যোৰহাট: যোৰহাটৰ এখন বিদ্যালয়ত ঘূৰি ফুৰিছে অসম গৌৰৱ এশিঙীয়া গঁড় । আগে আগে গঁড় আৰু পাছে পাছে এজাক কণ কণ ছাত্ৰ-ছাত্ৰী । আচলতে এইটো প্ৰকৃত গঁড় নহয়, এয়া প্ৰতীকী ৰূপত থকা গঁড়হে ।
শিশু দিৱস উপলক্ষে যোৰহাটৰ মকতব বিদ্যালয়ত প্ৰদৰ্শন কৰা হয় এই গঁড়টো । যোৰহাটৰ বঙাল পুখুৰীৰ মানসজ্যোতি বৰুৱা নামৰ ভাস্কৰ্য শিল্পীজনে নিৰ্মাণ কৰা উলিয়াইছিল গঁড়টো ।
প্ৰতীকী ৰূপত এইটো গঁড় ছাত্ৰ-ছাত্ৰীসকলৰ মাজত প্ৰদৰ্শন কৰা হৈছে । ছাত্ৰ-ছাত্ৰীসকলৰ মনত যাতে অসম গৌৰৱ এই গঁড়ৰ প্ৰতি মৰম চেনেহ, গঁড়ৰ সুৰক্ষা আদি ভাব জাগ্ৰত হয় ৷ লগতে বহু ছাত্র-ছাত্ৰীয়ে আঁতৰৰ পৰাই গঁড় দেখিছে যদিও ওচৰ পৰা দেখা পোৱা নাই । সেই মহান উদ্দেশ্য আগত ৰাখি এইদৰে প্ৰতীকী ৰূপত প্ৰদৰ্শন কৰা হৈছে । আনহাতে কাষতেই অসম গৌৰৱ এশিঙীয়া গঁড়টো পাই ছাত্ৰ-ছাত্ৰীসকল আনন্দত আত্মহাৰা হৈ পৰাৰ লগতে গঁড়টোৰ সৈতে আনন্দ-ধেমালি কৰা পৰিলক্ষিত হয় ।
আজি শিশু দিৱস আৰু শিশু দিৱসৰ দিনা কণ কণ শিক্ষাৰ্থীসকলৰ মাজত জীৱ-জন্তুৰ প্ৰতি মৰম-চেনেহ জাগ্ৰত হয় আৰু এশিঙীয়া গঁড়ৰ প্ৰতি হৈ থকা অত্যাচাৰ কিদৰে নোহোৱা কৰিব পাৰি তাৰ বাবে কণ কণ শিক্ষাৰ্থীসকলৰ মাজত সৰুৰে পৰাই সজাগতা সৃষ্টি কৰা কাৰ্যসূচীৰ লগতে বিভিন্ন প্ৰতিযোগিতা আয়োজন কৰা হয় । উল্লেখ্য যোৰহাটৰ ভাস্কৰ্য শিল্পী মানস জ্যোতি বৰুৱা নামৰ শিল্পীগৰাকীয়ে বিভিন্ন ভাস্কৰ্য নিৰ্মাণ কৰি বিভিন্ন ফলপ্ৰসূ কাৰ্যসূচী গ্ৰহণ কৰি আহিছে । শিল্পীগৰাকীৰ প্ৰচেষ্টাক শলাগ লৈছে সকলোৱে ।
