দৰং, 1 জুলাই : ল’ৰা-ছোৱালীৰ মাজত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ ক্ষেত্ৰত লাভ কৰা সফলতাৰ বাবে দৰং জিলাই ৰাষ্ট্ৰীয় পৰ্যায়ত শ্ৰেষ্ঠ প্ৰদৰ্শনকাৰী জিলাৰ সন্মান লাভ কৰিবলৈ সক্ষম হৈছে । দেওবাৰে নতুন দিল্লীৰ বিজ্ঞান ভৱনত ৰাষ্ট্ৰীয় শিশু অধিকাৰ সুৰক্ষা আয়োগে আয়োজন কৰা এক অনুষ্ঠানত দৰঙৰ জিলা আয়ুক্ত মুনীন্দ্ৰ নাথ ঙাটেয়ে কেন্দ্ৰীয় গৃহ ৰাজ্য মন্ত্ৰী নিত্যানন্দ ৰায়ৰ পৰা এই সফলতাৰ বাবে প্ৰশস্তি পত্ৰ গ্ৰহণ কৰে ।
এই সন্মান গ্ৰহণ কৰি দৰঙৰ জিলা আয়ুক্ত মুনীন্দ্ৰ নাথ ঙাটেয়ে কয়, "দৰং জিলাত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ বাবে আমাৰ প্ৰচেষ্টা অব্যাহত আছে । আজি এই সন্মান লাভ কৰি আমি আনন্দিত হৈছো । দৰং জিলাই লাভ কৰা এই স্বীকৃতিয়ে অধিক আন্তৰিকতা আৰু দায়ৱদ্ধতাৰে আমাক এইক্ষেত্ৰত কাম কৰি যাবলৈ আমাক অনুপ্ৰেৰণা যোগাব ।"
লগতে পঢ়ক: বৃহৎ পৰিমাণৰ নিচাজাতীয় সামগ্ৰীসহ আৰক্ষীৰ জালত স্বামী-স্ত্ৰী
উল্লেখ্য যে, ৰাষ্ট্ৰীয় শিশু অধিকাৰ সুৰক্ষা আয়োগে নাৰ্কোটিকচ কন্ট্ৰোল ব্যুৰোৰ সৈতে ল’ৰা-ছোৱালীৰ মাজত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ বাবে যুটীয়াভাৱে প্ৰস্তুত কৰা কৰ্মসূচী 2021 চনৰ ফেব্ৰুৱাৰী মাহত প্ৰকাশ কৰিছিল । সমগ্ৰ দেশজুৰি বিদ্যালয় শিক্ষানুষ্ঠানসমূহৰ চৌহদৰ সমীপত নিচাযুক্ত সামগ্ৰীৰ বিক্ৰী ৰোধ কৰাৰ লগতে লৰা-ছোৱালীক নিচাযুক্ত সামগ্ৰীৰ গ্ৰাসৰ পৰা ৰক্ষা কৰাৰ বাবে এইবোৰৰ বিৰুদ্ধে কাৰ্যসূচী গ্ৰহণ কৰিছিল । এই যুটীয়া কৰ্মসূচী ৰূপায়ণৰ নিৰীক্ষণৰ বাবে জিলা দণ্ডাধীশ জিলা আয়ুক্তসকলক দায়িত্ব দিয়া হৈছিল ।
