গুৱাহাটী: অশান্তজৰ্জৰ মণিপুৰত হত্যা-হিংসা বন্ধ কৰাৰ দাবীত মঙলবাৰে সন্ধিয়া অসম প্ৰদেশ কংগ্ৰেছে গুৱাহাটীত এক প্ৰতিবাদী কাৰ্যসূচী ৰূপায়ণ কৰে । পূৰ্বঘোষিত কাৰ্যসূচী অনুযায়ী কংগ্ৰেছৰ প্ৰতিবাদকাৰীসকলে সন্ধিয়া দীঘলীপুখুৰীৰ পাৰত মিলিত হয় । তাৰ পিছত বিৰোধী দলৰ দলপতি দেৱব্ৰত শইকীয়াৰ নেতৃত্বত কংগ্ৰেছৰ প্ৰতিবাদকাৰীসকলে সন্ধিয়া দীঘলীপুখুৰীৰৰ পাৰত মমবাতি জ্বলাই প্ৰতিবাদ সাব্যস্ত কৰে ।
ইফালে শ শ কংগ্ৰেছ কৰ্মীয়ে দীঘলীপুখুৰীৰ পাৰত প্ৰতিবাদ কৰি থকাৰ সময়তে আৰক্ষীয়ে কংগ্ৰেছ কৰ্মীসকলক আগুৱাই যোৱাত বাধা প্ৰদান কৰে । যাৰ ফলত প্ৰতিবাদকাৰী আৰু আৰক্ষীৰ মাজত হতাহতিৰ সৃষ্টি হয় । প্ৰতিবাদকাৰীসকলে বেনাৰ লৈ বিজেপি মুৰ্দাবাদ, নৰেন্দ্ৰ মোদী মুৰ্দাবাদ, গৃহমন্ত্ৰী অমিত শ্বাহে পদত্যাগ কৰক, মণিপুৰৰ বিজেপি চৰকাৰক বৰ্খাস্ত কৰক আদি ধ্বনি দি পৰিৱেশ উত্তাল কৰি তোলে ।
দীঘলীপুখুৰীৰ পৰা হাতত মমবাতি লৈ সন্দিকৈ ছোৱালী মহাবিদ্যালয়ৰ ফালে প্ৰতিবাদকাৰীসকল আগবাঢ়ে যদিও আৰক্ষীয়ে সমদলটোক আগবঢ়াত বাধা দিয়ে । আনহাতে, বিৰোধী দলৰ নেতা দেৱব্ৰত শইকীয়াই কংগ্ৰেছ কৰ্মীসকলক সম্বোধন কৰি কয়, "বিজেপিয়ে জনগোষ্ঠীসমূহৰ মাজত ভেদ-ভাব সৃষ্টি কৰি মণিপুৰক অশান্ত কৰি তুলিছে ।"
মণিপুৰলৈ প্ৰধানমন্ত্ৰী কিয় নাহে বুলি প্ৰশ্ন কৰি দেৱব্ৰত শইকীয়াই কয়, "প্ৰধানমন্ত্ৰী নৰেন্দ্ৰ মোদীয়ে মণিপুৰত হৈ থকা হত্যা-হিংসাক গুৰুত্ব দিব নোখোজাতো দেশৰ সংবিধান-বিৰোধী কথা । মণিপুৰত নাৰী আৰু শিশুৰ অধিকাৰ সম্পূৰ্ণৰূপে খৰ্ব হৈছে । মানৱ অধিকাৰৰ বধ্যভূমিত পৰিণত হৈ পৰিছে মণিপুৰ ।" লগতে প্ৰধানমন্ত্ৰীক পৰিস্থিতি নিয়ন্ত্ৰণ কৰিবৰ বাবে দাবী জনাই বিৰোধী দলৰ নেতা শইকীয়াই ।
প্ৰতিবাদস্থলীত প্ৰাক্তন সাংসদ ৰিপুণ বৰা, আব্দুল খালেকেও বিজেপিৰ অপশাসনৰ ফলতেই মণিপুৰ আজি জ্বলি আছে বুলি অভিযোগ কৰে । অসম প্ৰদেশ কংগ্ৰেছৰ উপ-সভাপতি পূৰ্ণকান্ত গগৈ, ৰূপা দেউৰী, জ্যেষ্ঠ নেতা বলীন কুলী, ৰামান্না বৰুৱা, বিপুল গগৈ, দ্বীপ বায়ন, প্ৰদ্যুৎ ভূঞা প্ৰমুখ্যে কংগ্ৰেছ নেতাসকল উপস্থিত থাকে । প্ৰতিবাদী সভাখনৰ আঁত ধৰে প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই ।
