স্পৰ্টছ ডেস্ক, ৩০ জুলাই : পেৰিছ অলিম্পিকত ইতিহাস ৰচিলে ভাৰতৰ তাৰকা পেডলাৰ মণিকা বাত্ৰাই । পেৰিছ অলিম্পিকৰ তৃতীয় দিনা খেলুৱৈগৰাকীয়ে টেবুল টেনিছত ৰাউণ্ড অফ-১৬ৰ বাবে যোগ্যতা অৰ্জন কৰে । ইয়াৰ লগে লগে টেবুল টেনিছত ৰাউণ্ড অফ-১৬ৰ বাবে যোগ্যতা অৰ্জন কৰা প্ৰথমগৰাকী ভাৰতীয় হিচাপে পৰিগণিত হয় । ৰাউণ্ড অফ-৩২ৰ মহিলা ছিংগলছত বাত্ৰাই ফ্ৰান্সৰ খেলুৱৈ প্ৰীতিকা পাৱাড়েক ৪-০ত পৰাস্ত কৰে ।
মণিকা বাত্ৰাৰ ঐতিহাসিক বিজয়
সোমবাৰে অনুষ্ঠিত টেবুল টেনিছৰ ৰাউণ্ড অফ-৩২ৰ মহিলা ছিংগলছৰ খেলখনত মণিকা বাত্ৰাই ফ্ৰান্সৰ প্ৰীতিকা পাৱাড়েক পৰাস্ত কৰে । এই বিজয়ৰ সৈতে ২৯ বছৰীয়া বাত্ৰা অলিম্পিকৰ ইতিহাসত প্ৰাক-কোৱাৰ্টাৰ ফাইনেলত প্ৰৱেশ কৰা প্ৰথমগৰাকী ভাৰতীয় টেবুল টেনিছ খেলুৱৈ হিচাপে পৰিগণিত হয় ।
Result Update: India Women’s #TableTennis Singles Round of 32
— SAI Media (@Media_SAI) July 29, 2024
Our magnificent paddler🏓 @manikabatra_TT creates history as she qualifies for Round of 16 🥳
Manika defeats 🇫🇷 France's World No. 18, Prithika Pavade with a score of 11-9, 11-6, 11-9 & 11-7 in the Round of 32. pic.twitter.com/VXrkySmXCs
ফৰাচী খেলুৱৈক ৪-০ ব্যৱধানত পৰাস্ত
দক্ষিণ পেৰিছ এৰেনাত বাত্ৰাই ঘৰুৱা খেলুৱৈ তথা বিশ্বৰ ১৮ নম্বৰ স্থানত থকা ফৰাচী খেলুৱৈগৰাকীক পৰাস্ত কৰে । ৩৭ মিনিট ধৰি চলি থকা এই খেলখনত বাত্ৰাই ১১-৯, ১১-৬, ১১-৯, ১১-৭ত জয় লাভ কৰে ।
ইফালে কমনৱেলথ গেমছ চেম্পিয়ন আৰু বিশ্বৰ ২৮ নম্বৰ মণিকা বাত্ৰাই প্ৰথম আৰু তৃতীয় ৰাউণ্ডত তেওঁৰ প্ৰতিদ্বন্দ্বীৰ পৰা কঠিন প্ৰত্যাহ্বানৰ সন্মুখীন হৈছিল । কিন্তু ভাৰতীয় খেলুৱৈগৰাকীয়ে মনোবল বজাই ৰাখে আৰু আটাইকেইটা ৰাউণ্ডতে বিপক্ষৰ খেলুৱৈজনক পৰাস্ত কৰে ।
প্ৰি-কোৱাৰ্টাৰত বাত্ৰা
মহিলাৰ ছিংগলছত বাত্ৰাই প্ৰি-কোৱাৰ্টাৰ ফাইনেলত জাপানৰ অষ্টম শ্ৰেণীৰ মিউ হিৰানো (জাপান) বা অবাছাই ঝু চেংঝু (হংকং চীন)ৰ মুখামুখি হ'ব ।ইফালে বাত্ৰাৰ এই বিজয়ক লৈ প্ৰতিগৰাকী ভাৰতীয় আনন্দিত । পৰৱৰ্তী ৰাউণ্ডত ইয়াতকৈও ভাল প্ৰদৰ্শন কৰি বাত্ৰাই দেশৰ বাবে পদক দখল কৰিব বুলি আশাবাদী দেশবাসী ।
