মৰাণ, ২৪ জুন : মুখ্যমন্ত্ৰী ড৹ হিমন্ত বিশ্ব শৰ্মাই কলেৰা ৰোগত আক্ৰান্ত হৈ মৃত্যুমুখত পৰা সকলৰ পৰিয়ালক এক লাখ টকাকৈ আৰ্থিক সাহাৰ্য প্ৰদানৰ ব্যৱস্থা কৰিছে । মুখ্যমন্ত্ৰীৰ নিৰ্দেশত মোকালবাৰী চাহ বাগিচাত কলেৰা ৰোগত মৃত্য়ু হোৱা দুজন লোকৰ পৰিয়ালক সোমবাৰে আৰ্থিক সাহাৰ্য প্ৰদান কৰিলে বিধায়ক বিনোদ হাজৰিকাই । মোকালবাৰী চাহ বাগিচাৰ গ্ৰাণ্ট লাইনৰ নিবাসী দ্বীপক বাউৰীৰ পুত্ৰ ৰাহুল বাউৰী আৰু তেওঁৰ খুলশালী মাখনি বাউৰীৰ পৰিয়ালক আজি বিধায়ক গৰাকীয়ে মুখ্যমন্ত্রীৰ আৰ্থিক সাহাৰ্য প্ৰদান কৰে । বিধায়কগৰাকীয়ে বাগিচাখনত বৰ্তমান পৰিস্থিতি নিয়ন্ত্ৰণলৈ আহিছে বুলিও কয় ।
উল্লেখ্য় যে ডিব্ৰুগড় জিলাৰ কেইবাখনো চাহ বাগিচাত কলেৰা আৰু ডায়েৰিয়াই ভয়ংকৰ ৰূপ লৈছিল যদিও সম্প্ৰতি নিয়ন্ত্ৰণলৈ আহিছে পৰিস্থিতি । বিগত কেইবামাহত জিলাখনৰ কেইবাখনো চাহ বাগিচা এলেকাত এজনৰ পাচত আন এজন লোক আক্ৰান্ত হৈছে এই ৰোগত । বিশেষকৈ জিলাখনৰ চাহ বাগিচা অঞ্চলত এই ৰোগৰ প্ৰাদুৰ্ভাৱ দেখিবলৈ পোৱা গৈছে । আজি পৰ্যন্ত এই ৰোগত ডিব্ৰুগড় জিলাৰ চাৰিজন লোকে মৃত্যুক আঁকোৱালি লৈছে । জিলাখনৰ নাহৰকটীয়াৰ জয়পুৰ চাহ বাগিচাৰ ৭৫ জন লোকৰ কলেৰা আৰু ডায়েৰিয়াৰ সংক্ৰমণ হোৱাৰ লগতে দুজনে মৃত্যুক আকোঁৱালি লয় । ইয়াৰ সমান্তৰালভাৱে লাহোৱাল সমষ্টিৰ মোকালবাৰী চাহ বাগিচাত কলেৰা আৰু ডায়েৰিয়া ৰোগে ভয়ংকৰ ৰূপ লৈছিল ।
লগতে পঢ়ক:সজাগতাৰ অভাৱ-নাই চিকিৎসক : কলেৰাৰ সংক্ৰমণ ৰোধ হ'ব কেনেকৈ ? - Cholera cases in Assam
বাগিচাখনৰ অৰ্ধশতাধিক লোক ৰোগত আক্ৰান্ত হোৱাৰ লগতে দুজনে ২৫ এপ্ৰিলত মৃত্যুক আঁকোৱালি লয় । ডিব্ৰুগড়ৰ চাহ বাগিচাৰসমূহত দেখা দিয়া কলেৰা আৰু ডায়েৰিয়াৰ প্ৰাদুৰ্ভাৱক লৈ হাহাঁকাৰ লাগে স্বাস্থ্য বিভাগত । আনকি ডিব্ৰুগড়ত কলেৰা ৰোগীৰ মৃত্যুক লৈ উদ্বেগ প্ৰকাশ কৰিছিল মুখ্যমন্ত্ৰীগৰাকীয়ে । উল্লেখযোগ্য যে মুখ্যমন্ত্রীৰ পৰা আৰম্ভ কৰি স্বাস্থ্য বিভাগে দাবী কৰিছে ডিব্ৰুগড়ৰ কলেৰা ৰোগীৰ সম্পৰ্ক আছে বহিঃৰাজ্যত । বহিঃৰাজ্যত কাম কৰা লোক চাহ বাগিচাসমূহলৈ অহাৰ পাচতেই এই ৰোগ বিয়পি পৰিছিল । কিন্তু চাহ বাগিচাত শ্ৰমিক লাইনসমূহৰ কদৰ্য পৰিবেশে এইসমূহ ভয়ংকৰ ৰোগৰ কাৰক হ'ব পাৰে বুলি দাবী কৰিছে সচেতন ৰাইজে ।
অপৰিস্কাৰ নলা-নৰ্দমা,বিশুদ্ধ খোৱা পানীৰ অভাৱ তথা অনাময় আঁচনিৰ অভাৱত মুকলি ঠাইত মল-মূত্ৰ ত্যাগ কৰা বাবেই এই ৰোগে বাগিচাখনত ভয়াৱহ ৰূপ লোৱা বুলি স্থানীয় সচেতন ৰাইজে মন্তব্য় কৰিছে । সেয়েহে চৰকাৰ আৰু চাহ বাগিচাসমূহৰ কৰ্তৃপক্ষই বাগিচাসমূহৰ শ্ৰমিক লাইনসমূহৰ কদৰ্য পৰিবেশ কেতিয়া নোহোৱা কৰিব সেয়াহে লক্ষ্যণীয় হ'ব ।
লগতে পঢ়ক:কলেৰা ৰোগৰ সৈতে যুঁজিবলৈ সাজু ৰাজ্যৰ স্বাস্থ্যবিভাগ - Cholera Cases In Assam
