যোৰহাট : "অগপত কোনো বিসম্বাদ নাই, দলীয় মঞ্চত কথা কোৱা সকলোৰে অধিকাৰ আছে ।" অগপৰ একাংশ নেতাই বিসম্বাদত লিপ্ত হোৱা সন্দৰ্ভত সাংবাদিকৰ প্ৰশ্নৰ উত্তৰত এই মন্তব্য কৰে অসম গণ পৰিষদৰ সভাপতি তথা কৃষি মন্ত্ৰী অতুল বৰাই । অসম ছাত্ৰ পৰিষদৰ ষষ্ঠ বাৰ্ষিক কেন্দ্ৰীয় প্ৰতিষ্ঠা দিৱসত এই গুৰুত্বপূৰ্ণ মন্তব্য কৰে দলৰ সভাপতিগৰাকীয়ে । ইফালে উপ-নিৰ্বাচনৰ ফলাফলৰ ভৱিষ্যদ্বাণী দি অতুল বৰাই কয় যে উপ-নিৰ্বাচনত পাঁচোটা সমষ্টিতে মিত্ৰজোটৰ প্ৰাৰ্থী জয়ী হ'ব ।
অসম ছাত্ৰ পৰিষদৰ প্ৰতিষ্ঠা দিৱস
উল্লেখ্য যে যোৰহাট জিলা ছাত্ৰ পৰিষদ আৰু গোলাঘাট জিলা ছাত্র পৰিষদৰ উদ্যোগত যোৰহাটৰ অগপ জিলা কাৰ্যালয়ৰ বাকৰিত অসম ছাত্ৰ পৰিষদৰ ষষ্ঠ বাৰ্ষিক কেন্দ্ৰীয় প্ৰতিষ্ঠা দিৱস অনুষ্ঠিত কৰা হয় । ৰাজ্যৰ বিভিন্ন প্ৰান্তৰ পৰা ছাত্র কৰ্মীসকলে উক্ত প্ৰতিষ্ঠা দিৱসত অংশগ্ৰহণ কৰে । উক্ত কাৰ্যসূচীত অংশগ্ৰহণ কৰি অগপৰ সভাপতি তথা কৃষি মন্ত্ৰী অতুল বৰাই কয়,"অগপ দলৰ বিৰুদ্ধে এটা পুৰণি অভিযোগ আছিল যে এই দলে নতুনক আঁকোৱালি নলয় । কিন্তু সেই অভিযোগ আজি অগপত নাই, কাৰণ অগপলৈ নতুন প্ৰজন্মৰ আগমন ঘটিছে । নতুন প্ৰজন্ম তথা যুৱ প্ৰজন্মৰ বাবে অগপৰ সকলো দুৱাৰ-খিৰিকী খোলা আছে ।"
তেওঁ লগতে কয় যে কম সময়ৰ ভিতৰতে অসম ছাত্র পৰিষদে নিজৰ সাংগঠনিক ভেটি সুদৃঢ় কৰি তোলাৰ লগতে বিশ্ববিদ্যালয় আৰু মহাবিদ্যালয় ছাত্ৰ একতা সভাত নিজৰ আধিপত্য বিস্তাৰ কৰিবলৈ সক্ষম হৈছে ।
পঞ্চায়ত নিৰ্বাচনক লৈ অতুল বৰাৰ ভৱিষ্যদ্বাণী
পঞ্চায়ত নিৰ্বাচন সন্দৰ্ভত মন্ত্ৰী অতুল বৰাই কয় যে পঞ্চায়ত নিৰ্বাচনৰ বাবে অগপ দলে ২০২৪ৰ আৰম্ভণিৰ পৰাই ৰণকৌশল ৰচনা কৰিছিল । সমগ্ৰ অসমত ব্যাপক সদস্যভৰ্তি অভিযানো চলাইছে । তেওঁৰ মতে অগপৰ শিপাডাল ৰাজ্যৰ ইমূৰৰ পৰা সিমূৰলৈ সিচঁৰিত হৈ আছে । পঞ্চায়ত নিৰ্বাচনৰ বাবে অগপই বিধানসভা পৰ্যায়ত বিভিন্ন কৰ্মশালা আয়োজন কৰিছে আৰু তৃণমূল কৰ্মীসকলক শক্তিশালী কৰা হৈছে বুলি তেওঁ দাবী কৰে ।
যোৰহাটত অনুষ্ঠিত অসম ছাত্ৰ পৰিষদৰ ষষ্ঠ বাৰ্ষিক কেন্দ্ৰীয় প্ৰতিষ্ঠা দিৱসত অগপৰ জেষ্ঠ নেতা ভৱেন্দ্ৰ নাথ ভৰালী, অপূৰ্ব কুমাৰ ভট্টাচাৰ্যসহ দলৰ বিভিন্ন নেতা-কৰ্মীয়ে অংশগ্ৰহণ কৰে ।
লগতে পঢ়ক :২০২৬ ত নিৰ্বাচন খেলিব সত্যব্ৰত কলিতাই; কমলপুৰ আসন এৰিবলৈ ক’লে বিজেপিক
