মহাপুৰুষ মাধৱদেৱৰ তিৰোভাৱ তিথিত মংগল কামনাৰে অক্ষয় বন্তিত দিলে তেল - Death anniversary of Madhavdev

428th Death anniversary of Madhavdev : আজি হৰিনামৰ ধ্বনিৰে মুখৰিত হয় ৰাজ্য । মাধৱদেৱৰ তিথি উপলক্ষে সত্ৰসমূহত ভীষণ ব্যস্ততা পৰিলক্ষিত হয় । ৰাইজৰ কুশলৰ বাবে অক্ষয় বন্তিত তেল, শৰাই আগবঢ়াইছে ভকতে ।

নিউজ ডেস্ক, ২৪ আগষ্ট : আজি মহাপুৰুষ মাধৱদেৱৰ ৪২৮ সংখ্যক তিৰোভাৱ তিথি । ৰাজ্যৰ অনান্য ঠাইৰ লগতে যোৰহাট জিলাৰ পূব প্ৰান্তত মাধৱদেৱে নিজহাতে প্ৰতিষ্ঠা কৰা ঐতিহাসিক ঢেকীয়াখোৱা বৰনামঘৰত দিনযোৰা কাৰ্যসূচীৰে মাধৱদেৱ তিথি উদযাপন কৰা হয় । পুৱা প্ৰাতঃ প্ৰসংগ, দিহানামেকে ধৰি গুৰু কাৰ্যসূচীৰে আৰম্ভ কৰি নাম কীৰ্তনৰে সমগ্ৰ পৰিৱেশ ভক্তিময় কৰি তোলে ।

ইপিনে আজিৰ এই বিশেষ দিনটোত পূৰ্বৰ দৰে পুৱাৰে পৰা অসমৰ বিভিন্ন প্ৰান্তৰ ভকত বৈষ্ণৱে হাতে হাতে শৰাই, ধূপ, চাকি লৈ নেদেখাজনৰ চৰণত সেৱা জনায় । সমান্তৰালকৈ নামঘৰ পৰিচালনা সমিতিয়েও সকলো ৰাইজৰ কুশল মংগলৰ অৰ্থে অক্ষয় বন্তিত তেল, এখনি শৰাই আগবঢ়ায় । জাতি ধৰ্ম, বৰ্ণ নিৰ্বিশেষে সকলোৰে পূৰ্ণ সহযোগত মাহজোৰা পালনাম আৰু মহাপুৰুষ মাধৱদেৱৰ তিথি উদযাপন কৰা হৈছে ।

• মৰিগাঁৱত শোভাযাত্ৰা :

আজি মাধৱদেৱৰ দাস্য ভকতিত মুখৰিত হয় মৰিগাঁও আকাশ-বতাহ । বিভিন্ন নামঘৰ, কীৰ্তন ঘৰৰ সমান্তৰালকৈ মৰিগাঁৱত ঘোষা, পদ পৰিৱেশনৰে সনাতনী সমাজে উদযাপন কৰিলে শ্ৰীশ্ৰী মাধৱদেৱৰ তিৰোভাৱ তিথি । ৰাজ্যৰ বিভিন্ন প্ৰান্তৰ নামঘৰ, কীৰ্তন ঘৰ, মঠ-মন্দিৰৰ সমান্তৰালকৈ মৰিগাঁও জিলাৰ বিভিন্ন নামঘৰ, কীৰ্তন ঘৰত দিনযোৰা কাৰ্যসূচীৰে মহাপুৰুষ শ্ৰীশ্ৰী মাধৱদেৱৰ তিৰোভাৱ তিথি উদযাপন কৰা হয় । হৰিনামৰে মুখৰিত হয় মৰিগাঁও জিলাৰ বিভিন্ন অঞ্চল ।

মৰিগাঁও সনাতনী সমাজে প্ৰথমবাৰৰ বাবে উদযাপন কৰিলে মহাপুৰুষ শ্ৰীশ্ৰী মাধৱদেৱৰ তিথি । জাউৰিয়ে জাউৰিয়ে মাধৱদেৱৰ বিভিন্ন ঘোষা, পদ, বৰগীত আদি পৰিৱেশনৰে ছন্দিত হয় মৰিগাঁৱৰ আকাশ-বতাহ । এক কথাত ক'বলৈ গ'লে গুৰু দুজনাৰ সৃষ্টিৰাজি তথা দেৱবাদ্যৰ তাল, লয়ত নাচি-বাগি আয়তীসকলে ৰাজপথত পৰিৱেশন কৰিলে ঘোষা, পদ আদি । স্বেচ্ছাসেৱী সংগঠন সহায় অসমৰ উদ্যোগত আৰু সনাতনী ৰাইজৰ সহযোগত মৰিগাঁও চহৰত উলিওৱা হয় এক শোভাযাত্ৰা ।

সহায় অসমৰ সভাপতি ৰাজু মহন্তই কয়, "আমি সকলো সনাতনী ৰাইজ একেলগে আছো আৰু ভৱিষ্যতে একেলগে থাকি সকলো সনাতনী ৰাইজ যে একেডাল সমন্বয়ৰ ডোলেৰে বন্ধা তাকেই প্ৰমাণ কৰিবলৈ বিচাৰিছো ।"

• ধুবুৰীত মাধৱদেৱৰ তিৰভাব তিথি উদযাপন :

ৰাজ্যৰ অন্য় প্ৰান্তৰ লগতে ধুবুৰী জিলাৰ জিনকাটাৰ শ্রীশ্রী ৰাজহুৱা সত্ৰত দিনযোৰা কাৰ্যসূচীৰে মাধৱদেৱ তিথি উদযাপন কৰা হয় । পুৱা প্ৰাতঃপ্ৰসংগ,দিহা নামেকে ধৰি গুৰু কাৰ্যসূচীৰে আৰম্ভ কৰি নাম কীৰ্তনৰ সমগ্ৰ পৰিৱেশ ভক্তিময় কৰি তোলে । ইপিনে, নামঘৰ পৰিচালনা সমিতিয়েও ৰাইজৰ কুশলৰ অৰ্থে অক্ষয় বন্তিত তেল দিয়াৰ লগতে এখনি শৰাই আগবঢ়ায় ।

লগতে পঢ়ক:বৰপেটা আৰু মাজুলীত মহাপুৰুষ মাধৱদেৱৰ ৪২৮ সংখ্যক তিৰোভাৱ তিথি পালন - Death anniversary of Madhavdev