ডিব্ৰুগড়, 2 মে’ : মুখ্যমন্ত্ৰী হিমন্ত বিশ্ব শৰ্মাই মুখ্যমন্ত্ৰীৰ দ্বায়িত্ব লৈয়ে ঘোষণা কৰিছিল ৰাজ্যত কোনোধৰণৰ অবৈধ কাৰ্য হ’ব নোৱাৰিব । কিন্তু ৰাজ্য চৰকাৰৰ কঠোৰ স্থিতিৰ পাচতো ডিব্ৰুগড় জিলাত অবৈধ সুৰাৰ ব্যৱসায়ৰ লগতে অৰুণাচলী সুৰাৰ ৰমৰমীয়া ব্যৱসায় একাংশই চলাই আহিছে । ইয়াৰ মাজতে বুধবাৰে আৰক্ষী আৰু আবকাৰী বিভাগে মৰাণত যুটীয়া অভিযান চলায় ৷ অভিযানত পোহৰলৈ আহিছে ভেজাল সুৰা প্ৰস্তুত কৰা ঘাটি ।
বিভিন্ন সময়ত বিভিন্নজনে অভিযোগ উত্থাপন কৰিছিল যে একাংশই অধিক ধন ঘটাৰ বাবে কম মূল্যৰ সুৰা দামী সুৰাৰ বটলত ভৰাই ব্যৱসায় কৰিবলৈ আৰম্ভ কৰিছে । ইয়াৰ লগতে একাংশই অৰুণাচলী সুৰা অবৈধভাৱে আনি অসম প্ৰচলিত সুৰাৰ বটলত ভৰাই চলাই আছিল সুৰা ব্যৱসায় । ইয়াৰ মাজতে বুধবাৰে মৰাণত ভেজাল সুৰা প্ৰস্তুত কৰা বৃহৎ ঘাটি উৎখাত কৰিবলৈ সক্ষম হ'ল আবকাৰী আৰু আৰক্ষী ।
মৰাণৰ ২ নং সোণালী পথৰ এটা বাসগৃহত গুৱাহাটীৰ আবকাৰী চোৰাংচোৱা বিভাগে গোপন সূত্ৰৰ পম খেদি ডিব্ৰুগড় আৰু মৰাণৰ আবকাৰী বিভাগ আৰু মৰাণ আৰক্ষীৰ সহযোগত অভিযান চলাই ভেজাল সুৰাৰ ঘাটি উৎখাত কৰে ৷ অভিযানকালত ২ নং সোণালী পথৰ নৃপেন সোণোৱালৰ বাসগৃহত বৃহৎ পৰিমাণৰ বিভিন্ন ব্ৰেণ্ডৰ হ'ল'গ্ৰাম, লেভেলিং পেপাৰ, সাঁফৰ, ছীল, বটল আদি জব্দ কৰিবলৈ সক্ষম হৈছে অভিযানকাৰী দল ।
অভিযানৰ উমান পাই অবৈধ ভেজাল সুৰা প্ৰস্তুত কৰি অহা পিতা নৃপেন সোণোৱাল আৰু পুত্ৰ বিকাশ সোণোৱালে পলায়ন কৰে । দুই পিতা-পুত্ৰই কম মূল্যৰ সুৰাসমূহ দামী সুৰাৰ বটলত ভৰাই ৰমৰমীয়া ব্যৱসায় চলাই আহিছিল । আৱকৰী বিষয়াই জানিবলৈ দিয়া অনুসৰি তিনি চাৰি মাহৰ পূৰ্বৰে পৰা এই কাম পিতা-পুত্ৰই কৰি অহাৰ তথ্য লাভ কৰিছিল তেওঁলোকে ।
এই ভয়ংকৰ ভেজাল সুৰা প্ৰস্তুত কৰা কাৰ্যত আৰু কোন কোন জড়িত সেয়া তদন্ততহে পোহৰলৈ আহিব বুলিও জানিবলৈ দিছে আবকাৰী বিষয়াই ।
লগতে পঢ়ক : হাইজেক হোৱা সুৰাভৰ্তি ট্ৰাক উদ্ধাৰ হ'ল কলিয়াবৰত - Liquor Seized
