মৰাণ, ২৭ ছেপ্টেম্বৰ : চৰাইদেউৰ বিজেপি নেতা তথা ৰজাপুখুৰী পঞ্চায়তৰ সভাপতি দেৱজিৎ হাজৰিকাৰ আত্মহত্যাৰ ঘটনাক লৈ এতিয়াও প্ৰতিক্ৰিয়া অব্যাহত আছে ৷ তাৰ মাজতেই ঘটনাৰ মূল অভিযুক্ত হিচাপে বিবেচিত হোৱা বিৰ্তকিত আৰ টি আই কৰ্মী দুলাল বৰাক দিল্লীত আত্মগোপন কৰি থকা অৱস্থাত গ্ৰেপ্তাৰ কৰা হয় । বুধবাৰে পুৱাতে দিল্লী আৰক্ষীয়ে গ্ৰেপ্তাৰ কৰে দুলাল বৰাক । বৃহস্পতিবাৰে নিশা দিল্লীৰ পৰা ট্ৰেনজিট ৰিমাণ্ডত গুৱাহাটীলৈ অনা হয় দুলাল বৰাক । গুৱাহাটীৰ পৰা পোনে পোনে চৰাইদেউৰ সোণাৰি আৰক্ষী থানালৈ অনা হ'ল বিতৰ্কিত আৰ টি আই কৰ্মী দুলাল বৰাক ।
শুকুৰবাৰে পুৱাতে চৰাইদেউ আৰক্ষীৰ এক বৃহৎ দলে দুলাল বৰাক সোণাৰিলৈ আনে । চৰাইদেউৰ সোণাৰি আৰক্ষী থানাত জেৰা চলোৱাৰ লগতে চৰাইদেউ ন্যায়িক আদালতত হাজিৰ কৰোৱা হ'ব দুলাল বৰাক ।
উল্লেখ্য যে যোৱা ২০ ছেপ্টেম্বৰত বিজেপি নেতাগৰাকীয়ে আত্মহত্যা কৰাৰ দিনাৰে পৰা পলাতক হৈ আছিল বিৰ্তকিত আৰ টি আই কৰ্মী দুলাল বৰা আৰু সোণাৰিৰ সাংবাদিক ৰফিক আহমেদ । ইতিমধ্যে সোণাৰি আৰক্ষীয়ে ঘটনা সংঘটিত হোৱাৰ দিনাই আন দুজনক গ্ৰেপ্তাৰ কৰিছিল ।
সোণাৰি আৰক্ষীয়ে অৱসৰপ্ৰাপ্ত খণ্ড উন্নয়ন বিষয়া ৰঞ্জিত বুঢ়াগোহাঁই আৰু সংবাদকৰ্মী পৰিস্মিতা বৈশ্য ফুকনক গ্ৰেপ্তাৰ কৰি তিনিদিন নিজৰ জিম্মাত লৈ জেৰা চলোৱাৰ অন্তত ইতিমধ্যে জে'ললৈ প্ৰেৰণ কৰিছে । আনহাতে, বিজেপি নেতাগৰাকীৰ আত্মহত্যাত নাম সাঙোৰ খোৱা এটা আগশাৰীৰ টেলিভিছন চেনেলৰ সোণাৰিৰ সাংবাদিক ৰফিক আহমেদে ঘটনাৰ দিনাৰে পৰা আত্মগোপন কৰি দুটা দিনৰ পূৰ্বে অন্তৱৰ্তীকালী জামিন লাভ কৰিবলৈ সক্ষম হয় ।
চৰাইদেউ জিলা বিজেপিৰ জ্যেষ্ঠ নেতা তথা পঞ্চায়ত সভাপতিগৰাকীৰ গাড়ীৰ ভিতৰত উদ্ধাৰ হোৱা ছুইচাইড নোটত উল্লেখ কৰি গৈছিল আত্মহত্যাৰ কাৰণ । "বাৰে বাৰে বাতৰি পৰিবেশন কৰি মানসিক হাৰাশাস্তি চলাই আহিছিল মোক। সঠিক ন্যায় বিচাৰি এই সিদ্ধান্ত ল'লো" । এইকথা ছুইচাইড নোটত উল্লেখ কৰি উক্ত চাৰিজনৰ নাম উল্লেখ কৰি গৈছিল দেৱজিৎ হাজৰিকাই ।
কিন্তু সাংবাদিক ৰফিক আহমেদে অন্তৱৰ্তীকালীন জামিন লাভ কৰাত সৃষ্টি হৈছে ব্যাপক প্ৰতিক্ৰিয়া । আনহাতে, দুলাল বৰাক গ্ৰেপ্তাৰ কৰা পাচত চৰাইদেউৰ সোণাৰিত আৰক্ষীয়ে তদন্ত কেনেদৰে আগবঢ়াই সেয়া লক্ষণীয় হ'ব ।
