোক নিয়ন্ত্ৰণ কৰিব নোৱাৰা বাবে এইবেলিও তিনিদিন ধৰি ধেমাজিৰ জীয়াঢল চাৰিআলিৰ পৰা ভজু গাঁওলৈকে 15 নং ৰাষ্ট্ৰীয় ঘাইপথত 1 কিঃমিঃ পৰ্যন্ত পানী বাগৰি আছে ৷
দেওবাৰে সন্ধিয়া ৰাজ্য চৰকাৰৰ মন্ত্ৰী সঞ্জয় কিষানে জিলাখনৰ বান পৰিস্থিতিৰ বুজ ল’বলৈ আহি পানীয়ে জলমগ্ন কৰা ভজু গাঁৱৰ 15 নং ৰাষ্ট্ৰীয় ঘাইপথটো পৰিদৰ্শন কৰে ৷
বঙাইগাঁও জিলা
বঙাইগাঁও জিলাৰ মাণিকপুৰ ৰাজহ চক্ৰৰ অন্তৰ্গত 2 নং বাশবাৰি আই নৈয়ে সংহাৰী ৰূপ ধাৰণ কৰাত আতংকিত হৈ পৰিছে নৈপৰীয়া ৰাইজ । হঠাৎ পানী বৃদ্ধি পোৱাত জলমগ্ন হৈ পৰিছে কুৰিখনৰো অধিক গাঁও । 4, 5 আৰু 6 নং ভাণ্ডাৰা, বালাৰপেট, টেন্টনপুৰ, বাশবাৰী, তিলপুখুৰীকে আদি কৰি কুৰিখনৰো অধিক ৰাজহ গাঁও বৰ্তমান প্লাবিত হৈ পৰিছে ।
বৃহত্তৰ অঞ্চলটোৰ যাতায়তৰ একমাত্ৰ পকী পথ ডাঙাইগাঁও-কীৰ্ত্তনপাৰা পথটো ডুব যোৱাত যাতায়ত ব্যৱস্থা ব্যাহত হৈ পৰিছে । হাহাকাৰ লাগিছে বানাক্ৰান্ত ৰাইজৰ মাজত । আক্ষেপজনিত বিষয় যে এতিয়ালৈকে জিলা প্ৰশাসনে এইক্ষেত্ৰত কোনো ব্যৱস্থা গ্ৰহণ কৰা নাই ।
নলবাৰী জিলা
নলবাৰী জিলাৰ নৱগঠিত টিহু বিধানসভা সমষ্টিৰ কৈঠালকুছিৰৰ গড়বেৰত মৰা পাগলদিয়াৰ সুঁতিয়ে তীব্ৰ ভাবুকিৰ সৃষ্টি কৰিছে । এই ক্ষেত্ৰত কাণষাৰ নাই স্থানীয় বিধায়ক তথা কেবিনেট মন্ত্ৰী চন্দ্ৰ মোহন পাটোৱাৰীৰ । প্ৰাণৰ মমতাত এতিয়া নিজ ঘৰ এৰি নিৰাপদ স্থানলৈ যাবলৈ বাধ্য হৈছে নৈপৰীয়া ৰাইজ ।
স্থানীয় বিধায়কৰ লগতে চৰকাৰলৈ আহ্বান ৰাইজৰ যাতে অতি শীঘ্ৰে গৰাখহনীয়া ৰোধ কৰাৰ ব্যৱস্থা হাতত লয় ৷ বান সমস্যা সমাধানৰ বাবে স্থানীয় বিধায়ক চন্দ্ৰমোহন পাটোৱাৰীক অতি শীঘ্ৰে ব্যৱস্থা গ্ৰহণ কৰিবলৈ অনুৰোধ জনাইছে ৷
যোৰহাট জিলা
নিমাতী আৰু হাতীশালৰ ব্ৰহ্মপুত্ৰ শ্লুইছ গেটৰ প্লেন চি বিধস্ত । বৃহৎ অঞ্চল প্লাৱিত হোৱা আশংকাত আতংকিত হৈ পৰিছে স্থানীয় লোক । যোৰহাটৰ ৰক্ষা কৱচ স্বৰূপ বৰআলিৰ প্ৰতি তীব্ৰ ভাবুকি ৷
লগতে পঢ়ক: বানত এতিয়াও ককবকাই আছে সাতখন জিলাৰ লক্ষাধিক লোক; মৃতকৰ সংখ্যা ৩২ লৈ বৃদ্ধি - ASSAM FLOOD 2024
পূৰ্বৰ বছৰবোৰৰ তুলনাত এইবাৰ ব্ৰহ্মপুত্ৰৰ জলস্তৰ বহু পৰিমাণে বৃদ্ধি পোৱাৰ বাবে ব্ৰহ্মপুত্ৰৰ বাঢ়নী পানীয়ে নিমাতীৰ লগতে দাঁতিকাষৰীয়া অঞ্চলসমূহ বুৰাই পেলাইছে ৷ জিলাখনৰ টীয়ক মেলেং, হাতীশালত ভয়ংকৰ বানৰ আশংকা কৰা হৈছে । ইতিমধ্যে প্ৰশাসনে সকলো নৈপৰীয়া ৰাইজক সজাগ সচেতন হৈ থাকিবলৈ আহ্বান জনাইছে ।
ধেমাজি জিলা
অৰুণাচল প্ৰদেশৰ পৰা চিলাপথাৰ অঞ্চলৰ মাজেৰে বৈ অহা ডিমৌ নদীয়ে সৃষ্টি কৰিছে তীব্ৰ আতংকৰ । ফেনেফোটোকাৰে বৈ অহা নদীখনৰ ভয়াৱহ সোঁতে দেওবাৰে 4 টাকৈ ঘৰ উটুৱাই লৈ গ'ল বুলি জানিব পৰা গৈছে । ঘৰ-বাৰী, মূল্যৱান গছ-গছনি, শস্যৰ ভঁৰাল আদি সকলো হেৰুৱাই মূৰে-কঁপালে হাত দিবলগীয়াত পৰিছে গঞাই ।
লগতে পঢ়ক:জোনাইত লালী-ব্ৰহ্মপুত্ৰৰ কালৰূপ, ২৮ শ গাঁও বানৰ কবলত - ASSAM FLOOD 2024
অৱশিষ্ট বয়-বস্তু, ধন-মাহ লৈ নিৰাপদ স্থান বিচাৰি বানাক্ৰান্তসকলে যাত্ৰা কৰিছে বুলি জানিব পৰা গৈছে । উন্নত প্ৰতিৰোধী ব্যৱস্থাৰ অভাৱত প্ৰতিটো বছৰে এনে দুৰ্যোগৰ সন্মুখীন হৈ আহিছে নৈপৰীয়া ৰাইজ ।
ইতিমধ্যে স্থানীয় বিধায়ক ভূৱন পেগুৱে খহনীয়া তথা ক্ষতিগ্ৰস্ত অঞ্চল পৰিদৰ্শন কৰি অচিৰেই নিৰাপত্তা ব্যৱস্থা গ্ৰহণ কৰা হ’ব বুলি ৰাইজক আশ্বাস প্ৰদান কৰিছে ।
