হাফলং, 2 মে’ : আকৌ 2022 চনৰ অৱস্থা হ’ব নেকি ডিমা হাছাওত ? আকৌ হেৰুৱাব লাগিব নেকি আপোন মানুহবোৰক, হেৰুৱাব লাগিব নেকি আপোন ঘৰখনক ! পুনৰ ডিমা হাছাওবাসীৰ মনত ভয় আৰু আশংকাই দেখা দিছে ৷ কিয়নো বিগত কেবাদিন ধৰি পাহাৰীয়া জিলাখনত হৈ আছে প্ৰবল বৃষ্টিপাত ৷ যাৰ ফলত ব্যাহত হৈ পৰিছে ডিমা হাছাওবাসীৰ স্বাভাৱিক জন-জীৱন ৷
ইপিনে প্ৰতিকূল বতৰৰ বাবে ডিমা হাছাও জিলাৰ দুৰ্যোগ প্ৰশমন বিভাগৰ অধ্যক্ষ তথা ডিমা হাছাও জিলাৰ জিলা আয়ুক্ত সীমান্ত কুমাৰ দাসে জাৰি কৰিছে এক নিৰ্দেশনা ৷ এই নিৰ্দেশত উল্লেখ কৰা মতে, ডিমা হাছাও জিলাৰ সকলো শিক্ষা প্ৰতিষ্ঠান বৃহস্পতিবাৰে বন্ধ ঘোষণা কৰিছে জিলা প্ৰশাসন আৰু উত্তৰ কাছাৰ পাৰ্বত্য স্বায়ত্তশাসিত পৰিষদে ।
শেহতীয়া খবৰ অনুসৰি, যোৱা নিশা হোৱা প্ৰচণ্ড বৰষুণৰ ফলত জিলাখনত ব্যাপক ক্ষয়ক্ষতি হৈছে । গুৱাহাটী বতৰ বিজ্ঞান কেন্দ্ৰয়ো ডিমা হাছাও জিলাত প্ৰচণ্ড ধুমুহা বজ্ৰপাত আৰু বৰষুণ সন্দৰ্ভত সতৰ্কতা জাৰি কৰিছে । ইয়াৰ বাবে 2 মে’ৰ পৰা 4 মে’লৈকে জিলাখনৰ সকলো শিক্ষা প্ৰতিষ্ঠান বন্ধ ঘোষণা কৰিছে প্ৰশাসনে ।
ইফালে জিলা আয়ুক্ত সীমান্ত কুমাৰ দাসে এই নিৰ্দেশ জাৰি কৰি তিনিদিনৰ বাবে পাহাৰীয়া জিলাৰ সকলো শিক্ষা প্ৰতিষ্ঠান বন্ধ ঘোষণা কৰাৰ উপৰিও কোনো মানুহক বিনা কামত বাহিৰলৈ ওলাই নাযাবলৈ আহ্বান জনাইছে । জিলাখনত অভাৱনীয় পৰিস্থিতৰ সন্মুখীন হ’লে লগে লগে জিলা দুৰ্যোগ প্ৰশমন বিভাগক জনাবলৈ আহ্বান জনোৱা হৈছে ৷ ইয়াৰ বাবে হেল্প লাইন নম্বৰো জাৰি কৰিছে জিলা প্ৰশাসনে ।
ইপিনে 27 নম্বৰ ৰাষ্ট্ৰীয় ঘাইপথৰ জাতিংগা হাৰেংজাওলৈকে বিয়লি চাৰি বজালৈকে যানবাহন চলাচলৰ কৰাত নিষেধাজ্ঞা আৰোপ কৰা হৈছে । প্ৰচণ্ড বৰষুণৰ বাবেই এই সময়ত যানবাহন চলাচল সম্পূৰ্ণ বন্ধ থাকিব বুলি উল্লেখ কৰিছে প্ৰশাসনে । প্ৰচণ্ড বৰষুণৰ বাবে হোৱা ভূমিস্খলনৰ ফলত লামডিং-শিলচৰ পাহাৰ লাইনত ৰে’ল চলাচলো ইতিমধ্যে বন্ধ হৈ পৰিছে বুলি জানিব পৰা গৈছে ।
উল্লেখ্য যে, 2022 চনতো এনে নেৰানেপেৰা বৰষুণৰ বাবে ডিমা হাছাও জিলাখন প্ৰাকৃতিক দুৰ্যোগৰ কবলত পৰিছিল । যাৰ ফলত বৃহৎ ক্ষতি হৈছিল জিলাখনৰ ৷ কি স্থলপথ, কি ৰে’লপথ ৷ মুহূৰ্ততে সকলো ধ্বংস হৈ গৈছিল ৷ ডিমা হাছাওৰ অপৰূপ সৌন্দৰ্যৰ সেই ম্লান পৰা দৃশ্যই সকলোকে কন্দোৱাইছিল ৷ দুটা বছৰ পূৰ্বে সংঘটিত হোৱা সেই ঘটনা পুনৰাবৃত্তি হোৱাৰ আশংকাত শংকিত হৈ পৰিছে সকলো ৷
ইপিনে ভূমিস্খলনৰ ফলত মেঘালয়ৰ ৰাষ্ট্ৰীয় ঘাইপথ বন্ধ থকাৰ বাবে ত্ৰিপুৰাৰ পৰা এখন নৈশ বাছ ডিমা হাছাও জিলাৰ 27 নম্বৰ ৰাষ্ট্ৰীয় ঘাইপথ হৈ গুৱাহাটী অভিমুখে গৈ আছিল ৷ তেনেতে প্ৰতিকূল বতৰৰ বাবেই বুধবাৰে নিশা প্ৰায় 12 বজাত ডিমা হাছাও জিলাৰ হাৰেংগাজাও আৰু ডিটেকছৰাৰ মধ্যৱৰ্তী স্থানত দুৰ্ঘটনাত পতিত হয় বাহনখন ৷ বাহনখনৰ নম্বৰ হৈছে AS01NC 0243 ৷
দুৰ্ঘটনাত পতিত হোৱা বাছখনৰ এগৰাকী যাত্ৰী নিহত হোৱাৰ উপৰি বহু যাত্ৰী গুৰুতৰভাৱে আহত হৈছে বুলি জানিব পৰা গৈছে । শেহতীয়াকৈ লাভ কৰা তথ্য অনুসৰি, নিহত লোকজন ত্ৰিপুৰাৰ মহাৰাণী কামালপুৰৰ বাসিন্দা দেৱৰাজ দেৱবাৰ্মা (33) ৷
লগতে পঢ়ক : ৰাজ্য়ৰ বিভিন্ন প্ৰান্তত ধুমুহাত বিস্তৰ ক্ষতিসাধন - Heavy Storm In Assam
