গুৱাহাটী: জলবিদ্যুৎ প্ৰকল্প আৰু তাপ বিদ্যুৎ প্ৰকল্পসমূহৰ ব্যৱহাৰ হ্ৰাস কৰি সৌৰ শক্তিৰ জৰিয়তে বিদ্যুৎশক্তি উৎপাদন কৰাৰ বাবে শেহতীয়াকৈ চৰকাৰে অগ্ৰাধিকাৰ ভিত্তিত বিভিন্ন প্ৰকল্প গ্ৰহণ কৰিছে । এই সন্দৰ্ভত অসমতো চৰকাৰে বিভিন্ন সময়ত সৌৰ শক্তি উৎপাদনৰ ক্ষেত্ৰত গুৰুত্ব দি আহিছে । অসমত সৌৰ শক্তি প্ৰকল্পসমূহ ৰূপায়ণৰ ক্ষেত্ৰত অসম চৰকাৰৰ অসম শক্তি উন্নয়ন সংস্থাই গ্ৰহণ কৰিছে( Assam energy development agency) বিভিন্ন পদক্ষেপ ।
এইক্ষেত্ৰত অসম শক্তি উন্নয়ন সংস্থাই অসমৰ বিভিন্ন ঠাইত কেবাটাও ভাসমান সৌৰ শক্তি প্ৰকল্প স্থাপন কৰিছে । শেহতীয়াকৈ অসম শক্তি উন্নয়ন সংস্থাই লখিমপুৰত অসম চৰকাৰে অমৃত সৰোবৰ প্ৰকল্পৰ অধীনত স্থাপন কৰা পুখুৰীত এই ভাসমান সৌৰ শক্তি প্ৰকল্প স্থাপন কৰিছে । এই প্ৰকল্পৰ সফল ৰূপায়ণৰ পিছত এতিয়া সংস্থাই ৰাজ্যত অসম চৰকাৰৰ ভূমি সংৰক্ষণ বিভাগে নিৰ্মাণ কৰা অমৃত সৰোবৰত অৰ্থাৎ পুখুৰীবোৰত ভাসমান সৌৰ শক্তি প্ৰকল্প স্থাপনৰ পৰিকল্পনা কৰিছে । এই প্ৰসংগত সংস্থাৰ ছিনিয়ৰ চায়েণ্টিফিক অফিচাৰ হেমাংগ ডেকাই কয়- "ইতিমধ্যে অসম চৰকাৰলৈ প্ৰস্তাৱ প্ৰেৰণ কৰা হৈছে । এইক্ষেত্ৰত এতিয়ালৈকে চৰকাৰৰ পৰা কোনো সঁহাৰি পোৱা নাই ।"
কি এই ভাসমান সৌৰ শক্তি প্ৰকল্প:
এই সন্দৰ্ভত হেমাংগ ডেকাই কয়- "এই প্ৰকল্পত ব্যৱহাৰ কৰা সৌৰ পেনেলবোৰ পুখুৰীৰ পানীত স্থাপন কৰা হয় । এইবোৰ পানীত উপঙি থকা অৱস্থাত বিশেষধৰণে স্থাপন কৰা হয় । ইয়াত বেটাৰী সংযোগ কৰা হয় । ইয়াৰ জৰিয়তে উৎপাদিত সৌৰ বিদ্যুৎ পুখুৰীত স্থাপন কৰা Aerator system ৰ লগতে পুখুৰীৰ চৌপাশে স্থাপন কৰা বিজুলী বাতি আৰু অন্যান্য ক্ষেত্ৰত ব্যৱহাৰ কৰা হয় । Aerator system ৰ জড়িয়তে পুখুৰীত মাছৰ বাবে অক্সিজেনৰ পৰিমাণ বৃদ্ধি কৰি মাছৰ উৎপাদন বৃদ্ধি কৰা হয় । ইতিমধ্যে এই প্ৰকল্প কেবাঠাইত স্থাপন কৰি সফল ৰূপায়ন কৰা হৈছে । উদাহৰণ স্বৰূপে দুই বিঘা মাটিৰ পুখুৰীত এই প্ৰকল্প স্থাপনৰ ক্ষেত্ৰত প্ৰায় ১৫ লাখ টকা খৰচ হয় ।"
অসমৰ ক'ত ক'ত আছে এই প্ৰকল্প:
হেমাংগ ডেকাই জনোৱা অনুসৰি ২০১৯ চনৰ ভিতৰত অসমৰ ৯ টা স্থানত এই ভাসমান সৌৰ শক্তি প্ৰকল্প স্থাপন সম্পূৰ্ণ কৰা হৈছে । বৰপেটা হাউলী ৰোডৰ নগৰজাৰত থকা কৃষি বিজ্ঞান কেন্দ্ৰ চৌহদত , হাজোৰ হয়গ্ৰীৱ মাধৱ মন্দিৰত, বঙাইগাঁৱৰ ডাইকাপাৰাত , কামৰূপ মহানগৰ জিলাৰ সোণাপুৰৰ কলং কপিলি এ জি অ'ৰ মুখ্য কাৰ্যালয় চৌহদত, কামৰূপ জিলাৰ ৰঙিয়াৰ গোসাইগাঁৱত, ধুবুৰীৰ হেলাবাৰী গাঁৱত, বিশ্বনাথ জিলাৰ জকাপাৰা গাঁৱত, মৰিগাঁৱৰ জহাৰগাঁৱৰ কৃষি বিজ্ঞান কেন্দ্ৰ চৌহদত আৰু নগাঁৱৰ কলিয়াবৰত ভাসমান সৌৰ প্ৰকল্প স্থাপন কৰা হৈছে । এই ভাসমান সৌৰ প্ৰকল্পবোৰ আটাইবোৰ ১০ কিলোৱাটৰ । প্ৰতিটো প্ৰকল্পই দৈনিক ৩০ ইউনিট বিদ্যুৎ উৎপাদন কৰে । হেমাংগ ডেকাই কয়- "চলিত বছৰৰ চাৰি মাৰ্চত লখিমপুৰ জিলা আয়ুক্তৰ কাৰ্যালয় চৌহদ অমৃত পুখুৰীত ভাসমান সৌৰ প্ৰকল্প স্থাপন কৰা হৈছে । এই প্ৰকল্পটোৰ জৰিয়তে পুখুৰীটোৰ চৌপাশে আঠটা বিজুলী বাতি আৰু ০.৫ horse power ৰ Aerator system স্থাপন কৰা হৈছে । এতিয়ালৈকে এই প্ৰকল্পটোৰ জৰিয়তে ৭২৮০ ইউনিট ( Kwh) বিদ্যুৎ শক্তি উৎপাদন কৰা হৈছে ।"
লগতে পঢ়ক:
