মাজুলী: দুদিনীয়া কাৰ্যসূচীৰে মাজুলীত উপস্থিত হয় অসমৰ ৰাজ্যপাল লক্ষ্মণ প্ৰসাদ আচাৰ্য । মাজুলীত উপস্থিত হৈ ৰাজ্যপালগৰাকীয়ে অংশগ্ৰহণ কৰে মাজুলী সাংস্কৃতিক বিশ্ববিদ্যালয়ৰ প্ৰথম দীক্ষান্ত সমাৰোহত ।
ইয়াৰ পিছতে মাজুলীৰ কেইবাটাও স্থান পৰিদৰ্শন কৰে ৰাজ্যপালগৰাকীয়ে । ইয়াৰ মাজতে ৰাজ্যপালগৰাকীক শুকুৰবাৰে পৰিদৰ্শন কৰোৱা হয় কমলাবাৰী ঘাট । ব্ৰহ্মপুত্ৰ ব'ৰ্ডৰ বিষয়াসকলে ৰাজ্যপালগৰাকীক পৰিদৰ্শন কৰাই ঘাটতো ।
পিছে মাজুলীত ব্ৰহ্মপুত্ৰৰ অতি স্পৰ্শকাতৰ খহনীয়া স্থানৰ পৰিৱৰ্তে কমলাবাৰী ঘাটলৈ নি ৰাজ্যপালৰ পৰা ব্ৰহ্মপুত্ৰ ব'ৰ্ডে বাঃ বাঃ লোৱাৰ চেষ্টা চলোৱা বুলিহে এতিয়া চৰ্চা চলিছে মাজুলীত । কিয়নো, ভকত চাপৰি আৰু শালমৰাত বৰ্তমানো অব্যাহত আছে ব্যাপক খহনীয়া । তেনে পৰিপ্ৰেক্ষিতত ব্ৰহ্মপুত্ৰ ব'ৰ্ডে অসমৰ ৰাজ্যপাল লক্ষ্মণ প্ৰসাদ আচাৰ্যক দেখুৱালে কেৱল কমলাবাৰী ঘাট । বান গৰাখহনীয়াই সুদীৰ্ঘ বছৰৰ পৰা জুৰুলা কৰি অহা মাজুলীৰ অতি স্পৰ্শকাতৰ শালমৰা আৰু ভকত চাপৰিত বৰ্তমানলৈ প্ৰায় ৩০০ ৰো অধিক পৰিয়ালে ঘৰবাৰী হেৰুৱাই দিশহাৰা হ'ব লগা হৈ আহিছে ।
माजुली में आज ब्रह्मपुत्र बोर्ड के अधिकारियों के साथ बैठक कर माजुली द्वीप की सुरक्षा एवं विकास कार्यों की समीक्षा की। इस दौरान पर्यावरण और पारिस्थितिकी के संरक्षण हेतु बोर्ड की नवीन तकनीकियों एवं उपकरणों का भी निरीक्षण किया। pic.twitter.com/gR6fyXVx3Y
— लक्ष्मण प्रसाद आचार्य (Lakshman Prasad Acharya) (@Laxmanacharya54) November 8, 2024
ইমানৰ পিছতো ২০০৩ চনৰ পৰা মাজুলীৰ খহনীয়া প্ৰতিৰোধৰ দায়িত্বত থকা কেন্দ্ৰীয় চৰকাৰৰ ব্ৰহ্মপুত্ৰ ব'ৰ্ড নামৰ সংস্থাটোৱে মাজুলীবাসী তথা নদীপৰীয়া লোকৰ জীৱন-জীৱিকাৰ প্ৰতিহে প্ৰতিনিয়ত ভাবুকি কঢ়িয়াই অনাৰ অভিযোগ উত্থাপন হৈছে । মাজুলীত দুদিনীয়া ভ্ৰমণেৰে উপস্থিত হোৱা ৰাজ্যপাল লক্ষ্মণ প্ৰসাদ আচাৰ্যক ব্ৰহ্মপুত্ৰ ব'ৰ্ডে খহনীয়া পৰিৰ্দশন কৰোৱাৰ নামত কমলাবাৰী ঘাটলৈ নি ব্ৰহ্মপুত্ৰ ব'ৰ্ডে নিজৰ কামৰ শলাগ লোৱা পৰিলক্ষিত হয় । ইয়াৰ বিপৰীতে কেতিয়া মাজুলীবাসীয়ে খহনীয়াৰ সমস্যা তথা বানৰ সমস্যাৰ পৰা পৰিত্ৰাণ পাব সেই সম্পৰ্কে কোনো ব্যৱস্থা লোৱা পৰিলক্ষিত নহ'ল ।
