স্প’ৰ্টছ ডেস্ক, ৮ জুলাই: ৰোহিত শৰ্মাৰ নেতৃত্বত ভাৰতীয় ক্ৰিকেট দলৰ টি-২০ বিশ্বকাপ জয়ৰ পিচত ভাৰতীয় ক্ৰিকেট নিয়ন্ত্ৰণ ব’ৰ্ডে বিশ্ব চেম্পিয়নসকলৰ বাবে ১২৫ কোটি টকাৰ পুৰস্কাৰ ঘোষণা কৰে ৷ বি চি চি আইৰ এই ঘোষণাৰ পাচৰে পৰা সকলোৰে মাজত জল্পনা-কল্পনা চলিছিল, কোনজন খেলুৱৈয়ে নগদ কিমান ধন লাভ কৰিব তথা কিমান টকা দিয়া হ’ব যশস্বী জয়ছোৱাল, সঞ্জু চেমছন আৰু যুজবেন্দ্ৰ চাহালক, যি তিনিগৰাকী খেলুৱৈয়ে এখনো মেচত অৱৰ্তীণ হ’বলৈ সক্ষম নহ’ল ৷
এক প্ৰতিবেদন অনুসৰি ১২৫ কোটি টকাৰ ভিতৰত ১৫ গৰাকী খেলুৱৈয়ে লাভ কৰিব ৫ কোটি টকাকৈ । এনে পৰিস্থিতিত বেঞ্চত বহি থকা তিনিজন খেলুৱৈক খেলা খেলুৱৈৰ সমান ধন বিতৰণ কৰা হ’ব সেয়া স্পষ্ট হৈ পৰিছে । উল্লেখ্য যে, প্ৰতিযোগিতাখনৰ পূৰ্বে আয়াৰলেণ্ডৰ বিৰুদ্ধে হোৱা ৱাৰ্মআপ খেলখনত চেমছন আৰু জয়ছৱালে খেলিবলৈ সুযোগ পাইছিল যদিও সেই খেলখনতো চাহালে নিজৰ প্ৰদৰ্শন দেখুৱাত ব্যৰ্থ হয় ৷ চাহালক ২০২২ চনৰ টি-২০ বিশ্বকাপ দলতো নিৰ্বাচিত কৰা হৈছিল যদিও তাতো তেওঁ কোনো খেল খেলা নাছিল ।
সহায়ক-কৰ্মচাৰীয়ে পাব এই পৰিমাণৰ ধনৰাশি:
বি চি চি আইৰ পুৰস্কাৰৰ ধনৰ ভিতৰত মুখ্য প্ৰশিক্ষক ৰাহুল দ্ৰাবিড়, বেটিং প্ৰশিক্ষক বিক্ৰম ৰাথোৰ, ফিল্ডিং প্ৰশিক্ষক টি দিলীপ আৰু বলিং প্ৰশিক্ষক পৰশ মহম্ব্ৰেক ২.৫ কোটি টকাকৈ প্ৰদান কৰা হ’ব । অধ্যক্ষ অজিত আগৰকাৰকে ধৰি জ্যেষ্ঠ বাছনি সমিতিৰ পাঁচজন সদস্যক ১ কোটি টকাকৈ দিয়া হ’ব । খেলুৱৈ আৰু প্ৰশিক্ষকৰ উপৰিও অন্যান্য কৰ্মচাৰীকো পুৰস্কৃত কৰা হ’ব । তিনিজন ফিজিঅ’থেৰাপিষ্ট, তিনিজন থ্ৰ’ডাউন বিশেষজ্ঞ, দুজন মালিচ বিশেষজ্ঞ আৰু শক্তি আৰু কণ্ডিচনিং প্ৰশিক্ষকেও লাভ কৰিব পুৰস্কাৰৰ ধন ।
ৰিজাৰ্ভ খেলুৱৈসকলে কি পাব?
ৰিজাৰ্ভ খেলুৱৈ হিচাপে ভ্ৰমণ কৰা চাৰিজন বেটছমেন ৰিংকু সিং আৰু শুভমন গিল, বেগী বলাৰ আৱেশ খান আৰু খলিল আহমেদকো ১ কোটি টকাকৈ ধন প্ৰদান কৰা হ’ব । ভাৰতীয় দলটোত মুঠ ৪২ জন লোকে বিশ্বকাপৰ বাবে যাত্ৰা কৰিছিল । যদিহে প্ৰতিবেদন বিশ্বাস কৰা হয় তেন্তে দলটোৰ ভিডিঅ’ বিশ্লেষক, সংবাদ মাধ্যমৰ বিষয়া আৰু দলৰ লজিষ্টিক মেনেজাৰকে ধৰি দলটোৰ সৈতে যাত্ৰা কৰা বি চি চি আইৰ সকলো কৰ্মচাৰীসকলক পুৰস্কৃত কৰা হ’ব ।
