শিলচৰ, ৬ মে': ছোৱাইন ফ্লুক লৈ আতংকৰ সৃষ্টি হৈছে হাইলাকান্দিত । হাইলাকান্দিত ছোৱাইন ফ্লুত আক্ৰান্ত হৈ মৃত্যু শিশুৰ । মৃত্যু হোৱা ডেৰ বছৰীয়া শিশুটিৰ নাম ফাৰহানা খানম । ছোৱাইন ফ্লুৰ বাবে জিলাখনত জাৰি কৰা হৈছে হাই এলাৰ্ট । ইপিনে, কাছাৰতো বৃদ্ধি পাইছে ছোৱাইন ফ্লুৰ সংক্ৰমণ । কাছাৰত ৪ শিশুসহ ৫ জন আক্ৰান্ত ছোৱাইন ফ্লুত । সম্প্ৰতি শিলচৰ চিকিৎসা মহাবিদ্যালয়ত চিকিৎসাধীন আক্ৰান্তসকল ।
৩, ৪ আৰু ৫ মহীয়া শিশু ছোৱাইন ফ্লুত আক্ৰান্ত হৈ চিকিৎসাধীন হ'বলগীয়া হৈছে । অৱশ্যে ছোৱাইন ফ্লুক লৈ আতংকিত হোৱাৰ পৰিস্থিতি উদ্ভৱ হোৱা নাই বুলি প্ৰকাশ স্বাস্থ্য বিভাগৰ । শিলচৰ মেডিকেল কলেজৰ অধ্যক্ষ ডাঃ ভাস্কৰ গুপ্তাই কয় যে, শিলচৰ মেডিকেল কলেজত ছোৱাইন ফ্লুত আক্ৰান্ত হৈ এতিয়াও চিকিৎসাধীন হৈ আছে তিনিগৰাকী শিশু ।
যোৱা এসপ্তাহত শিলচৰ মেডিকেল কলেজত ছোৱাইন ফ্লুত আক্ৰান্ত হৈ শিশুসহ পাঁচজন ভৰ্তি হৈ আছিল । ইয়াৰে সুস্থ হোৱাৰ পিছত দুজনক ঘৰলৈ যাবলৈ দিয়া হৈছে । চিকিৎসাধীন আন তিনিজন ক্ৰমে সুস্থ হোৱাৰ পথত । ছোৱাইন ফ্লুক লৈ কাছাৰ জিলাত আতংকিত হোৱাৰ কোনো কাৰণ নাই বুলি জনায় শিলচৰ মেডিকেল কলেজৰ অধ্যক্ষ ডাঃ ভাস্কৰ গুপ্তাই ।
তেওঁ কয়, সতৰ্কতা অৱলম্বন কৰিলেই এই ৰোগৰ পৰা ৰক্ষা পোৱা যায় । এই সময়চোৱাত মাস্ক, ছেনিটাইজাৰ ব্যৱহাৰ কৰাৰ লগতে সামজিক দূৰত্ব বজায় ৰখাৰ আহ্বান অধ্যক্ষ ডাঃ ভাস্কৰ গুপ্তাৰ ।
ছোৱাইন ফ্লু মূলতঃ গাহৰিৰ ক্ষেত্ৰত দেখা দিয়া এবিধ ৰোগ । ১৯৩০ চনত আমেৰিকাত ধৰা পৰিছিল এই ৰোগ । তথ্য অনুসৰি ২০১৩ চনত ভাৰতত ৭০০ লোকৰ মৃত্যু ঘটিছিল এই ৰোগত । ছোৱাইন ফ্লু মূলতঃ ভাইৰাছৰ পৰা সৃষ্টি হোৱা এবিধ শ্বাস-প্ৰশ্বাসজনিত ৰোগ । ইয়াৰ মূল কাৰণ হ'ল ইনফ্লুৱেঞ্জা ভাইৰাছ-A । এই ৰোগত আক্ৰান্ত ৰোগীৰ হাঁচি, পানীলগা, কাহ, শ্বাস-প্ৰশ্বাসত কষ্ট, নিউমিনীয়া আদি লক্ষণে দেখা দিয়ে । শিশুসকল এইৰোগত অতি সোনকালে আক্ৰান্ত হোৱা দেখা যায় ।
লগতে পঢ়ক: গেছ ভৰ্তি টেংকাৰ আৰু আৰ্টিগা বাহনৰ মাজত মুখামুখি সংঘৰ্ষ, নিহত এজন - horrific Road Accident
