গুৱাহাটী : ২০০৮ ৰ পৰা পাৰ হৈ গ'ল ১৬ বছৰ । কেউপিনে আছিল মানুহৰ পোৰা মঙহৰ গোন্ধ । যিসকলে আপোনজন আজিৰ দিনটোত হেৰুৱাইছিল, যিসকলে আজিৰ দিনটোৰ পৰাই পংগুত্ব অৰ্জন কৰিছিল তেওঁলোকে এই ক’লা দিনটো সুঁৱৰি পাৰ পৰিছে সময় ।
কিন্তু এই দিনটোৰ কথা সকলোৱে পাহৰিছে । সময়ৰৰ লগে লগে পাহৰণি গৰ্ভলৈ গ'ল আজিৰ দিনটো । দুৰ্ভাগ্যৰ কথা যে অসমৰ ইতিহাসত ক'লা দিনৰূপে পৰিগণিত ৩০ অক্টোবৰৰ এই দিনটো ৰজাঘৰীয়াৰ লগতে পাহৰিলে দল-সংগঠনেও ।
এই দিনটোত প্ৰাণ হেৰুওৱাসকলৰ সোঁৱৰণত গুৱাহাটী মহানগৰীৰ গণেশগুৰিৰ উৰণ সেতুৰ তলৰ বিস্ফোৰণস্থলীত কামৰূপ মহানগৰ জিলা প্ৰশাসনৰ তৰফৰ পৰা পালন কৰা হৈছিল শ্ৰদ্ধাঞ্জলি অনুষ্ঠান । এই অনুষ্ঠানত মন্ত্ৰী-বিধায়কসকল উপস্থিত হৈছিল । কিন্তু দুৰ্ভাগ্যৰ কথা যে এইবাৰ গণেশগুৰি উৰণসেতুৰ তলত ঘটনাস্থলীত আয়োজন কৰা নহ'ল কোনো শ্ৰদ্ধাঞ্জলি অনুষ্ঠানৰ । নজ্বলিল এগছ চাকিও
জিলা প্ৰশাসনৰ নাম প্ৰকাশত অনিচুক এক বিষয়াই জনোৱা মতে, উৰণ সেতুৰ তলটো সংকুচিত হৈ অহাৰ বাবে শ্ৰদ্ধাঞ্জলি অনুষ্ঠানৰ আয়োজন নকৰিলে ।
২০০৮ চনত আজিৰ দিনটোত ক’ত ক’ত হৈছিল বোমা বিস্ফোৰণ ?
২০০৮ চনৰ দিপাৱলীৰ আনন্দৰ সময়তে সেই দিনটো অসমৰ ইতিহাসৰ বাবে এটা ক'লা দিন হিচাপে চিহ্নিত হৈছিল । গুৱাহাটী মহানগৰীৰ গণেশগুৰি, পাণবজাৰ, কাছাৰী, বৰপেটাৰোড, কোকৰাঝাৰত একেলগে ১৮ টাকৈ বিস্ফোৰণত ৮০ জনকৈ নিৰীহ লোকে প্ৰাণ হেৰুওৱাৰ লগতে চিৰদিনৰ বাবে ঘূণীয়া হৈ দুৰ্বিষহ জীৱন কটাবলগীয়া হৈছে বহুজনে । আজিও ন্যায় নাপালে ভুক্তভোগী পৰিয়ালে ।
