জোনাই, ১১ মে: ৰাজ্য় চৰকাৰে জল জীৱন মিছনৰ জৰিয়তে ৰাইজক পানী যোগান ধৰা বুলি দাবী কৰি আহিলেও প্ৰান্তে প্ৰান্তে চলিছে ব্যাপক অনিয়ম । ৰাজ্য়ৰ আন প্ৰান্তৰ লগতে জোনাইত ইটোৰ পিছত সিটো জল জীৱন মিছন আঁচনি নিৰ্মাণৰ নামত সংঘটিত হৈছে দুৰ্নীতি আৰু অনিয়ম । এই আঁচনিৰ পৰা বিশুদ্ধ পানী লাভ নকৰা ৰাইজে ক্ষোভ উজাৰি কয় যে একাংশ ঠিকাদাৰৰ মইমতালিৰ বাবেই প্ৰহসনত পৰিণত হৈছে জল জীৱন মিছন ।
ধেমাজিত জল জীৱন মিছনৰ নামত আচলতে চলিছে কি ? এই প্ৰশ্ন ৰাইজে উত্থাপন কৰি অহাৰ মাজতেই বিশুদ্ধ খোৱা পানীৰ নামত চিলাপথাৰত ঠিকাদাৰে ৰাইজক খুৱাইছে বিৰবিহ । প্ৰধানমন্ত্ৰী নৰেন্দ্ৰ মোদীৰ সপোনৰ জল জীৱন মিছন আঁচনিৰ গুৰুত্ব প্ৰকৃততে কিমান দূৰ সঠিক ৰূপত বিভাগীয় কৰ্তৃপক্ষ অথবা ঠিকাদাৰে ৰূপায়ন কৰিব পাৰিছে সেই লৈ ৰাইজে প্ৰশ্ন উত্থাপন কৰিছে । ধেমাজি জনস্বাস্থ্য কাৰিকৰী সংমণ্ডলৰ অধীনত চিলাপথাৰৰ পিৎয়াঙ চাপৰিত ৰাইজক বিশুদ্ধ খোৱা পানী যোগানৰ বাবে কোটি টকা খৰচ কৰি জল জীৱন মিছনৰ আঁচনি ৰূপায়ন ঠিকেই হ'ল যদিও ৰাইজে নাপালে পানী । দুই এঘৰলৈ নল গ'ল, কিন্তু নোলাল পানী ।
এই প্ৰসংগত ৰাইজে অভিযোগ উত্থাপন কৰি কয় যে মাহত দুই এবাৰ বিশুদ্ধ পানীৰ নামত ৰাইজক বৰবিহ খুৱাই চৰকাৰী ধন সৰকাই নিলে ঠিকাদাৰে । অভিযোগ অনুসৰি খগেন কোঁচ নামৰ দুৰ্নীতিগ্ৰস্থ ঠিকাদাৰজনে অঞ্চলটোৰ ৫০০ শ ঘৰৰো অধিক লোকক বিশুদ্ধ খোৱা পানী যোগানৰ নামত জল জীৱন মিছনৰ আচনি ৰূপায়ন কৰে যদিও আঁচনিখনৰ পৰা উপকৃত নহ'ল ৰাইজ । বৰ্তমান ধোৱা চাঙত থকা জল জীৱন আঁচনিখনে ঢোকে ঢোকে পানী খুৱাইছে ৰাইজক ।
