জোনাই ১৬ ছেপ্টেম্বৰ: ৰাজ্যত দিনক দিনে বৃদ্ধি পাইছে নিবনুৱা সমস্যা । দৈনিক হাজাৰ হাজাৰ যুৱক-যুৱতীয়ে কৰ্ম সংস্থাপনৰ সন্ধানত ঢাপলি মেলিছে বহিঃৰাজ্যলৈ। শিক্ষিত যুৱক-যুৱতীয়েও কৰ্মৰ সন্ধানত চুবুৰীয়া ৰাজ্য অৰুণাচল প্ৰদেশকে ধৰি দিল্লী, মহাৰাষ্ট্ৰ, কৰ্ণাটক, তামিলনাডু, কেৰালা আদি ৰাজ্যলৈ গৈয়ে আছে । তেনে সময়তে আন দহজনৰ বাবে আদৰ্শ হৈছে জোনাইৰ এজন শিক্ষিত যুৱক ।
ছাগলী পালনেৰে স্বাৱলম্বিতাৰ নিদৰ্শন দাঙি ধৰিছে ধেমাজি জিলাৰ জোনাইৰ এজন যুৱকে । জোনাই মহকুমা ৰাজাখানা গাঁও পঞ্চায়তৰ অন্তৰ্গত তিনি নং ৰায়াং বালিজানৰ শিক্ষিত যুৱক লেক বাহাদুৰ অধিকাৰীয়ে বিগত তিনি বছৰ ধৰি ছাগলী পালন কৰি আত্মসংস্থাপনৰ বাট বুটলিছে ।
- তিনি বছৰতেই ছাগলী বিক্ৰীৰ বাবে সাজু
তিনি বছৰ পূৰ্বে পাঁচজনী ছাগলীৰে আৰম্ভ কৰিছিল এখন ফাৰ্ম । মাত্ৰ তিনি বছৰতেই লেক বাহাদুৰৰ ছাগলী ফাৰ্মত সৰু বৰ ছাগলীৰ সংখ্য়া ১০০ জনীলৈ বৃদ্ধি পাইছে । তেওঁ কয়," তিনি বছৰতেই ন লাখ টকাৰ ছাগলী বিক্ৰীৰ বাবে সাজু কৰিছো ।" বিটেল, ক্ৰছ বিটেল আৰু থলুৱাকে ধৰি বিভিন্ন প্ৰজাতিৰ ছাগলী আছে তেওঁৰ ফাৰ্মত । ছাগলী পালনেৰে বছৰি লক্ষাধিক টকা উপাৰ্জন কৰি স্বাৱলম্বী হোৱাৰ লগতে আন তিনিগৰাকী লোককো কৰ্ম সংস্থাপন দিবলৈ সক্ষম হৈছে লেক বাহাদুৰ অধিকাৰী ।
- লাভ কৰা নাই সাহাৰ্য
বিভিন্ন সময়ত চৰকাৰে অনুষ্ঠিত কৰা বিজ্ঞান সন্মতভাৱে ছাগলী পালনৰ কৰ্মশালাত অংশগ্ৰহণ কৰাৰ লগতে প্ৰশিক্ষণ লোৱা লেক বাহাদুৰ অধিকাৰীয়ে ছাগলী পালনৰ বাবে বৰ্তমানলৈ কোনো ধৰণৰ চৰকাৰী সাহাৰ্য পোৱা নাই বুলি কয় । ছাগলী পালন কৰি স্বাৱলম্বী হোৱাৰ লগতে আন তিনি জনক কৰ্ম সংস্থাপন দিবলৈ সক্ষম হোৱা লেক বাহাদুৰ অধিকাৰীয়ে মুখ্যমন্ত্রীৰ আত্মনিৰ্ভৰ আঁচনিৰ ধন লাভ কৰিলে বিজ্ঞানসম্মতভাৱে ছাগলী পালনৰ ব্যৱস্থা গ্ৰহণ কৰাৰ আশা মনতে পুহি ৰাখিছে ।
