হাফলং: একাগ্ৰতা থাকিলে কি কৰিব পাৰি, ইয়াৰে এক জ্বলন্ত উদাহৰণ হৈছে ডিমা হাছাও জিলাৰ এগৰাকী মহিলা ৷ শিক্ষাগ্ৰহণৰ সময়ত কোনোদিনে জন্মভূমিৰ বাহিৰলৈ নোযোৱা এইগৰাকী মহিলাই স্নাতক ডিগ্ৰী সম্পূৰ্ণ কৰাৰ পাছত কৰ্মৰ সন্ধানত বহিঃৰাষ্ট্ৰলৈ গৈ এতিয়া বহুতৰে বাবে বিশেষকৈ ডিমা হাছাও জিলাৰ মহিলাসকলৰ বাবে আদৰ্শ হৈ পৰিছে ৷ তেওঁ হৈছে ডিমা হাছাও জিলাৰ হাফলং চহৰৰ বাসিন্দা পিংকী ৰায় ৷
প্ৰৱল ইচ্ছাশক্তি আৰু নিজকে প্ৰতিষ্ঠিত কৰাৰ দৃঢ় সংকল্পৰ ফলত পিংকী ৰায়ে আজি নিজকে ডুবাইৰ এগৰাকী প্ৰতিষ্ঠিত ট্ৰাম চালক হিচাপে প্ৰতিষ্ঠা কৰিবলৈ সক্ষম হৈছে ৷ বৰ্তমান তেওঁ আবুধাবিত লোকো পাইলট হিচাপে নিয়োজিত হৈ আছে ৷ তেওঁৰ এই প্ৰৱল ইচ্ছাশক্তি থকাৰ বাবে এতিয়া ডিমা হাছাও জিলাৰ সকলো মহিলাৰ বাবে তেওঁ আদৰ্শ হৈ পৰিছে ৷ পিছে পিংকী ৰায়ৰ এই যাত্ৰা ইমান সহজসাধ্য নাছিল ৷ তীব্ৰ প্ৰত্যাহ্বানৰ মাজেৰে তেওঁ সুদূৰ ডুবাইত নিজকে প্ৰতিষ্ঠা কৰিবলৈ সক্ষম হয় ৷
পিংকী ৰায়ে তেওঁ এই যাত্ৰাৰ বিষয়ে সুঁৱৰি কয়, "২০০৯ চনত মই ডুবাইৰ মেট্ৰ’ত তিনি বছৰ প্ৰশিক্ষণ লোৱাৰ পিছতে ২০১৪ চনৰ অক্টোবৰত মই ট্ৰাম চালক হিচাবে কাম আৰম্ভ কৰো । ইয়াৰ পিছতে মোৰ পদোন্নতি হয় আৰু কিদৰে ট্ৰাম চলে ইয়াৰ পৰ্যবেক্ষণৰ দায়িত্ব দিয়া হয় । অৱশেষত ২০২৩ চনত আবুধাবিত প্ৰশিক্ষণ লোৱাৰ পাছত মই লোকো পাইলটৰ দায়িত্ব লওঁ ৷"
তেওঁ লগতে কয়, "মই ইতিহাস বিভাগত স্নাতক ডিগ্ৰী গ্ৰহণ কৰিছিলো ৷ গতিকে এই যাত্ৰা মোৰ বাবে অতি প্ৰত্যাহ্বানমূলক আছিল ৷ লোকো পাইলটৰ দায়িত্ব লোৱাটো মোৰ বাবে চেলেঞ্জিং আছিল । কিন্তু লোকো পাইলটৰ দায়িত্ব ল’লেও মই ৰে’ল চলোৱা নাই । ৰে’লৰ গতিবিধি প্ৰত্যক্ষৰ দায়িত্ব আছিল মোৰ ওপৰত ৷"
শাৰদীয় দুৰ্গোৎসৱৰ বাবে গৃহ চহৰত উপস্থিত হোৱা পিংকী ৰায়ে নিজৰ অভিজ্ঞতা প্ৰকাশ কৰি কেনেকৈ ৰাজ্যৰ শিক্ষিত যুৱক-যুৱতীসকলে নিজকে প্ৰতিষ্ঠিত কৰিব পাৰে তাৰেই উদাহৰণ দাঙি ধৰিছে ৷ তেওঁ যুৱ প্ৰজন্মক নিজৰ লক্ষ্যত উপনীত হোৱাৰ প্ৰচেষ্টা অব্যাহত ৰখাৰ লগতে এটা লক্ষ্যত উপনীতত হোৱাৰ পূৰ্বে লাভ কৰা প্ৰত্যাহ্বান তথা সুযোগৰ পূৰ্ণ সুবিধা লাভ কৰাৰ আহ্বান জনায় ৷
লগতে পঢ়ক: প্ৰ-পত্ৰ পূৰণ কৰি চি বি আইক হিচাপ দিছে বিনিয়োগকাৰীয়ে
