অসম ডেস্ক: বহু উৎকণ্ঠাৰ অন্ত পেলাই অৱশেষত বিবাহপাশত আৱদ্ধ হ'ব তাৰকা বেডমিণ্টন খেলুৱৈ পি ভি সিন্ধু । দেওবাৰে উদয়পুৰৰ হ্ৰদ চহৰত বিবাহ পাশত আৱদ্ধ হ'ব খেলুৱৈগৰাকী । ইতিমধ্যে দৰা আৰু দৰাৰ পৰিয়ালো বিবাহ অনুষ্ঠানৰ বাবে উপস্থিত হৈছে উদয়পুৰত । দুদিনীয়া কাৰ্যসূচীৰে অনুষ্ঠিত হ'বলগীয়া ৰাজকীয় বিবাহ অনুষ্ঠান শনিবাৰৰ পৰা আৰম্ভ হ'ব । এই ডেষ্টিনেশ্বন উইডিং উদাইসাগৰ হ্ৰদৰ মাজত অৱস্থিত পঞ্চতাৰকা হোটেল ৰাফেলত অনুষ্ঠিত হ'ব । প্ৰথম দিনটোত বিবাহৰ পূৰ্বৰ অনুষ্ঠানবোৰৰ অংশ হিচাপে সংগীতৰ কাৰ্যসূচী প্ৰদৰ্শন কৰা হ'ব আৰু বিবাহৰ ৰীতি-নীতিও আৰম্ভ হ'ব । উল্লেখনীয় যে ভাৰতীয় ক্ৰিকেট দলৰ খেলুৱৈ হাৰ্দিক পাণ্ডিয়াও এইখন হোটেলতে বিবাহপাশত আৱদ্ধ হৈছিল ।
কইনা সাজেৰে সাজিব পি ভি সিন্ধু:
অলিম্পিক পদক বিজয়ী পি ভি সিন্ধুয়ে ২২ ডিচেম্বৰত আইটি কোম্পানীৰ সঞ্চালক ভেংকট দত্ত চাইৰ সৈতে বিবাহ পাশত আৱদ্ধ হ'ব । ২৪ ডিচেম্বৰত হায়দৰাবাদত অনুষ্ঠিত হ'ব এক বিশাল অভ্যৰ্থনা অনুষ্ঠান । বিবাহৰ বাবে, পিভি সিন্ধুৱে আমন্ত্ৰণ জনাইছে ক্ৰিকেটাৰ শচীন তেণ্ডুলকাৰ আৰু প্ৰধানমন্ত্ৰী নৰেন্দ্ৰ মোদীক । বহুতো মহান ব্যক্তিত্বৰ অধিকাৰী লোকে এই বিবাহ অনুষ্ঠানত উপস্থিত থাকিব বুলি আশা কৰা হৈছে । অনুষ্ঠান পৰিচালনাৰ লোকসকলৰ মতে, এই বিবাহৰ বাবে বহু নিমন্ত্ৰণ প্ৰেৰণ কৰা হৈছে । এই সন্দৰ্ভত, পিভি সিন্ধুৱে তেওঁৰ ছ'চিয়েল মিডিয়া একাউণ্টত বিয়ালৈ আমন্ত্ৰণ জনোৱাসকলৰ সৈতে উঠা ফটোও শ্বেয়াৰ কৰিছে । ইয়াত কেইবাজনো কেন্দ্ৰীয় মন্ত্ৰী আৰু চলচ্চিত্ৰ তাৰকা অন্তৰ্ভুক্ত হৈছে । এই বিয়াত অতিথিসকলক বিভিন্ন পৰম্পৰাগত ব্যঞ্জনো পৰিৱেশন কৰা হ'ব ।
অতিথিসকলে ইতিমধ্যে লাভ কৰিছে নিমন্ত্ৰণ:
২০ ডিচেম্বৰৰ পৰা উদয়পুৰত বিবাহ অনুষ্ঠান আৰম্ভ হৈছে । প্ৰধানমন্ত্ৰী নৰেন্দ্ৰ মোদী, শচীন তেণ্ডুলকাৰ, কেন্দ্ৰীয় গৃহমন্ত্ৰী অমিত শ্বাহ, শিৱৰাজ সিং চৌহান, বৈদেশিক পৰিক্ৰমা মন্ত্ৰী এছ জয়শংকৰ, বিত্তমন্ত্ৰী নিৰ্মলা সীতাৰমণ, কিৰেন ৰিজিজু, তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ লগতে কেইবাজনো কেন্দ্ৰীয় মন্ত্ৰী আৰু চলচ্চিত্ৰ তাৰকাক বিয়ালৈ আমন্ত্ৰণ জনোৱা হৈছে । পৱন কল্যাণ আৰু কেইবাজনো ক্ৰিকেটাৰকো আমন্ত্ৰণ জনোৱা হৈছে ।
ৰাজস্থানী পৰম্পৰা উপভোগ কৰিব অতিথিয়ে:
এই ৰাজকীয় বিবাহৰ প্ৰস্তুতিৰ বাবে হোটেলখনত বিশেষ ব্যৱস্থা কৰা হৈছে । বিভিন্ন অনুষ্ঠানত ৰাজস্থানী পৰম্পৰাৰ আভাস প্ৰদৰ্শন কৰা হ'ব । অতিথিসকলে ৰাজস্থানী সুস্বাদু খাদ্যৰ সোৱাদ ল'ব । মেৱাৰী পৰম্পৰা অনুসৰি, অতিথিসকলক আদৰণি জনোৱা হ'ব । পি ভি সিন্ধুৰ পিতৃ পি ভি ৰমনে কয় যে দুয়োটা পৰিয়ালে ইজনে সিজনক দীৰ্ঘদিন ধৰি চিনি পাই আহিছে । সিন্ধুৰ সময়সূচী জানুৱাৰীৰ পৰা যথেষ্ট ব্যস্ত থাকিব, সেয়েহে এয়াই বিয়াৰ বাবে সঠিক সময় আছিল । বিয়াৰ পৰিকল্পনা মাত্ৰ এমাহ আগতে চূড়ান্ত কৰা হৈছিল ।
উদয়পুৰত কেইবাখনো ৰাজকীয় বিবাহ অনুষ্ঠিত হৈছিল:
বছৰটোৰ আৰম্ভণিতে ৫ জানুৱাৰীৰ পৰা ১১ জানুৱাৰীৰ ভিতৰত বলীউড অভিনেতা আমিৰ খানৰ জীয়ৰী ইৰা খানে তেওঁৰ প্ৰেমিক নুপুৰ শিখৰক বিয়া কৰায় । তাৰ পিছত, জানুৱাৰীৰ ২৯ তাৰিখৰ পৰা ৩১ জানুৱাৰীলৈ, ছানী দেওলৰ ভতিজী নিকিতা চৌধুৰীৰ বিয়াও ইয়াত অনুষ্ঠিত হৈছিল । ইফালে, বলীউডৰ গায়িকা নীতিন মুকেশৰ সৰু পুত্ৰৰ বিয়া উদয়পুৰৰ হাৱালাৰ এখন পাঁচতাৰকা হোটেলত অনুষ্ঠিত হয় । নীতিন মুকেশৰ ডাঙৰ পুত্ৰ আৰু অভিনেতা নীল নীতিন মুকেশেও উদয়পুৰত বিবাহ পাশত আৱদ্ধ হৈছিল । যোৱা বছৰ, ক্ৰিকেটাৰ হাৰ্দিক পাণ্ডিয়াই বলীউডৰ অভিনেত্ৰী নাতাছাৰ সৈতে চহৰখনৰ এখন হোটেলত পুনৰ বিবাশপাশত আৱদ্ধ হৈছিল । পৰিণীতি চোপ্ৰা আৰু ৰাঘৱ চাধাৰ বিয়াৰ বিষয়েও বহুত চৰ্চিত হৈছিল । ইয়াৰ উপৰিও, ২০১৮ চনত, মুকেশ আম্বানীৰ জীয়ৰী ঈশাৰ বিবাহপূৰ্ব অনুষ্ঠানও উদয়পুৰত অনুষ্ঠিত হৈছিল ।
