গুৱাহাটী, ২৬ জুলাই : চৰকাৰী চাকৰিৰ ক্ষেত্ৰত থলুৱাৰ নিযুক্তি সুনিশ্চিত কৰিবলৈ শীঘ্ৰেই আহিব ড'মিচাইল নীতি (domicile policy)। আজি (শুকুৰবাৰ) এই কথা সদৰী কৰে মুখ্যমন্ত্ৰী ড৹ হিমন্ত বিশ্ব শৰ্মাই ।
দিছপুৰৰ লোকসেৱা ভৱনত এখন সংবাদমেল সম্বোধন কৰি মুখ্যমন্ত্ৰীয়ে কয় যে বিগত তিনি বছৰৰ পৰা অসমৰ চৰকাৰী চাকৰিৰ ক্ষেত্ৰত বাহিৰৰ পৰা চাকৰি কৰিবলৈ এজনো লোক অহা নাই । তথাপিও থলুৱাৰ নিযুক্তি প্ৰসংগক লৈ প্ৰশ্ন উত্থাপন হয় । যাৰ বাবে ড'মিচাইল নীতি এটা কৰাৰ সিদ্ধান্ত গ্ৰহণ কৰা হৈছে ।
I am addressing a Press Conference on the benefits of the 2024 Union Budget for Assam and some other important developments. Do watch https://t.co/lCawunWtTD
— Himanta Biswa Sarma (@himantabiswa) July 26, 2024
অসমত চৰকাৰী চাকৰি পোৱাৰ যোগ্যতা নিৰূপণৰ বাবে শীঘ্ৰে ড'মিচাইল নীতি কৰাৰ কথা সদৰী কৰি মুখ্যমন্ত্ৰীয়ে কয় যে এইক্ষেত্ৰত অসমৰ বিভিন্ন ব্যক্তিৰ লগত আলোচনা কৰা হৈছে । থলুৱাৰ নিযুক্তিক লৈ থকা সকলো বাক-বিতণ্ডাৰ ওৰ পেলাবৰ বাবে প্ৰথমতে তৃতীয় আৰু চতুৰ্থ বৰ্গৰ চাকৰিৰ বাবে ড'মিচাইল নীতি এটা প্ৰস্তুত কৰা হ'ব । পৰৱৰ্তী সময়ত ইয়াক আৰু আগুৱাই লৈ যোৱা হ'ব । এইক্ষেত্ৰত এই মাহৰ ভিতৰতে সিদ্ধান্ত লোৱা হ'ব বুলি মুখ্যমন্ত্ৰীয়ে কয় ।
লগতে পঢ়ক : ঐতিহাসিক সিদ্ধান্ত : এ পি এছ চিৰ মূল পৰীক্ষাত অসমীয়াতো থাকিব প্ৰশ্নকাকত - APSC Main Exam
- অসমীয়াত এ পি এছ চিৰ পৰীক্ষা :
অসম লোকসেৱা আয়োগৰ পৰীক্ষাত প্ৰথমবাৰৰ বাবে অসমীয়া ভাষাৰ প্ৰয়োগ হোৱা সন্দৰ্ভতো মুখ্যমন্ত্ৰীয়ে প্ৰতিক্ৰিয়া ব্যক্ত কৰে । মুখ্যমন্ত্ৰীয়ে কয় যে এইবাৰ প্ৰথমবাৰৰ বাবে এ পি এছ চিৰ প্ৰশ্নকাকত ইংৰাজীৰ লগতে অসমীয়াত কৰা হৈছে । পৰীক্ষাৰ্থীসকলে অসমীয়াতে উত্তৰ লিখিব পাৰিছে । এয়া আমাৰ বাবে মাইলৰ খুঁটি বুলি মুখ্যমন্ত্ৰীয়ে কয় ।
- অসমীয়া ভাষাক ক্লাছিকেল লেংগুৱেজৰ মৰ্যাদা প্ৰদানৰ প্ৰসংগ :
অসমীয়া ভাষাক ক্লাছিকেল লেংগুৱেজৰ মৰ্যাদা প্ৰদান কৰাটো অসম চৰকাৰৰ লক্ষ্য । প্ৰধানমন্ত্ৰীৰে হোৱা সাক্ষাৎকালত এই বিষয়ে আলোচনা কৰিছে মুখ্যমন্ত্ৰীয়ে । সংবাদমেলত মুখ্যমন্ত্ৰীয়ে কয় যে এতিয়ালৈকে ভাৰতৰ পাঁচটা ভাষাক ক্লাছিকেল লেংগুৱেজৰ মৰ্যাদা দিয়া হৈছে । অসমীয়া ভাষাকো যাতে ক্লাছিকেল লেংগুৱেজৰ মৰ্যাদা দিব পাৰি তাৰ বাবে প্ৰধানমন্ত্ৰীৰ লগত আলোচনা কৰা হৈছে ।
- চৰকাৰী চাকৰিয়ালৰ পাৰস্পৰিক বুজাবুজিৰ বদলি সন্দৰ্ভত :
শিক্ষকসকলৰ ক্ষেত্ৰত থকা পাৰস্পৰিক বুজাবুজিৰ বদলিৰ প্ৰক্ৰিয়া অসম চৰকাৰৰ আন আন বিভাগৰ তৃতীয় আৰু চতুৰ্থ বৰ্গৰ কৰ্মচাৰীসকলৰ মাজত কৰাৰ চিন্তা-চৰ্চা কৰা হৈছে । মুখ্যমন্ত্ৰীয়ে সংবাদমেলত এই কথা সদৰী কৰে । পাৰস্পৰিক বুজাবুজিৰ বদলিৰ এই প্ৰক্ৰিয়াৰ মাজেৰে কৰ্মচাৰীসকলে নিজৰ গৃহ জিলালৈ যাব পাৰিব ।
বিগত বৰ্ষত আৰু চলিত বৰ্ষত তৃতীয় আৰু চতুৰ্থ বৰ্গৰ ৪০ হাজাৰ চাকৰিত নিযুক্তি দিয়া হৈছে । বদলিৰ এই প্ৰক্ৰিয়াৰ মাজেৰে তৃতীয় আৰু চতুৰ্থ শ্ৰেণীৰ কৰ্মচাৰীসকলে নিজৰ পচন্দৰ ঠাইলৈ বদলি হৈ যাব পাৰিব । এই বিষয়টো এতিয়াও চিন্তাৰ পৰ্যায়ত আছে বুলি মুখ্যমন্ত্ৰীয়ে কয় ।
