হোজাই, 23 ফেব্ৰুৱাৰী : উত্তৰ-পূৱ যেন এতিয়া ড্ৰাগছৰ ঘাটি ৷ দৈনিক অষ্টলক্ষ্মীৰ কোনোবা কোনোবা ৰাজ্যত বহৎ বৃহৎ পৰিমাণত ড্ৰাগছ উদ্ধাৰ কৰে আৰক্ষীয়ে ৷ সমাজৰ বাবে বৰবিহ স্বৰূপ ড্ৰাগছৰ বিৰুদ্ধে আৰক্ষী মাৰ বান্ধি থিয় হৈছে যদিও যেন থমকি ৰোৱা নাই ড্ৰাগছ ব্যৱসায়ী ৷ নিতৌ ন-ন কৌশল অৱলম্বনেৰে চলাই নিছে ড্ৰাগছৰ ৰমৰমীয়া ব্যৱসায় ৷
তাতোকৈ আচৰিত হ’ব লগা কথাটো হ’ল এই ড্ৰাগছ ব্যৱসায়ত নামি পৰিছে যুৱ-প্ৰজন্ম ! কেইটামান টকা লাভ কৰাৰ আশাত শিক্ষাৰ পৰা ফালৰি কাটি আহি অবাটে যোৱা এচাম নামি পৰিছে এই মাৰাত্মক ব্যৱসায়ত ৷ শেহতীয়া কেবাটাও অভিযানত আৰক্ষীৰ হাতত ধৰা পৰা সৰবৰাহকাৰীলৈ মন কৰিলে অনুভৱ হয় যেন যুৱ-প্ৰজন্মকে টাৰ্গেট কৰি লৈছে ড্ৰাগছ ব্যৱসায়ীয়ে ৷
এইবাৰ আৰক্ষীৰ গুলীত আহত হ’ল এটা কুখ্যাত ড্ৰাগছ সৰবৰাহকাৰী ৷ ঘটনা অনুসৰি বৃহস্পতিবাৰে পুৱতি নিশা ড্ৰাগছ সৰবৰাহকাৰীৰ পৰিয়ালৰ আক্ৰমণত আহত হৈছিল এজন গৃহৰক্ষী জোৱান । ড্ৰাগছ সৰবৰাহাকাৰীৰ বিৰুদ্ধে অভিযান চলাবলৈ যোৱাৰ সময়তে আত্মৰক্ষাৰ বাবে আৰক্ষীয়ে চলাবলগীয়া হয় গুলী ।
বৃহস্পতিবাৰে পুৱতি নিশা ড্ৰাগছ বিৰোধী অভিযানলৈ ওলাই গৈছিল লামডিং আৰক্ষী । আৰক্ষীৰ লক্ষ্য আছিল লামডিং আই অ’ চিৰ সমীপতে থকা আবুল আলীৰ বাসগৃহ । অভিযোগ অনুসৰি, আবুল আলী ড্ৰাগছ সৰবৰাহৰ সৈতে বহুদিনৰে পৰাই জড়িত ।
এই কুখ্যাত ড্ৰাগছ সৰবৰাহকাৰীটোক পুৱতি নিশা বাসগৃহৰ পৰা গ্ৰেপ্তাৰ কৰাৰ সময়তে পৰিয়ালৰ লোকে আক্ৰমণৰ লক্ষ্য কৰি লয় আৰক্ষীৰ দলটোক । ড্ৰাগছ সৰবৰাহকাৰীটোৰ পৰিয়ালৰ আক্ৰমণত আহত হয় প্ৰণৱ নামৰ এজন গৃহৰক্ষী জোৱান । তাৰ মাজতে আৰক্ষীৰ জিম্মাৰ পৰা পলায়ন কৰে আবুল আলীয়ে ।
এই ঘটনাৰ পিচতে উক্তদিনা সন্ধিয়াৰ ভাগত পুনৰ আৰক্ষীয়ে আবুল আলীৰ সন্ধানত অভিযান চলায় । গুৰ বস্তীৰ চেগুন বাগানত চলোৱা এই অভিযানতে আৰক্ষীৰ গুলীত গুলীবিদ্ধ হয় আবুল আলী । জানিব পৰা মতে আবুল আলীৰ বাওঁ ভৰিৰ আঠুৰ তলত লাগিছে আৰক্ষীৰ গুলী ।
ঘটনাৰ পাচতে আৰক্ষীয়ে আবুল আলীক লামডিং অসামৰিক চিভিল হাস্পতালত ভৰ্তি কৰায় । বৰ্তমান হোজাই আৰক্ষীয়ে তদন্ত অব্যাহত ৰাখিছে বুলি জানিব পৰা গৈছে ।
লগতে পঢ়ক : সহজে ধন ঘটিবৰ বাবেই শিক্ষাবিমুখ হৈ একাংশ নামি পৰিছে ড্ৰাগছ ব্যৱসায়ত
