গুৱাহাটী, ৭ মাৰ্চ : যোৰহাটৰ মন্ত্ৰীৰ কনভয়ত আবদ্ধ এম্বুলেন্সত ৰোগী নাছিল । আনহাতে, মন্ত্ৰীৰ কয়ভয়ৰ গাড়ীৰ খুন্দাত খানাপাৰাত যুৱকৰ মৃত্যুৰ ঘটনাত চালকৰ বিৰুদ্ধে দুৰ্ঘটনাজনিত গোচৰ ৰুজু হৈছে । সামাজিক মাধ্যমযোগে দুটা পৃথক পোষ্টত এই কথা সদৰী কৰিছে ৰাজ্যৰ আৰক্ষী সঞ্চালক প্ৰধান জিপি সিঙে ।
মন্ত্ৰী পীযুষ হাজৰীকাৰ কনভয়ৰ বাবে মূৰৰ বিষ বাঢ়িছে ৰাজ্যৰ আৰক্ষী সঞ্চালক প্ৰধান জিপি সিঙৰ । গুৱাহাটীত যদি মন্ত্ৰীৰ কনভয়ৰ গাড়ীৰ খুন্দাত নিৰীহ যুৱকৰ প্ৰাণ গৈছে, তেন্তে আকৌ যোৰহাটত মন্ত্ৰীৰ কনভয় পাৰ হৈ যাবৰ বাবে এম্বুলেন্স ৰখাই থবলগীয়া হৈছে ৷ দুয়োটা ঘটনাতে জড়িত কনভয় মন্ত্ৰী পীযুষ হাজৰীকাৰ আছিল বুলি ৰাজ্যজুৰি প্ৰচাৰ হৈছে । ৰাজ্যৰ সামজিক মাধ্যমত ব্যাপক চৰ্চা লাভ কৰিছে দুয়োটা ঘটনাই ৷ যাৰ বাবে আৰক্ষীৰ লগতে মন্ত্ৰীগৰাকী যথেষ্ট সমালোচনাৰ সন্মুখীন হৈছে । ফলত বাধ্য হৈ ৰাজ্যৰ আৰক্ষী সঞ্চালক প্ৰধানগৰাকীয়ে সামাজিক মাধ্যমত এই দুয়োটা বিষয়ত বৃহস্পতিবাৰে স্পষ্টীকৰণ দিছে ৷
উল্লেখযোগ্য যে মাত্ৰ দুদিন পূৰ্বে গুৱাহাটীৰ খানাপাৰাত মন্ত্ৰীৰ কনভয়ৰ গাড়ীৰ খুন্দাত ৰূপম বৰা নামৰ এজন যুৱকৰ মৃত্যু ঘটিছিল । এই কনভয় মন্ত্ৰী পীযুষ হাজৰীকাৰ বুলি ব্যাপক চৰ্চা হয় । সমগ্ৰ ঘটনা গাপ দি লুকুৱাবলৈ চেষ্টা কৰাৰো অভিযোগ উঠে ৷ মন্ত্ৰীগৰাকী আৰু অসম আৰক্ষীৰ নীতিৰ বিৰুদ্ধে ৰাজ্যজুৰি সমালোচনা আৰম্ভ হয় আৰু ৰূপম বৰাৰ মৃত্যুৰ তদন্ত বিচাৰি সৰৱ হয় ।
আনহাতে, যোৰহাটত মন্ত্ৰীৰ কনভয়ৰ বাবেই এম্বুলেন্স ৰখি থকা দৃশ্য সমগ্ৰ ৰাজ্যতে ভাইৰেল হৈ পৰে । অৱশ্যে যোৰহাটৰ এম্বুলেন্সখনত কোনো ৰোগী নাছিল বুলি বৃহস্পতিবাৰে স্পষ্টীকৰণ দিয়ে অসম আৰক্ষীৰ সঞ্চালক প্ৰধান জিপি সিঙে । সামাজিক মাধ্যমত এই প্ৰসংগত জিপি সিঙে লিখিছে— “ভিআইপি কনভয়ৰ বাবে যোৰহাটত ৰখাই দিয়া এম্বুলেন্সৰ প্ৰচলিত ভিডিঅ' প্ৰসংগ— উক্ত এম্বুলেন্সৰ নম্বৰ : এএছ-০১-পিচি-৪৩৬৫ । শিবিৰ :ঢেকিয়াল পিএইচচি, গোলাঘাট । চালক আছিল ছানমুল আলী ৷ অনা-জৰুৰীকালীনভাৱে কৰ্তব্য সম্পাদন কৰি নিজৰ নিজৰ থকা স্থানলৈ উভতি অহা এম্বুলেন্সখনত কোনো ৰোগী নাছিল । বাহনখনত কোনো ৰোগী নথকা আৰু অনা-জৰুৰীকালীন অৱস্থাত চলি থকাৰ বাবে কৰ্তব্যৰত আৰক্ষীৰ লোকে ৰখাই দিয়ে ।”
লগতে আৰক্ষী সঞ্চালক প্ৰধানগৰাকীয়ে উল্লেখ কৰে, “অৱশ্যে ৰোগী কঢ়িয়াই অনা বা জৰুৰীকালীন গতিবিধিৰ এম্বুলেন্সক দিয়া হ’ব অগ্ৰাধিকাৰ ৷ পথ উলিয়াই দিয়াৰ ক্ষেত্ৰত সমগ্ৰ ৰাজ্যজুৰি আৰক্ষী আৰু যান-বাহন কৰ্মীক পুনৰ সংবেদনশীল কৰি তোলা হৈছে । লগতে এনে অনা-জৰুৰীকালীন কৰ্তব্যত থকা এম্বুলেন্সসমূহক ফ্লেচাৰ আদি ব্যৱহাৰৰ পৰা বিৰত থাকিবলৈয়ো অনুৰোধ জনোৱা হৈছে ।”
আনহাতে, খানাপাৰাত কনভয়ৰ গাড়ীৰ খুন্দাত ৰূপমজ্যোতি বৰাৰ মৃত্যু প্ৰসংগত জিপি সিঙে এইদৰে স্পষ্টীকৰণ দিছে, “যান-বাহনৰ পথ দুৰ্ঘটনাৰ ফলত ছয়মাইলত মৃত্যু প্ৰসংগ— এই পথ দুৰ্ঘটনাত শ্ৰী ৰূপমজ্যোতি বৰাই প্ৰাণ হেৰুৱালে । দিছপুৰ আৰক্ষী থানাত ১৯৮/২৪ নম্বৰত এক গোচৰ পঞ্জীয়ন কৰা হৈছে আৰু গাড়ীখনৰ চালকৰ বিৰুদ্ধে বৈধ ব্যৱস্থা গ্ৰহণৰ বাবে তদন্ত চলি আছে । দুৰ্ঘটনাটোত জড়িত বলেৰো বাহনখন অধিক তদন্তৰ বাবে জব্দ কৰা হৈছে । MACT (Motor Accident Claim Tribunal)-ৰ অধীনত প্ৰক্ৰিয়াও ক্ষিপ্ৰ কৰা হৈছে ।”
লগতে পঢ়ক :অখিল গগৈৰ নামত কিয় সামাজিক মাধ্যমত পোষ্ট দিলে জি পি সিঙে ?
