নলবাৰী, ৫ আগষ্ট : নলবাৰীৰ এখন বিদ্যালয় চৌহদৰ অৱস্থাই জীয়াতু ভোগাইছে কণ কণ শিক্ষাৰ্থীক । বিগত এমাহৰো অধিক কাল বিদ্যালয়খন বুৰ গৈ আছে কৃত্ৰিম বানত । যেন জীউটো হাতত লৈ কোনোমতে বিদ্যালয়খনত উপস্থিত হয় কণ কণ ছাত্ৰ-ছাত্ৰীসকল । অকণনাম অসাৱধান হ'লেই নলবাৰীৰ এই বিদ্যালয়খনত ঘটিব পাৰে বিপদ, ঘটিব পাৰে অঘটন ।
নলবাৰীৰ বৰভাগৰ ৰাইমাধা গাঁৱত অৱস্থিত বৰভাগ ফখৰুদ্দিন আলি আহমেদ এম ই মাদ্ৰাছা বিদ্যালয়খনৰ দৃশ্য এয়া । কৃত্ৰিম বানৰ কবলত বিদ্যালয়খন । যাৰ বাবে কণ কণ শিক্ষাৰ্থীয়ে এই সমস্যা সমাধানৰ দাবীত সোমবাৰে প্ৰতিবাদ সাব্যস্ত কৰে । কণ কণ শিক্ষাৰ্থীসকলে শ্ৰেণীকোঠা বৰ্জন কৰি ৰাজপথত প্ৰতিবাদত নামে ।
আনহাতে, বিদ্যালয়খনৰ শিক্ষক-কৰ্মচাৰী তথা অভিভাৱকৰ নেতৃত্বত কণ কণ শিক্ষাৰ্থীসকলে হাতে হাতে বেনাৰ, ফেষ্টুন লৈ সমদল কৰি উপস্থিত হয় বৰভাগ ৰাজহ চক্ৰ বিষয়াৰ কাৰ্যালয়ত । ৰাজহ চক্ৰ বিষয়াৰ জৰিয়তে শিক্ষকসকলে সমস্যা সমাধানৰ দাবীত মুখ্যমন্ত্ৰীলৈ স্মাৰক-পত্ৰ প্ৰদান কৰে ।
উল্লেখ্য যে বৰভাগৰ এইখন বিদ্যালয়ৰ সন্মুখৰে যোৱা দুটিকৈ ৰাজপথ ক্ৰমে ঘগ্ৰাপাৰ-দামোদৰধাম-বিজুলীঘাট পথ আৰু গ্ৰামাঞ্চললৈ প্ৰৱেশিত এটি পথ বিদ্যালয়খনতকৈ ওখকৈ নিৰ্মাণ কৰাত বিদ্যালয় চৌহদৰ পানী ওলাই যাব নোৱাৰে । যাৰ ফলত বিদ্যালয় চৌহদতে পানী আবদ্ধ হৈ থাকে । ইয়াৰ ফলশ্ৰুতিত বিদ্যালয়খন কৃত্ৰিম বানেৰে উপচি পৰে । উক্ত কদৰ্যময় পৰিৱেশৰ মাজত পাঠদান প্ৰক্ৰিয়াত যথেষ্ট অসুবিধাৰ সন্মুখীন হোৱাৰ লগতে ছাত্র-ছাত্ৰীসকলে মৰণক শৰণ দি বিদ্যালয়ত উপস্থিত হ'বলগীয়া হয় ।
যাৰ বাবে উপায়ন্তৰ হৈ ছাত্র-ছাত্ৰীসকলে সোমবাৰে হাতে হাতে প্লে'-কাৰ্ড লৈ প্ৰতিবাদ সাব্যস্ত কৰাৰ লগতে বৰভাগ ৰাজহ চক্ৰৰ বিষয়াক স্মাৰক-পত্ৰ প্ৰদান কৰে । "আমাক খেলিবলৈ দিয়ক, আমাক পঢ়িবলৈ দিয়ক, বিদ্যালয়ৰ কৃত্ৰিম বান নিষ্কাশন কৰক" আদি শ্লোগানেৰে প্ৰতিবাদ সাব্যস্ত কৰে ছাত্র-ছাত্ৰীসকলে । আনহাতে, উক্ত পথ দুটিত নলা নিৰ্মাণেৰে পানী নিষ্কাশন কৰি বিদ্যালয়খনৰ এই ভয়াৱহ সমস্যা দূৰ কৰিবলৈ বিদ্যালয়ৰ প্ৰধান শিক্ষক আৰু বিভিন্ন দল-সংগঠনে দাবী জনায় ।
