গুৱাহাটী, ১১ আগষ্ট : 'মিজোৰাম চৰকাৰে সীমা সমস্যাৰ বিষয়টো গুৰুত্ব সহকাৰে লৈ ইয়াৰ সমাধানত সদিচ্ছা প্ৰকাশ কৰিছে।' - এই মন্তব্য মন্ত্রী অতুল বৰাৰ । দুদিনীয়া কাৰ্যসূচীৰে মিজোৰাম ভ্ৰমণৰ পৰা অহা মন্ত্রী অতুল বৰাই দেওবাৰে দিছপুৰত এখন সংবাদমেল সম্বোধন কৰে । মিজোৰামত মন্ত্রী অতুল বৰাই ৰাজ্যখনৰ মুখ্যমন্ত্রী আৰু গৃহমন্ত্রী পৰ্যায়ত দুখনকৈ বৈঠকত মিলিত হৈ সীমা সমস্যাৰ সমাধানৰ বাবে আলোচনা কৰে ।
সংবাদমেলত মন্ত্রী অতুল বৰাই কয় - '২০২১ চনৰ আগষ্টত অসম-মিজোৰাম সীমান্তত হোৱা দুৰ্ভাগ্যজনক ঘটনাৰ পাচতে মিজোৰামলৈ গৈছিলো । তাৰ পাচত মন্ত্রী পৰ্যায়ৰ কেইবাখনো বৈঠক অনুষ্ঠিত হৈছে । আনহাতে দুয়োখন ৰাজ্যৰ মুখ্যমন্ত্রী পৰ্যায়তো আলোচনা হৈছে । মিজোৰামৰ নিৰ্বাচনৰ পাচত নতুন চৰকাৰৰ লগতো বৈঠক হৈছে । চলিত বৰ্ষৰ ৯ ফেব্ৰুৱাৰীত গুৱাহাটীত দুয়োখন ৰাজ্যৰ মুখ্যমন্ত্রীৰ আলোচনা হৈছিল । মুখ্যমন্ত্রীৰ পৰামৰ্শ অনুসৰি আমি দুদিনীয়া কাৰ্যসূচীৰে মিজোৰামলৈ গৈছিলো ।"
তেওঁ লগতে কয়,"প্ৰথম দিনা মিজোৰামৰ গৃহমন্ত্রী পৰ্যায়ত আলোচনা হৈছিল । লগত মিজোৰামৰ ৰাজহ মন্ত্রী আৰু জেষ্ঠ বিষয়াসকল আছিল । বিশদ আলোচনা হোৱাৰ পিচত যুটীয়া বিবৃতি দিয়া হৈছিল । আলোচনা যথেষ্ট আশাব্যঞ্জক আছিল আৰু মিজোৰাম চৰকাৰৰ সদিচ্ছা আমি অনুভৱ কৰিছিলো । দ্বিতীয় দিনা অৰ্থাৎ শনিবাৰে আমি মিজোৰামৰ মুখ্যমন্ত্রী লালডুহোমাক লগ ধৰিছিলো । মিজোৰামৰ মুখ্যমন্ত্রীয়ে স্পষ্টভাৱে দীৰ্ঘদিনীয়া এই সীমা সমস্যাটো সমাধান কৰাত গুৰুত্ব আৰোপ কৰিছিল ।"
ইয়াৰোপৰি মন্ত্ৰী বৰাই কয়,"সীমান্তত বসবাস কৰা লোকসকলে যথেষ্ট সমস্যাৰ সন্মূখীন হৈ আহিছে । সময়ে সময়ে দুৰ্ভাগ্যজনক ঘটনা সংঘটিত হৈ আহিছে । যাৰ বাবে মিজোৰাম চৰকাৰে এই সমস্যাৰ সমাধান বিচাৰে । গুৱাহাটীত এখন বৈঠকৰ বাবে আমি মিজোৰামৰ প্ৰতিনিধিক আমন্ত্রণ জনাইছোঁ । সেই বৈঠকত আমি বিশদভাৱে আলোচনা কৰিম । আনহাতে পূৰ্বতে বিভিন্ন পৰ্যায়ত লোৱা সিদ্ধান্তসমূহ বাহাল থাকিব ।"
মন্ত্রী বৰাই লগতে কয়,"মিজোৰামৰ প্ৰতিনিধি দলটো ২৫ জানুৱাৰীৰ পূৰ্বে অহাৰ কথা । অসম-মিজোৰাম সীমান্তৰ দৈৰ্ঘ্য হৈছে ১৬৪.৬ কিলোমিটাৰ আৰু ইয়াৰে বেছি হাইলাকান্দিত আছে । কৰিমগঞ্জ আৰু কাছাৰতো আছে ।"
অসম চৰকাৰৰ সদিচ্ছাৰ কথা সদৰী কৰি মন্ত্রী বৰাই কয়,"সীমা সমস্যাৰ সমাধানৰ বাবে মুখ্যমন্ত্রী হিমন্ত বিশ্ব শৰ্মাই বিশেষ গুৰুত্ব আৰোপ কৰি পদক্ষেপ গ্ৰহণ কৰিছে । মেঘালয়, অৰুণাচল প্ৰদেশ, নাগালেণ্ড আৰু মিজোৰামৰ লগত আলোচনা কৰা হৈছে । পৰ্যায়ক্ৰমে পদক্ষেপ লোৱা হৈছে । আমি আশা কৰিছো যে আমাৰ চৰকাৰৰ পাঁচ বছৰীয়া কাৰ্যকালত চুবুৰীয়া ৰাজ্যৰে থকা সীমা সমস্যাটো সমাধানৰ দিশে আগবাঢ়িব পৰা যাব ।"
