গুৱাহাটী, ২৫ ছেপ্টেম্বৰ : বিজেপিৰ যুৱনেতা দেৱজিৎ হাজৰিকাৰ আত্মহত্যাৰ ঘটনাৰ লগত নাম সাঙোৰ খাই পৰা বিতৰ্কিত আৰ টি আই কৰ্মী দুলাল বৰাৰ জামিন আবেদন নাকচ হ’ল । বিপৰীতে একেটা প্ৰসংগত নাম সাঙোৰ খাই পৰা এটা ব্যক্তিগত নিউজ চেনেলৰ সাংবাদিক ৰফিক আহমেদে পালে অন্তৱৰ্তীকালীন জামিন ।
সোণাৰি থানাৰ ১১২/২০২৪নম্বৰ গোচৰৰ বিপৰীতে ৰফিক আহমেদে লাভ কৰিলে জামিন ৷ দুয়োগৰাকী লোকে কৰি অহা ব্লেকমেইলিং আৰু মানসিক নিৰ্যাতনৰ বাবেই অভিজিৎ হাজৰিকাই আত্মহত্যা কৰাৰ অভিযোগ উঠিছিল ৷
এফালে আৰ টি আই আৰু নিউজ পৰ্টেলৰ যোগেদি ব্লেকমেইলিং কৰাৰ অভিযোগত অভিযুক্ত দুলাল বৰাৰ জামিন আবেদন বুধবাৰে নাকচ হৈছে গুৱাহাটী উচ্চ ন্যায়ালয়ত ৷ আনফালে নতুন দিল্লীত এখন হাস্পতালত আশ্ৰয় লৈ থকা অৱস্থাত দিল্লী আৰক্ষীৰ অপৰাধ অনুসন্ধান শাখাৰ জালত পৰিল বিতৰ্কিত দুলাল বৰা ৷
উচ্চ ন্যায়ালয়ে দুলাল বৰাক নিদিলে কোনো সকাহ ৷ অন্তৱৰ্তী জামিন লাভ নকৰিলে দুলাল বৰাই ৷ উচ্চ ন্যায়ালয়ে গোচৰটোৰ বিচাৰিলে কেছ ডায়েৰী ৷ অহা ২২ অক্টোবৰত গোচৰটোৰ পৰৱৰ্তী শুনানিৰ দিন ধাৰ্য কৰি দুলাল বৰাৰ ক্ষেত্ৰত কেছ ডায়েৰী বিচাৰিলে আদালতে ৷
আনহাতে, দেৱজিৎ হাজৰিকাৰ আত্মহত্যাৰ গোচৰত আন এজন অভিযুক্ত এটা নিউজ চেনেলৰ সাংবাদিক ৰফিক আহমেদে লাভ কৰিলে অন্তৰ্ৱৰ্তীকালীন জামিন ৷ প্ৰয়াত দেৱজিৎ হাজৰিকাৰ পত্নীয়ে কৰা অভিযোগ অনুসৰি বুধবাৰে জামিন লাভ কৰা তথা ঘটনাটো ঘটা দিনাৰ পৰা পলাতক অৱস্থাত থকা সাংবাদিক ৰফিক আহমেদে দেৱজিৎ হাজৰিকাক ৫০ হাজাৰ টকা দাবী কৰিছিল ৷
আনহাতে এটা নিউজ পৰ্টেলৰো স্বত্বাধিকাৰী দুলাল বৰাই আৰ টি আইৰ যোগেদি আত্মহত্যা কৰা পঞ্চায়ত সভাপতি দেৱজিৎ হাজৰিকাক ব্লেকমেইল কৰাৰ অভিযোগ উঠিছিল । দুলাল বৰাৰ নিউজ পৰ্টেলটোত ডাঃ মৃদুপৱন নাথ নামৰ এজন চিকিৎসকৰ বৃহৎ পৰিমাণৰ ধন বিনিয়োগ আৰু লেন-দেনৰ গোচৰত মুখ্যমন্ত্ৰীৰ তদাৰকী কোষেও তলৱ কৰিছিল দুলাল বৰাক ৷
দুলাল বৰাৰ জামিনৰ বিৰুদ্ধে আদালতত চৰকাৰী পক্ষৰ হৈ যুক্তি দৰ্শাইছিল অধিবক্তা মাখন ফুকনে ৷ আনহাতে জামিন লাভ কৰা ৰফিক আহমেদৰ হৈ ন্যায়াধীশ পাৰ্থিৱজ্যোতি শইকীয়াৰ বিচাৰপীঠত যুক্তি দৰ্শাইছিল অধিবক্তা বিজন মহাজনে ৷
লগতে পঢ়ক : দিল্লীত আৰক্ষীৰ জালত পৰিল বিতৰ্কিত দুলাল বৰা, শীঘ্ৰে অনা হ’ব অসমলৈ
