স্প’ৰ্টছ ডেস্ক, 9 ছেপ্টেম্বৰ: সপোন দেখিলে আৰু আপোনাৰ মনোবল দৃঢ় হ'লে আকাশ চুবলৈ আপোনাক কোনেও বাধা দিব নোৱাৰে । অসমৰ তিনিচুকীয়া জিলাৰ ডুমডুমাৰ এগৰাকী কিশোৰীয়েও এদিন সপোন দেখিছিল অসমৰ নাম উজলাবলৈ, আনৰ আদৰ্শ নলৈ সপোন দেখিছিল নিজৰ নাম সুকীয়াকৈ প্ৰতিষ্ঠা কৰাৰ ।
এই সপোনকে সাৰথি কৰি কিশোৰীগৰাকী যি ডুমডুমাৰ পৰা ওলাই আহিল, তেতিয়াৰে পৰা আৰু পিছলৈ ঘূৰি চাবলগীয়া হোৱা নাই । বৰ্তমান সময়ত তেওঁ প্ৰতিষ্ঠিত এগৰাকী ক্ৰীড়া সাংবাদিক হিচাপে । আমি ক'ব খুজিছো জ্যেষ্ঠ ক্ৰীড়া সাংবাদিক গীতিকা তালুকদাৰৰ কথা ।
ইতিমধ্যে বিভিন্ন সংবাদ মাধ্যমত এইগৰাকী ক্ৰীড়া সাংবাদিকৰ কৰ্মজীৱন সম্পৰ্কে বিভিন্ন প্ৰতিবেদন প্ৰকাশ পাইছে ৷ সম্প্ৰতি গীতিকা পেৰিছত ৷ পেৰিছৰ মূল অলিম্পিক 'কাভাৰ' কৰাৰ পিছত তেওঁ অসমলৈ উভতি আহিছিল যদিও মনটোৰ হেঁচাত পুনৰ উৰা মাৰে পেৰিছলৈ, পেৰালিম্পিক 'কাভাৰ' কৰিবলৈ ৷ পেৰালিম্পিকৰ মাজৰ পৰাই গীতিকা তালুকদাৰে ইটিভি ভাৰতলৈ বিশেষভাৱে প্ৰেৰণ কৰে কেইবাটাও ভিডিঅ' ৷ তাৰেই আধাৰত আমাৰ আজিৰ এই প্ৰতিবেদন ৷
কেনেকৈ আৰম্ভণি ঘটিছিল এই যাত্ৰাৰ:
পিতৃৰ চাকৰিসূত্ৰে তিনিচুকীয়া জিলাৰ ডুমডুমাত থাকিবলৈ লৈছিল গীতিকা তালুকদাৰ ৷ অৱশ্যে তেওঁৰ পিতৃ ধীৰেন্দ্ৰ নাথ তালুকদাৰৰ ঘৰৰ ঘাইশিপাডাল আছে নলবাৰীৰ চামতাত ৷ এছ এছ বিত কৰ্মৰত গীতিকাৰ পিতৃক এগৰাকী গীতিকাৰ হিচাপেও জনা যায় ৷
গীতিকাই ডুমডুমাতেই স্কুলীয়া আৰু কলেজীয়া শিক্ষা গ্ৰহণ কৰাৰ পিছত পৰৱৰ্তী সময়ত অৰ্থাৎ 2005 চনত অসম মিডিয়া ট্ৰাষ্টৰ পৰা গ্ৰহণ কৰে সাংবাদিকতাৰ শিক্ষা ৷ এই শিক্ষা লাভৰ পিছতে গীতিকাই আৰম্ভণি কৰে পেছাদাৰী জীৱনৰ ৷ তেওঁ কিছুদিন ইষ্টাৰ্ণ প্ৰজেকছন নামৰ এটা প্ৰতিষ্ঠানত ইণ্টাৰ্ণশ্বিপ কৰি জীৱনৰ নতুন ইনিংছ মুকলি কৰে ৷ ইয়াৰ পিছত তেওঁ কেতিয়াও নিজৰ জীৱনত ঘূৰি চাবলগীয়া হোৱা নাই ৷ 2007 চনত গীতিকাই যোগদান কৰে জি এল পাব্লিকেছনত ৷
পেছাদাৰী জীৱন:
প্ৰাৰম্ভিক পৰ্যায়ত অসমৰ কেইবাখনো আগশাৰীৰ বাতৰি কাকতত কাম কৰিছিল গীতিকা তালুকদাৰে ৷ স্থানীয় সংবাদ মাধ্যমৰ অভিজ্ঞতাৰে পুষ্ট সাংবাদিকগৰাকীয়ে পৰৱৰ্তী সময়ত দেশৰ কেইবাটাও সংবাদ মাধ্যমৰ সৈতে কাম কৰাৰ সুযোগ লাভ কৰে ৷
বৰ্তমান গীতিকাই এখন আগশাৰীৰ ৰাষ্ট্ৰীয় কাকতৰ লগতে জাৰ্মানীৰ এটা সংবাদ সংস্থাৰ বাবে নিয়মীয়াকৈ বাতৰি আৰু ফটো যোগান ধৰি আছে ৷
অলিম্পিকৰ অভিজ্ঞতা:
দুটাকৈ অলিম্পিকত ফটো সাংবাদিক হিচাপে পেৰিছ অলিম্পিকত অংশগ্ৰহণ কৰা গীতিকা আছিল ভাৰতৰ একমাত্ৰ মহিলা ক্ৰীড়া সাংবাদিক ৷ ক’ভিডৰ প্ৰত্যাহ্বানক নেওচি গীতিকাই অংশগ্ৰহণ কৰিছিল টকিঅ’ অলিম্পিক 2020 ত ৷ সেই সময়ত জাপানৰ পৰা অলিম্পিকৰ বাতৰি আৰু ফটো সংগ্ৰহ কৰা ভাৰতৰ একমাত্ৰ মহিলা সাংবাদিক আছিল গীতিকা তালুকদাৰ ৷
চলিত বছৰত প্ৰেমৰ চহৰত অনুষ্ঠিত পেৰিছ অলিম্পিক 2024 তো অংশগ্ৰহণ কৰে অসমকন্যা তথা জ্যেষ্ঠ ক্ৰীড়া সাংবাদিক গীতিকা তালুকদাৰে ৷ পেৰিছৰ পৰা মেটমৰা অভিজ্ঞতা লৈ উভতি অহা গীতিকাৰ ভৰা নাছিল মন ৷ যাৰ বাবে তেওঁ পুনৰ উৰা মাৰে একেখন চহৰলৈ ৷ এইবাৰৰ উদ্দেশ্য আছিল গ্ৰীষ্মকালীন পেৰিছ পেৰালিম্পিক 2024 গেমছ ৷
পেৰিছ পেৰালিম্পিক 2024 গেমছত অসমৰ গীতিকা:
28 আগষ্টৰ পৰা 8 ছেপ্টেম্বৰলৈ চলা গ্ৰীষ্মকালীন পেৰিছ পেৰালিম্পিক 2024 গেমছত অংশগ্ৰহণ কৰি গীতিকাই সমৃদ্ধ কৰে নিজৰ অভিজ্ঞতা ৷ ই টিভি ভাৰতলৈ পেৰিছৰ পৰা প্ৰেৰণ কৰা ভিডিঅ'ত ক্ৰীড়া সাংবাদিকগৰাকীয়ে ব্যক্ত কৰে নিজৰ মনৰ কথা ৷ দেশৰ পেৰা-এথলীটসকলৰে পৰিপূৰ্ণ পেৰিছ পেৰালিম্পিকত এইবেলি ভাৰতৰ প্ৰদৰ্শন আছিল দুৰ্দান্ত ৷ ভাৰতৰ পেৰা-খেলুৱৈসকলে এই প্ৰতিযোগিতাত অংশগ্ৰহণ কৰি অৰ্জন কৰিছিল 29 টাকৈ পদক ৷ য’ত আছিল 7 টাকৈ স্বৰ্ণ, 9 টা ৰূপ আৰু 13 টা ব্ৰঞ্জৰ পদক ৷ তদুপৰি পদক তালিকাত ভাৰতে লাভ কৰিছিল 18 নং স্থান ৷
ভাৰতৰ এনে প্ৰদৰ্শনে সুখী কৰে সাংবাদিকগৰাকীক ৷ তদুপৰি অলিম্পিকৰ দৰে পেৰালিম্পিকতো অসমৰ খেলুৱৈসকলে এদিন হ’লেও ক্ৰীড়া প্ৰদৰ্শন কৰিবলৈ সক্ষম হ’ব বুলি গীতিকা তালুকদাৰে আশা প্ৰকাশ কৰে ৷
