গুৱাহাটী, ২৫ আগষ্ট: স্মাৰ্ট আৰক্ষীৰ লগতে নিৰাপত্তাৰক্ষীৰে গিজগিজাই থকাৰ পিচতো গুৱাহাটী মহানগৰীত অপৰাধীয়ে নিৰ্বিঘ্নে সংঘটিত কৰি আহিছে এটাৰ পিচত আনটো অপৰাধ । এই অপৰাধীৰ টিঘিলঘিলনিৰ বাবে এতিয়া প্ৰাতঃভ্ৰমণো সুৰক্ষিত নহয় । স্মাৰ্ট আৰক্ষীৰ ব্যৰ্থতাৰ সুযোগ লৈ মহানগৰীত সঘনাই বৃদ্ধি পাব ধৰিছে চেইন চুৰি, মোবাইল চুৰিৰ দৰে একাধিক অপৰাধমূলক ঘটনা । ইয়াৰ মাজতেই দেওবাৰে প্ৰাতঃভ্ৰমণলৈ যাওঁতে পিষ্টল দেখুৱাই দুৰ্বৃত্তই কাঢ়ি নিলে মহিলাৰ ডিঙিৰ সোণৰ চেইন ।
গুৱাহাটীৰ এটা অভিজাত মিউজিক প্ৰতিষ্ঠান এন কে প্ৰডাকচনৰ স্বত্বাধিকাৰী দেৱ বৰকটকীৰ পত্নী ৰাণী বৰকটকীক পিষ্টল দেখুৱাই দুৰ্বৃত্তই কাঢ়ি নিলে ডিঙিৰ সোণৰ চেইন । ভুক্তভোগী ৰাণী বৰকটকীয়ে দেওবাৰে পুৱা প্ৰাতঃভ্ৰমণলৈ যাওঁতে জু-ৰোডৰ পিনাকি পথত সংঘটিত হয় এই ভয়ংকৰ ঘটনাটো ।
ভুক্তভোগীগৰাকীয়ে এই ঘটনাৰ বিষয়ে বৰ্ণনা কৰি কয়, "মটৰ চাইকেলত অহা দুটা চিলনী চোৰে প্ৰথমতে মোৰ পিচে পিচে আহি আছিল । তাৰ পিচত চিলনী চোৰে মোক পিষ্টল দেখুৱাই ডিঙিৰ পৰা সোণৰ চেইনডাল কাঢ়ি লৈ পলায়ন কৰে ।" ইফালে চিলনী চোৰে টনা-আজোৰ কৰাত মহিলাগৰাকী বাগৰি পৰাত মূৰ আৰু ডিঙিত আঘাত পায় । সেই সময়তেই পিষ্টলধাৰী দুৰ্বৃত্তই পলায়ন কৰে ।
পিছত ভুক্তভোগী মহিলা গৰাকীয়ে 'চোৰ চোৰ' বুলি চিঞৰাত সেই স্থানত উপস্থিত হোৱা লোকে আঘাতপ্ৰাপ্ত মহিলাগৰাকীক উদ্ধাৰ কৰি হাস্পতালত ভৰ্তি কৰে । ভুক্তভোগী মহিলাগৰাকীয়ে ঘটনা সন্দৰ্ভত গীতানগৰ আৰক্ষী থানাত এখন এজাহাৰ দাখিল কৰিছে । জানিব পৰা মতে, চিলনী চোৰৰ আঘাটত মহিলাগৰাকীৰ মূৰত চাৰিটাকৈ চিলাই পৰিছে ।
