স্প’ৰ্টছ ডেস্ক, 2 ছেপ্টেম্বৰ: অব্যাহত আছে পেৰিছ গ্ৰীষ্মকালীন পেৰালিম্পিক গেমছত ভাৰতৰ জয়যাত্ৰা ৷ পেৰিছত ভাৰতৰ পদক লাভৰ সংখ্যা বৃদ্ধি হৈছে 7 টালৈ ৷ পুৰুষৰ হাই জাম্প টি-47 ইভেণ্টত ৰূপৰ পদক অৰ্জন কৰিছে নিশাদ কুমাৰে ।
এই ইভেণ্টত নিশাদৰ সৰ্বাধিক জাম্প আছিল 2.04 মিটাৰ, যিটো তেওঁৰ ছিজনৰ সৰ্বশ্ৰেষ্ঠ জাম্প বুলি গণ্য কৰা হৈছে ৷ আমেৰিকা যুক্তৰাষ্ট্ৰৰ ৰোডেৰিক টাউনচেণ্ডে সৰ্বাধিক 2.12 মিটাৰ জাম্পৰ সৈতে জয় কৰিছে সোণৰ পদক ৷ আনহাতে, নিৰপেক্ষ পেৰালিম্পিক খেলুৱৈসকলক প্ৰতিনিধিত্ব কৰা জৰ্জি মাৰ্জিয়েভে 2.00 মিটাৰ জাম্পৰে জয় কৰে ব্ৰঞ্জৰ পদক ৷
নিশাদে তিনি বছৰ পূৰ্বে টকিঅ’ পেৰালিম্পিকত জিকিছিল ৰূপৰ পদক ৷ টকিঅ’ত খেলুৱৈগৰাকীয়ে 2.06 মিটাৰ জঁপিয়াইছিল । কিলাকুটি বা তলৰ মণিবন্ধত আঘাতপ্ৰাপ্ত নাইবা কোনো শাৰিৰীক অক্ষমতা থকা খেলুৱৈসকলৰ বাবেহে টি- ৪৭ ইভেণ্ট অনুষ্ঠিত কৰা হয় ।
দিনটোৰ আৰম্ভণিতে প্ৰীতি পালে ইতিহাস সৃষ্টি কৰাৰ পিছত নিশাদ কুমাৰেও এই প্ৰতিযোগিতাত পদক অৰ্জন কৰিবলৈ সক্ষম হয় ৷ দেওবাৰৰ দিনটোত পেৰালিম্পিকত দুটাকৈ পদক জয় কৰা প্ৰথমগৰাকী ভাৰতীয় মহিলা ট্ৰেক এণ্ড ফিল্ড এথলীটত পৰিণত হৈছিল প্ৰীতি ।
200 মিটাৰ টি 35 শ্ৰেণীত প্ৰীতিয়ে 30.01 ছেকেণ্ডত ব্যক্তিগত শ্ৰেষ্ঠ সময়ৰ সৈতে জয় কৰিছিল ব্ৰঞ্জৰ পদক ৷ 23 বছৰীয়া যুৱতীগৰাকীয়ে একেটা পেৰালিম্পিকত দুটা ব্ৰঞ্জৰ পদক অৰ্জন কৰা দ্বিতীয়গৰাকী ভাৰতীয় মহিলা হিচাপে পৰিগণিত হয় । তিনি বছৰ পূৰ্বে শ্বুটাৰ অৱনী লেখাৰাই টকিঅ’ পেৰালিম্পিকত স্বৰ্ণ আৰু ব্ৰঞ্জৰ পদক জিকি অভিলেখ স্থাপন কৰিছিল ৷
লগতে পঢ়ক: পেৰিছ পেৰালিম্পিক 2024: শ্বুটিঙত ভাৰতৰ হৈ মনীষ নৰৱালৰ ৰূপৰ পদক অৰ্জন - PARIS PARALYMPICS 2024
