গুৱাহাটী : বৰ্তমান বজাৰলৈ যাব নোৱাৰা অৱস্থা ৷ কিয়নো বজাৰত বৃদ্ধি পাইছে নিত্যব্যৱহাৰ্য সামগ্ৰীৰ মূল্য ৷ নিত্যব্যৱহাৰ্য অথবা অত্যাৱশ্যকীয় সামগ্ৰীৰ মূল্যবৃদ্ধি হোৱাত সাধাৰণ জনতাৰ মাজত হাহাকাৰ অৱস্থাৰ সৃষ্টি হৈছে ৷ ইয়াৰ মাজতে আকৌ পুনৰ বৃদ্ধি পাইছে কণীৰ দাম ।
শনিবাৰৰ বজাৰত প্ৰতি প্লেট কণীৰ মূল্য ২০-৩০ টকা পৰ্যন্ত বৃদ্ধি হৈছে । শাক পাচলিৰ জুই-ছাই দামে সৰ্বসাধাৰণ ৰাইজক মাধমাৰ দিয়াৰ সমান্তৰালকৈ কণীৰ মূল্যবৃদ্ধিয়েও বিপাঙত পেলাইছে ৰাইজক ৷ বিগত পাঁচ দিনৰ পৰা প্ৰতি প্লেট কণীৰ মূল্য ২০-৩০ টকাকৈ বৃদ্ধি পাইছে বুলি জানিব পৰা গৈছে । শীত আহাৰৰ লগে লগে কণীৰ দামো যোগানকাৰীসকলে বৃদ্ধি কৰিছে ।
ইফালে ডিচেম্বৰ মাহ পৰা বনভোজ, পাৰ্টী আদিৰ সংখ্যা বাঢ়িব । যাৰ বাবে বজাৰত মাছ-মাংসৰ সমান্তৰালকৈ কণীৰ চাহিদাও বাঢ়িছে । ইয়াৰে সুযোগ লৈ কণী যোগন ধৰা লোকসকলে হঠাৎ বৃদ্ধি কৰিছে কণীৰ দাম ।
মহানগৰীৰ এগৰাকী কণী ব্যৱসায়ীয়ে জনোৱা মতে, "বিগত পাঁচ-ছয় দিনৰ আগৰে পৰা বৃদ্ধি পাইছে কণীৰ মূল্য । এসপ্তাহৰ পূৰ্বে অন্ধ্ৰপ্ৰদেশৰ পৰা অহা প্ৰতিপ্লেট কণীৰ মূল্য আছিল ১৯০-২০০ টকা । সেই একে কণীৰ প্লেটৰ বৰ্তমান দাম বৃদ্ধি হৈ ২২০-২৩০ টকাকৈ বিক্ৰী হৈছে ।’’
তেওঁ লগতে কয়, ‘‘অন্ধ্ৰপ্ৰদেশৰ কণীৰ দাম বৃদ্ধি হোৱাৰ সমান্তৰালকৈ ৰাজ্যত উৎপাদিত বাহুবলী কণীৰ দামো বৃদ্ধি পাইছে । প্ৰতি প্লেট বাহুবলী কণীৰ দাম পূৰ্বতে আছিল ২৬০-২৭০ টকা আছিল আৰু বৰ্তমান ইয়াৰ দাম ২৮০-২৯০ টকা পৰ্যন্ত হৈছে ।’’
‘‘ইফালে প্ৰতিটো কাৰ্টন কণী দাম ১২০০ টকা পৰা ১৫০০ টকা পৰ্যন্ত বৃদ্ধি পাইছে । এই সময়ত প্ৰতি বছৰে কণীৰ দাম বৃদ্ধি হয় যদিও প্ৰতিপ্লেট কণীৰ দাম কোনো দিনে ২০০ টকাৰ ঘৰ পাৰ হোৱা নাছিল ৷ কিন্তু এইবাৰ এই সময়ত প্ৰতি প্লেট কণীৰ দাম ২২০-২৩০ টকা পৰ্যন্ত বাঢ়িছে ।" তেওঁ কয় ৷
আন এগৰাকী ব্যৱসায়ী কয়, "শীত কালত কণীৰ চাহিদা বৃদ্ধি পায় । চাহিদা বৃদ্ধি পালে কণীৰ দাম বৃদ্ধি হয় । কণীৰ দাম বৃদ্ধি হোৱাৰ ফলত গ্ৰাহকৰ মাজতো ইয়াৰ প্ৰভাৱ পৰিছে । ফলত গ্ৰাহকে কমকৈ কণী ক্ৰয় কৰিছে, যাৰ বাবে বিক্ৰীও কমিছে ।’’
