স্প’ৰ্টছ ডেস্ক, ৩ ছেপ্টেম্বৰ : আজি অসমৰ প্ৰথমগৰাকী অৰ্জুন বঁটা বিজয়ী খেলুৱৈ ভোগেশ্বৰ বৰুৱাৰ ওপজাদিন ৷ যাৰ বাবে প্ৰতিবছৰে এই বিশেষ দিনটোক পালন কৰা হয় অভিৰুচি ক্ৰীড়া দিৱস হিচাপে ৷ ১৯৩৭ চনৰ ৩ ছেপ্টেম্বৰত শিৱসাগৰৰ জয়সাগৰৰ সুন্দৰপুৰত জন্মগ্ৰহণ কৰিছিল অসমৰ প্ৰথমগৰাকী অৰ্জুন বঁটা প্ৰাপক ক্ৰীড়াবিদ ভোগেশ্বৰ বৰুৱাই ৷
ফুটবল খেলুৱৈৰূপে ক্ৰীড়া জীৱন আৰম্ভ কৰাৰ পাচত ১৯৬০ চনত ভাৰতীয় সেনা বাহিনীত যোগদান কৰা বৰুৱাই ১৯৬৪-১৯৬৫ চনৰ ৰাষ্ট্ৰীয় এথলেটিক প্ৰতিযোগিতাৰো আছিল স্বৰ্ণ বিজয়ী ৷ ১৯৬৬ চনৰ বেংককত পঞ্চম এছিয়ান গেমছত ৮০০ মিটাৰ দৌৰত স্বৰ্ণ পদক লাভ কৰি আন্তঃৰাষ্ট্ৰীয় পৰ্যায়ত স্বৰ্ণপদক প্ৰাপ্ত প্ৰথমগৰাকী অসমীয়াৰূপে পৰিগণিত হয় ভোগেশ্বৰ বৰুৱা ৷ একেটা বছৰতে (১৯৬৬ চনত) তেওঁক অৰ্জুন বঁটাৰে সন্মানিত কৰা হয় ।
১৯৭০ চনত পুনৰ এছিয়ান গেমছৰ ৪০০ মিটাৰ ৰীলেত ৰূপৰ পদক দখল কৰা ভাৰতীয় দলৰ অন্যতম সদস্য আছিল ভোগেশ্বৰ বৰুৱা ৷ অল ইণ্ডিয়া কাউন্সিল অৱ স্প’ৰ্টচ আৰু ৰাষ্ট্ৰীয় এথলেটিক দলৰো নিৰ্বাচক আছিল ভোগেশ্বৰ বৰুৱা ৷ ৬ বছৰ ধৰি উক্ত পদবীত কাৰ্যনিৰ্বাহ কৰিছিল বিশিষ্ট ক্ৰীড়াবিদগৰাকীয়ে ৷ ১৯৬৮ চনৰ পৰা ৫০ বছৰ ধৰি অৰ্জুন বঁটা নিৰ্বাচক সমিতিৰো সদস্য আছিল ভোগেশ্বৰ বৰুৱা ৷
৩ ছেপ্টেম্বৰত ক্ৰীড়াবিদজনৰ জন্মদিনটোক অভিৰুচি ক্ৰীড়া দিৱস হিচাপে পালন কৰা হয় ৷ বিগত বৰ্ষত অৰ্জুন ভোগেশ্বৰ বৰুৱাৰ ৮৫ সংখ্যক ওপজা দিনৰ লগত সংগতি ৰাখি অসম চৰকাৰে প্ৰথমবাৰৰ বাবে উদযাপন কৰিছিল ক্ৰীড়া পেঞ্চন দিৱস । ৰাজ্যিক কেবিনেটত লোৱা সিদ্ধান্ত মৰ্মে পালন কৰা হৈছিল এই দিৱসৰ সকলো কাৰ্যসূচী ৷
লগতে পঢ়ক: ৰংপুৰজ্যোতি ক্লাৱৰ উদ্যোগত কেক কাটি অৰ্জুন ভোগেশ্বৰ বৰুৱাৰ জন্মদিন পালন - ABHIRUCHI SPORTS DAY 2024
