যোৰহাট, 18 জুলাই : ৰাজ্যত পুনৰ আৰম্ভ হৈছে 'কা' বিৰোধী প্ৰতিবাদ ৷ নাগৰিকত্ব সংশোধনী আইন চমুকৈ 'কা'ৰ বিৰুদ্ধে পুনৰ প্ৰতিবাদত নামিল অসম জাতীয়তাবাদী যুৱ ছাত্ৰ পৰিষদ ৷ জিলাই জিলাই আজি জাতীয়তাবাদী যুৱ ছাত্ৰ পৰিষদে প্ৰতিবাদ কৰাৰ সমান্তৰালভাৱে সংগঠনটোৰ যোৰহাট জিলা সমিতিয়েও জিলা আয়ুক্ত কাৰ্যালয়ৰ সন্মুখত 'কা'ৰ বিৰুদ্ধে অৱস্থান ধৰ্মঘট কাৰ্যসূচী ৰূপায়ণ কৰে ৷ প্ৰতিবাদস্থলীৰ পৰা অসম চৰকাৰে এই আইন সন্দৰ্ভত জাৰি কৰা জাননীৰ প্ৰতিলিপি সন্দৰ্ভত তীব্ৰ প্ৰতিক্ৰিয়া প্ৰকাশ কৰাৰ লগতে অসমৰ পৰা 'কা' বাতিল কৰিবলৈ কেন্দ্ৰ আৰু ৰাজ্য চৰকাৰক দাবী জনায় সংগঠনটোৰ নেতৃত্বই ৷
আজি জিলা আয়ুক্ত কাৰ্যালয়ৰ সন্মুখত অৱস্থান ধৰ্মঘট কাৰ্যসূচীত অংশগ্ৰহণ কৰি যুৱ ছাত্ৰ পৰিষদৰ কেন্দ্ৰীয় সমিতিৰ সহকাৰী সাধাৰণ সম্পাদক শিৱ কলিতাই কয় যে অসমীয়াৰ অস্তিত্ব ৰক্ষাৰ বাবে অসম আন্দোলন আৰম্ভ হৈছিল ৷ ফলশ্ৰুতিত অসম চুক্তি ৰূপায়ণ হৈছিল ৷ কিন্তু কালক্ৰমত অসমৰ পৰা বিদেশী বিতাড়িত হোৱাৰ পৰিৱৰ্তে 'কা'ৰ জৰিয়তে অসমত বিদেশীক বৰপীৰা পাৰি দিয়া হৈছে ৷
লগতে পঢ়ক : কা-ৰ বিৰুদ্ধে তিনিচুকীয়াৰ ৰাজপথত জাতীয়তাবাদী যুৱ-ছাত্ৰ পৰিষদৰ গৰ্জন - Protest Against CAA
যুৱ ছাত্ৰ পৰিষদৰ নেতাজনে লগতে কয় যে, পূৰ্বতে অসমত অসমীয়া ভাষা কোৱা লোকৰ সংখ্যা 60 শতাংশ আছিল ৷ কিন্তু সেয়া বৰ্তমান বহু পৰিমাণে হ্ৰাস পাই আহিছে আৰু অসমত অসমীয়া ভাষা কোৱা লোকৰ সংখ্যা হ্ৰাস হোৱাৰ লগতে বাঙালী ভাষা কোৱা লোকৰ সংখ্যা দ্ৰুতগতিত বৃদ্ধি পাইছে ৷ সেয়েহে অসমৰ পৰা 'কা' বাতিল নকৰিলে অসমতে অসমীয়া ভগনীয়া হ'ব বুলি কয় তেওঁ ৷ লগতে শীঘ্ৰেই অসমৰ পৰা 'কা' বাতিল কৰিবলৈ কেন্দ্ৰ আৰু ৰাজ্য চৰকাৰক দাবী জনায় যুৱ ছাত্ৰ পৰিষদে ৷ অন্যথা পুনৰ তীব্ৰ গণতান্ত্ৰিক আন্দোলনৰ কাৰ্যসূচী গ্ৰহণ কৰাৰ হুংকাৰ প্ৰদান কৰে সংগঠনটোৱে ৷
লগতে পঢ়ক : কা বাতিলৰ দাবীত উত্তাল হৈ পৰিল লখিমপুৰ-ধেমাজি - Protest Against CAA
