গুৱাহাটী: পৰীক্ষা দিলেও ৰাজ্যৰ লাখ লাখ পৰীক্ষাৰ্থীয়ে চাকৰিৰ বাবে অপেক্ষা কৰিব লাগিব ছমাহ । এবছৰৰো অধিক সময় ৩৯ লাখ মহিলাই লাখপতি হ’বলৈ অপেক্ষা কৰি ভাগৰি পৰাৰ পাছত এইবাৰ আশাত বন্দী হৈ থাকিব লগীয়া হৈছে প্রায় ৩৫ লাখ নিবনুৱা যুৱক-যুৱতীয়ে ।
লক্ষণীয় বিষয় যে বাইদেউসকল লাখপতি কেতিয়াকৈ হ'ব সেই কথাৰ উত্তৰ চৰকাৰে এতিয়ালৈকে দিয়া নাই । তেওঁলোক এতিয়া আশাত বন্দী হৈ আছে । এইবাৰ চাকৰিৰ বাবে পৰীক্ষা দিয়া নিবনুৱাসকলে নিযুক্তিৰ বাবে আৰু ছমাহ অপেক্ষা কৰিব লাগিব । অৱশ্যে অপেক্ষা কৰিলেও এইক্ষেত্রত নিশ্চয়তা আছে ।
ছেপ্টেম্বৰ আৰু অক্টোবৰ মাহত তৃতীয় আৰু চতুৰ্থ বৰ্গৰ ১২,৬০০ পদৰ নিযুক্তিৰ বাবে পৰীক্ষাত বহাৰ পাছতো অহা ১০ মে'লৈ অপেক্ষে কৰিব লাগিব লাখ লাখ পৰীক্ষাৰ্থীয়ে । কাৰণ ১০ মে'ত ৰাজ্য চৰকাৰৰ চতুৰ্থ বৰ্ষপূৰ্তি । সেই দিনটোতহে চৰকাৰে বিতৰণ কৰিব নিযুক্তি পত্র । অর্থাৎ পৰীক্ষাত বহাৰ পৰা নিযুক্তি পাবলৈ তেওঁলোকে আৰু ছমাহলৈ ৰ'ব লাগিব ।
১০ মে'ৰ ভিতৰতহে মাধ্যমিক শিক্ষকসকলৰ নিযুক্তি
ইফালে, যোৱা বছৰৰ ডিচেম্বৰত বিজ্ঞাপন প্ৰকাশ হোৱাৰ পাছতে প্ৰাথমিক পৰ্যায়ত ৫,৫৫০টা পদৰ বাবে আৱেদন জনোৱাৰ ১০ মাহ উকলি যোৱাৰ মুহূৰ্ততো প্ৰাৰ্থীসকলে নিযুক্তি লাভ কৰা নাই । আনহাতে, শিক্ষামন্ত্ৰী ডাঃ ৰণোজ পেগুৱে ঘোষণা কৰিছে যে মাধ্যমিক পৰ্যায়ত ৯,৭১৭ পদত নিযুক্তি হ'ব । কিন্তু ১০ মে'ৰ ভিতৰতহে মাধ্যমিক শিক্ষকসকলৰ নিযুক্তি হ'ব ।
২০২৬ ৰ নিৰ্বাচনৰ প্ৰাকক্ষণত নিযুক্তিৰ সংখ্যা ডেৰ লাখৰ ঘৰ অতিক্ৰম কৰাৰ বাবে যে চতুর্থ বর্ষপূৰ্তিৰ দিনটোলৈ নিযুক্তি প্ৰক্ৰিয়া ৰখাই থোৱা হৈছে সেই কথা স্পষ্ট হৈ পৰিছে । ২০২৬ৰ বিধানসভা নিৰ্বাচনৰ প্ৰতি লক্ষ্য ৰাখি চৰকাৰে ঢাক-ঢোল বজাই নিযুক্তি পত্র বিতৰণ কৰিব । মুখ্যমন্ত্ৰীয়ে ইতিমধ্যে ঘোষণা কৰিছে যে বর্ষপূৰ্তিৰ দিনটোত একেদিনাই ৩৫-৪০ হাজাৰ নিযুক্তি দিয়া হ'ব ।
আঢ়ৈ বছৰত ১,২৫,০৩০ নিযুক্তি
উল্লেখ্য যে বর্তমানৰ ৰাজ্য চৰকাৰখনে দায়িত্ব লাভ কৰাৰ পাছতে কেবিনেটত এটা বছৰত এক লাখ চৰকাৰী চাকৰিত নিযুক্তি দিয়াৰ সিদ্ধান্তত অনুমোদন জনাইছিল । এবছৰত এক লাখক নিযুক্তি দিয়া সম্ভৱ হোৱা নাছিল যদিও যোৱা ৮ অক্টোবৰত অৰ্থাৎ আঢ়ৈ বছৰত উচ্চ শিক্ষা, ৰাজ্যিক শিক্ষা গৱেষণা আৰু প্ৰশিক্ষণ পৰিষদ, স্বাস্থ্য আৰু পৰিয়াল কল্যাণ বিভাগৰ কেইবাটাও পদত নিযুক্তি দিয়াৰ পাছত ৰাজ্য চৰকাৰে দিয়া নিযুক্তিৰ সংখ্যা হৈছেগৈ ১,২৫,০৩০টা ।
ৰাজ্যত যে নিবনুৱা সমস্যাই ভয়াৱহ ৰূপ ধাৰণ কৰিছে সেই কথা এ ডি আৰ ইৰ তৃতীয় আৰু চতুৰ্থ বৰ্গৰ পৰীক্ষাকেইটাই উদঙাই দিছে । পৰীক্ষাটোত দুয়োটা স্তৰত মুঠ চাকৰি আছে ১২,৬০০টা, কিন্তু এই পদসমূহৰ বাবে অনুষ্ঠিত পৰীক্ষাত প্ৰায় ৩৫ লাখ চাকৰি প্ৰাৰ্থী অৱতীৰ্ণ হোৱাটোৱে স্পষ্ট কৰিছে নিবনুৱা সমস্যাৰ ভয়াৱহতাৰ ছবি ।
