ধিং,২৯ জুন: মৰিগাঁৱৰ জিলা আয়ুক্তৰ কাৰ্যালয়ৰ সভাকক্ষত শনিবাৰে জিলা প্ৰশাসনৰ উদ্যোগত, জিলা আৰু সত্ৰ ন্যায়াধীশ, জিলা আইন সেৱা প্ৰাধিকৰণৰ সহযোগত অনুষ্ঠিত হয় নতুন অপৰাধমূলক আইন সম্পৰ্কীয় এখন গুৰুত্বপূৰ্ণ বৈঠক । ২০২৪ চনৰ পহিলা জুলাইৰ পৰা কাৰ্যকৰী হ’বলগীয়া নতুন অপৰাধমূলক আইন, "ভাৰতীয় ন্যায় সংহিতা ২০২৩, ভাৰতীয় নাগৰিক সুৰক্ষা সংহিতা ২০২৩" আৰু "ভাৰতীয় সাক্ষ্য অধিনিয়ম ২০২৩" ৰ বিষয়ে সভাত বিতংভাৱে আলোচনা কৰা হয় ।
জিলা আয়ুক্ত দেৱাশীষ শৰ্মাৰ অধ্যক্ষতাত অনুষ্ঠিত সভাখনত জিলা আয়ুক্তগৰাকীয়ে কয় যে এই অপৰাধমূলক আইনসমূহ পৰিৱৰ্তিত সময়ৰ সৈতে খাপ খোৱাকৈ প্ৰণয়ন কৰা হৈছে । অপৰাধৰ পৃথিৱীখনত হোৱা ব্যাপক পৰিৱৰ্তনৰ সৈতে মোকাবিলা কৰাৰ বাবে এই আইনসমূহত পৰিৱৰ্তন অনাটো অতিকে প্ৰয়োজনীয় আছিল আৰু এই নতুন আইনে ন্যায় ব্যৱস্থাক যথেষ্ট শক্তিশালী কৰিব বুলি তেওঁ আশা প্ৰকাশ কৰে ।
তেওঁ কয় যে এই নতুন আইন প্ৰণয়নৰ ফলত ন্যায় প্ৰদান ব্যৱস্থা অধিক ক্ষীপ্ৰতৰ হ'ব । সভাত আৰক্ষী অধীক্ষক হেমন্ত কুমাৰ দাসে কয় যে অসম আৰক্ষীৰ বহুসংখ্যক বিষয়াই ইতিমধ্যে অপৰাধমূলক ফৰেনছিক বিজ্ঞানৰ প্ৰশিক্ষণ লাভ কৰিছে । নতুন আইন প্ৰণয়ন আৰু এনে আইনৰ অধীনৰ গোচৰসমূহৰ সৈতে মোকাবিলা কৰাৰ সময়ত আৰক্ষীয়ে কেনেদৰে ব্যৱস্থা গ্ৰহণ কৰিব লাগিব সেই বিষয়ে ইতিমধ্যে তেওঁলোকক প্ৰশিক্ষণ প্ৰদান কৰা হৈছে । তেওঁ আশা কৰে যে এই আইন তিনিখনে ন্যায় প্ৰদান ব্যৱস্থাটোক এটা নতুন মাত্ৰা প্ৰদান কৰিব ।
নতুন আইনকেইখনত এনে কেতবোৰ ব্যৱস্থা ৰখা হৈছে য'ত ভুক্তভোগীয়ে ন্যায় পোৱাটো নিশ্চিত কৰা হৈছে আৰু অপৰাধমূলক ঘটনাৰ ক্ষেত্ৰত ডিজিটেল সাক্ষ্যকো গ্ৰহণ কৰাৰ ব্যৱস্থা ৰখা আছে । আইন তিনিখনে স্বচ্ছতা আৰু জবাবদিহিতাৰ লগতে ক্ষীপ্ৰ ন্যায় প্ৰদান সুনিশ্চিত কৰিব বুলি তেওঁ কয় । সভাত উপস্থিত থাকি মৰিগাঁও জিলাৰ মুখ্য ন্যায়িক দণ্ডাধীশ বিদ্যুৎ মেধিয়ে তিনিওখন আইনৰ ক্ষেত্ৰত অনা পৰিৱৰ্তনৰ ওপৰত আলোকপাত কৰে ।
তেওঁ কয় যে ভুক্তভোগীৰ অধিকাৰ বিশেষকৈ মহিলা আৰু শিশুৰ ক্ষেত্ৰত এই তিনিওখন আইনত যথেষ্ট পৰিৱৰ্তন সাধন কৰা হৈছে । এই তিনিওখন আইনে শাস্তিৰ পৰিৱৰ্তে ন্যায়ৰ ওপৰত অধিক গুৰুত্ব আৰোপ কৰিব আৰু ইয়াৰ লক্ষ্য হৈছে ক্ষীপ্ৰ ন্যায় প্ৰদান । এতিয়া ন্যায় ব্যৱস্থাত প্ৰযুক্তিৰ ব্যৱহাৰ অধিক হ'ব বুলিও তেওঁ প্ৰসংগক্ৰমে উল্লেখ কৰে ।
তেওঁ কয় যে এই আইনসমূহে ন্যায় প্ৰক্ৰিয়াক হেঁচামুক্ত কৰি তুলিব, য’ত ডিজিটেল সাক্ষ্যক ভৌতিক সাক্ষ্যৰ সমতুল্য হিচাপে গণ্য কৰা হ'ব । এতিয়া অপৰাধমূলক ন্যায় ব্যৱস্থা জনসাধাৰণৰ বাবে অধিক সুলভ হ’ব বুলিও তেওঁ আশা প্ৰকাশ কৰে । সভাত অতিৰিক্ত জিলা আয়ুক্ত পল্লৱী কছাৰী, আৰক্ষী বিষয়াসকল, চক্ৰ বিষয়াসকল, সহকাৰী আয়ুক্তসকল আৰু ভালেসংখ্যক বিষয়া উপস্থিত থাকে ।
