তিনিচুকীয়া, ২৪ জুন: চৰকাৰে দুৰ্নীতিৰ বিৰুদ্ধে শূন্য সহনশীল নীতি গ্ৰহণ কৰি উৎকোচ লোৱা চৰকাৰী কৰ্মচাৰীক আটক কৰি আহিছে যদিও এতিয়াও গা লৰা নাই একাংশ ঘোচখোৰ কৰ্মচাৰীৰ ৷ চৰকাৰৰ নিৰ্দেশকো আওকাণ কৰি দুৰ্নীতিত নিমজ্জিত হৈয়েই আছে একাংশ চৰকাৰী বিষয়া-কৰ্মচাৰী ৷ চৰকাৰী ধনেৰে পেট নভৰা এইসকল কৰ্মচাৰীয়ে নিজৰ বিবেককো বিক্ৰী কৰিবলৈ কুণ্ঠাবোধ নকৰে কেইটামান ধনৰ বাবে ৷ এইবাৰ দুৰ্নীতি নিবাৰক শাখাৰ জালত পৰিছে তিনিচুকীয়াৰ এগৰাকী চৰকাৰী বিষয়া ৷
তিনিচুকীয়া জিলাৰ মাকুম হাপজান উন্নয়ন খণ্ডৰ শিশু উন্নয়ন প্ৰকল্পৰ কাৰ্যালয়ত সোমবাৰে বিয়লি দুৰ্নীতি নিৰ্বাৰক আৰু অপৰাধ অনুসন্ধান শাখাৰ এটা দলে অভিযান চলায় ৷ হাপজান উন্নয়ন খণ্ডৰ শিশু উন্নয়ন প্ৰকল্পৰ বিষয়া অনুপমা গোহাঁয়ে উৎকোচ লোৱাৰ অভিযোগ লাভ কৰিছিল দলটোৱে ৷ এই অভিযোগৰ ভিত্তিত অভিযান চলাই হাতে-লোটে গ্ৰেপ্তাৰ কৰে গোঁহাইক ।
অভিযোগ অনুসৰি, তিনিচুকীয়া জিলাৰ মাকুমস্থিত কাৰ্যালয়ত অংগনৱাড়ী কেন্দ্ৰৰ ঘৰৰ ভাৰা মুকলি কৰাৰ বাবে এগৰাকী অংগনৱাড়ী কৰ্মীৰ পৰা ৭,০০০ টকা উৎকোচ লৈছিল অনুপমা গোঁহায়ে । অনুপমা গোহাঁইৰ কাৰ্যালয়ত দুৰ্নীতি নিৰ্বাৰক আৰু অপৰাধ অনুসন্ধান শাখাৰ এটা দলে অভিযান চলোৱাৰ সমান্তৰালকৈ বিষয়াগৰাকীৰ বাহন আৰু চাবুৱাস্থিত বাসগৃহতো দলটোৱে তন্নতন্নকৈ তালাচী চলায় ৷
ইয়াৰ সমান্তৰালভাৱে, উক্ত ঘটনাৰ সৈতে জড়িত থকাৰ অভিযোগত একেসময়তে অংগনৱাড়ী কৰ্মী জিনামণি চুতীয়াকো গুৱাহাটীৰ পৰা গ্ৰেপ্তাৰ কৰে দুৰ্নীতি নিৰ্বাৰক আৰু অপৰাধ অনুসন্ধান শাখাৰ এটা দলে ৷ জিনামণি চুতীয়াক দলটোৱে গ্ৰেপ্তাৰ কৰাৰ লগতে তিনিচুকীয়াস্থিত চুতীয়াৰ বাসগৃহটো এটা দলে তন্নতন্নকৈ তালাচী চলাই বুলি জানিব পৰা গৈছে ৷
