সৰুপথাৰ,১ মাৰ্চ: অসম-নগালেণ্ড সীমান্তৰ চুঙাজান মাজগাঁও পঞ্চায়তৰ অন্তৰ্গত নৱমিলনপুৰ গাঁৱৰ নিবাসী বুবু গগৈ । তেখেতৰ পৰিয়ালৰ জীৱন গাঁথা শুনিলে আপোনাৰো দুখ লাগিব । ৬০ উৰ্ধৰ বুবু গগৈ আৰু তেওঁৰ একমাত্ৰ পুত্ৰ দুয়োজনেই প্ৰায় অন্ধ বুলিব পাৰি । দুয়োজনেই এটা এটা চকুৰে সামান্যহে দেখে । তেখেতৰ পত্নীও ৰোগত আক্ৰান্ত হৈ বিচনাত পৰি আছে ।
সুস্থ বুলিবলৈ ঘৰখনত কেৱল বোৱাৰী আৰু কণমানি নাতিকেইটা । বুবু গগৈৰ পৰিয়ালটোত খেতি কৰিবলৈয়ো কোনো সম্বল নাই। ৰেচন কাৰ্ডৰ চাউলকেইটাৰে যেনে তেনে পেট ভৰে পৰিয়ালটোৰ । পুত্ৰই চকুৰে নেদেখে যদিও বেলেগৰ ঘৰত মাজে সময়ে তেনেকৈয়ে কাম-বন কৰি দুই এপইচা উলিয়ায় । তেনেকৈয়ে পৰিয়ালটোৱে যাপন কৰিছে জীৱন।
এফালে যদি সবকা সাথ সবকা বিকাশ । আনফালে আকৌ দৰিদ্ৰতাই কোঙা কৰা চুঙাজানৰ এটা দুৰ্ভগীয়া পৰিয়াল । ৰাজ্যৰ জনসাধাৰণে লাভ কৰিছে বিভিন্ন ধৰণৰ চৰকাৰী আঁচনি । আঢ্যবন্ত লোকেও লাভ কৰে আৰ্থিক সাহাৰ্যৰ সুবিধা । পিছে এই দুৰ্ভগীয়া পৰিয়ালটোৰ পানীত হাঁহ নচৰা অৱস্থাৰ পিছতো কেৱল ৰেচন কাৰ্ডৰ বাদে অন্যান্য চৰকাৰী আঁচনিসমূহে এতিয়ালৈকে ঢুকি পোৱা নাই ।
বুবু গগৈয়ে জনোৱা অনুসৰি তেওঁ পঞ্চায়তৰ লোকক বহুবাৰ কাকুতি-মিনতি কৰাৰ পিছতো লাভ কৰা নাই সা-সুবিধা । পৰিয়ালটোৰ নাই চৰকাৰী ঘৰ, নাই চৰকাৰী শৌচালয় । আনকি পত্নীৰ নামত নামত এতিয়ালৈকে নাই অৰুণোদয় আঁচনি, লাভ কৰা নাই বৃদ্ধ পেন্সন । চৰকাৰীভাৱে বিকলাংগ ব্যক্তিৰ প্ৰাপ্য সুবিধাসমূহ পোৱা হ'লেও পৰিয়ালটোৱে কিছু সকাহ পালে হয় । পিছে কোনে শুনিব এইসকল দুৰ্ভগীয়া লোকৰ কথা । চৰকাৰী প্ৰতিনিধিসকলৰ দৃষ্টগোচৰ হ'ব নে এনেধৰণৰ বিষয়সমূহ ?
লগতে পঢ়ক: জোনাইৰ পবা সংৰক্ষিত বনাঞ্চলত হস্তী গণনা কাৰ্যসূচী
