মঙলদৈ, ২৬ ছেপ্টেম্বৰ: দৰং জিলাৰ ছিপাঝাৰৰ পদুম পুখুৰী উচ্চ মাধ্যমিক বিদ্যালয়ৰ ছাত্ৰৰ মৃত্যুৰ ঘটনাৰ পিচতেই প্ৰধান শিক্ষয়িত্ৰীসহ ৯ গৰাকী শিক্ষক-শিক্ষয়ত্ৰী আৰু ৩ গৰাকী চতুর্থ বৰ্গৰ কৰ্মচাৰীক শাস্তিমূলক বদলি ৷ কৰ্তব্যত গাফিলতিৰ অভিযোগত বদলি কৰা হৈছে তেওঁলোকক ৷ শিক্ষামন্ত্ৰী ডাঃ ৰণোজ পেগুৱে X হেণ্ডেলত এটা পোষ্টযোগে সদৰী কৰিছে এইকথা ৷
নিজৰ X হেণ্ডেলত এটা পোষ্টত মন্ত্ৰী পেগুৱে লিখিছে- ‘‘যোৱা ২৩/০৯/২০২৪ তাৰিখে দৰং জিলাৰ পদুমপুখুৰী হাইস্কুলত এজন ছাত্ৰই কৰুণভাৱে প্ৰাণ হেৰুওৱা ঘটনাৰ প্ৰতি সঁহাৰি জনাই ভাৰপ্ৰাপ্ত অধ্যক্ষকে ধৰি ১২ জন কৰ্মচাৰীক তেওঁলোকৰ গাফিলতিৰ বাবে অন্য বিদ্যালয়লৈ বদলি কৰা হৈছে । পদুমপুখুৰী হাইস্কুলৰ দায়িত্ব অৰ্পণ কৰা হৈছে বুঢ়ীনগৰ উচ্চতৰ মাধ্যমিক বিদ্যালয়ৰ অধ্যক্ষক । আৰক্ষীৰ তদন্ত চলি থকাৰ উপৰিও বিদ্যালয় শিক্ষা বিভাগে ছাত্ৰজনৰ মৃত্যুৰ পৰিস্থিতিৰ তদন্ত আৰম্ভ কৰিছে ।’’
In response to the tragic incident on 23/09/2024 at Padumpukhuri High School in Darrang district, where a student tragically lost his life, 12 staff members, including the in-charge Principal, have been transferred to other schools due to their negligence. The Principal of… pic.twitter.com/cuh8Zog6O6
— Ranoj Pegu (@ranojpeguassam) September 25, 2024
উল্লেখ্য যে যোৱা সোমবাৰে বিদ্যালয়খনৰ শ্ৰেণীকোঠাত দশম শ্ৰেণীৰ ছাত্ৰৰ আক্রমণত প্ৰাণ গৈছিল নৱম শ্ৰেণীৰ ছাত্ৰ ভৱেশ ডেকাৰ । ঘটনা সংঘটিত হোৱা দুটা দিনৰ পিছতহে বিদ্যালয়খনত উপস্থিত হৈছিল বিদ্যালয়সমূহৰ পৰিদৰ্শক ইয়াচমিনাৰা বেগম । যাৰ বাবে ৰাইজে জবাবদিহি কৰিছিল বিষয়াগৰাকীক । অৱশেষত শিক্ষা বিষয়াগৰাকীয়ে সেইসকল শিক্ষক-কৰ্মচাৰীৰ ওপৰত শাস্তিমূলক ব্যৱস্থা গ্ৰহণ কৰে ।
ইপিনে গাঁওবাসীয়ে এইসকল শিক্ষক-কৰ্মচাৰীক চাকৰিৰ পৰা নিলম্বিত কৰিবলৈ জনাইছিল দাবী । কিন্তু দৰং জিলাৰ বিদ্যালয়সমূহৰ পৰিদৰ্শকগৰাকীয়ে শাস্তি মূলক বদলি কৰিয়েই নিজৰ দায়িত্ব সামৰাৰ অভিযোগ তুলি ৰাইজ ক্ষোভিত হৈ পৰিছে ৷ বিদ্যালয়ৰ ভিতৰত এইদৰে ছাত্ৰৰ প্ৰহাৰত আন এজন ছাত্ৰই অকাল মৃত্যুক সাৱটি ল’বলগা হোৱা ঘটনাই সমগ্ৰ ৰাজ্যতে চাঞ্চল্যৰ সৃষ্টি কৰিছে ৷ তাৰোপৰি প্ৰশ্ন উত্থাপন হৈছে ছাত্ৰসমাজৰ মাজত মূল্যবোধৰ বিষয়ক লৈ ৷
