তিনিচুকীয়া, ২৮ জুন: তিনিচুকীয়া জিলাৰ চাহ নগৰী ডুমডুমাৰ কিছু নিলগৰ তালাপত স্থাপন কৰা হৈছিল উজনি অসমৰ একমাত্ৰ চাহ শ্ৰমিকসকলৰ সমূহীয়া উন্নয়ন কেন্দ্ৰ ৷ তেজক পানী কৰি উপাৰ্জন কৰা চাহ শ্ৰমিকৰ দৰমহাৰ এটা অংশ কাটি কাটি নিৰ্মাণ কৰা হৈছিল চাহ শ্ৰমিকসকলৰ বাবে সামুহিক উন্নয়ন কেন্দ্ৰটো । চাহ শ্ৰমিকসকলক স্বনিৰ্ভৰশীল কৰি তুলিবৰ বাবে ১৯৬৫ চনতে কাটিং, টেইলাৰিং, এম্বদাৰী বিভাগৰ প্ৰশিক্ষণ দিয়াৰ উদ্দেশ্যৰে স্থাপন কৰা হৈছিল কেন্দ্ৰটো ।
ৰাজ্যৰ শ্ৰম বিভাগৰ অধীনত আৰু চাহ শ্ৰমিক কল্যাণ পৰিষদৰ নিয়ন্ত্ৰণত সমগ্ৰ ৰাজ্য ১৮ টা এনে কেন্দ্ৰ আছে । কিন্তু যুগ যুগ ধৰি ধৰি আওপুৰণি প্ৰশিক্ষণ ব্যৱস্থাৰে চলি থকাৰ বাবে কেন্দ্ৰসমূহত প্ৰশিক্ষণ ল'বলৈ কোনো আগ্ৰহী নহয় বুলি উত্থাপন হৈছে অভিযোগ । ইয়াৰোপৰি চাহ শ্ৰমিকৰ উন্নয়নৰ নামত চাহ শ্ৰমিক কল্যাণ পৰিষদে ভয়ংকৰ লুণ্ঠনৰ চলোৱাৰ অভিযোগ কৰে চাহ শ্ৰমিকসকলে ।
যি সময়ত ৰাজ্য চৰকাৰে চাহ শ্ৰমিকৰ নামত মোকোলাই দিয়া পুঁজিৰে শ্ৰমিকৰ উন্নয়ন হৈ আছে বুলি নিশ্চিন্ত হৈ বহি আছে । সেই সময়তে চাহ শ্ৰমিক কল্যাণ পৰিষদৰ আয়ুক্তজনে বিদ্যুৎ সংযোগ নথকা প্ৰশিক্ষণ কেন্দ্ৰত কম্পিউটাৰ যোগান দিয়া দেখুওৱাই লুণ্ঠন চলোৱাৰ অভিযোগ উত্থাপন হৈছে ।
তালাপত অৱস্থিত অসম চৰকাৰৰ নিয়ন্ত্ৰণাধীন চাহ মজদুৰসকলৰ সমূহীয়া উন্নয়ন কেন্দ্ৰত অসম চাহ জনজাতি ছাত্ৰ সন্থাৰ এটা সঁজাতি দল উপস্থিত হৈ কেন্দ্ৰটো পৰিদৰ্শন কৰি কম্পিউটাৰ শিক্ষা প্ৰদানৰ নামত লুণ্ঠনৰ বাহিৰে একো হোৱা নাই বুলি ক্ষোভ উজাৰে ।
