বজালী,২৭ জুন: গাঁৱে-ভূঁয়ে, চহৰে-নগৰে সকলো পথৰ উন্নয়নৰ কৰা বুলি ঢাক-ঢোল বজাইছে চৰকাৰখনে । পিছে প্ৰকৃতাৰ্থত কিমান উন্নয়ন হৈছে ৰাজ্যৰ বাট-পথৰ ? সময়ে সময়ে এই কথাও পোহৰলৈ আহিছে । কোনো স্থানত যদি পথৰ মাজত পুখুৰী, আকৌ আন কোনো স্থানত পথাৰসদৃশ পথ । পিছে সততে সংবাদ মাধ্যমত এনে খবৰ প্ৰকাশ পোৱাৰ পাচতো গা-নলৰে একাংশ জনপ্ৰতিনিধিৰ । জনপ্ৰতিনিধিয়ে প্ৰতিশ্ৰুতি দিয়ে যদিও পুনৰ যেন পাহৰি যায় ।
বিধ্বস্ত পথ নিৰ্মাণৰ বাবে চৰকাৰৰ আবেদন-নিবেদন কৰি সঁহাৰি নাপাই অতিষ্ঠ হৈ পৰে জনসাধাৰণ । এনে এক পথৰ বাবে দীৰ্ঘদিনে জলাকলা খাই আহিছে বজালীৰ এটা অঞ্চলৰ ৰাইজে । জনপ্ৰতিনিধিৰ কোনো সঁহাৰি নাপাই অৱশেষত অঞ্চলটোৰ ৰাইজেই নামিল পথ নিৰ্মাণত ৷ এয়া বজালীৰ বতিয়ামাৰীৰ ন-পাৰা চুবুৰীৰ প্ৰায় ডেৰ কিঃমিঃ পথ দীৰ্ঘদিন ধৰি জৰাজীৰ্ণ হৈ থকাৰ পৰিপ্ৰেক্ষিতত প্ৰতিবছৰে বাৰিষা চুবুৰীটোৰ পঞ্চাশৰো অধিক পৰিয়ালৰ লোক, ছাত্ৰ-ছাত্ৰীয়ে বাৰিষা যাতায়তৰ নামত ভোগ কৰি আহিছে নৰক যন্ত্ৰণা ৷
এজাক বৰষুণ দিলেই বিধ্বস্ত হৈ পৰা পথছোৱা নিৰ্মাণৰ বাবে ৰাইজে দীৰ্ঘসময় ধৰি বাঘমাৰা গাঁও পঞ্চায়ত, বজালী উন্নয়ন খণ্ডৰ লগতে সমষ্টিটোৰ জনপ্ৰতিনিধিক আবেদন-নিবেদন কৰি আহিছিল যদিও কোনো ব্যৱস্থা নোলোৱাত অৱশেষত উপায়ন্তৰ হৈ চুবুৰীটোৰ ৰাইজে ঘৰে ঘৰে অৰ্থ সংগ্ৰহ কৰি নিজাববীয়াকৈ শিল-বালি ক্ৰয় কৰি পথছোৱা যাতায়তৰ উপযোগী কৰিবলৈ বাধ্য হয় ৷
