স্পৰ্টছ ডেস্ক,২৮ জুলাই : পেৰিছ অলিম্পিকত মহিলাৰ একক প্ৰতিযোগিতাত মালদ্বীপৰ ফাতিমাথ নাবাহা আব্দুল ৰজ্জকৰ বিৰুদ্ধে পোনপটীয়া বিজয়েৰে ভাৰতৰ তাৰকা শ্বাটলাৰ পি ভি সিন্ধুৱে তেওঁৰ তৃতীয় অলিম্পিক পদকৰ আশা জীয়াই ৰাখিছে । খেলখনত সিন্ধুৰ দৃঢ়তা আৰু আত্মবিশ্বাস স্পষ্ট আছিল । দুয়োটা ৰাউণ্ডতে সিন্ধুৰ সন্মুখত প্ৰতিদ্বন্দ্বী ধাৰাশায়ী হয় । ২৯ মিনিট ধৰি চলা খেলখনত ২১-৯, ২১-৬ পইণ্টৰ ব্যৱধানত সিন্ধুৱে জয় সাব্যস্ত কৰে ।
Sindhu begins her quest to create history with a dominating win! 🚀💯
— BAI Media (@BAI_Media) July 28, 2024
📸: @badmintonphoto#Paris2024#IndiaAtParis24#Cheer4Bharat#IndiaontheRise#Badminton pic.twitter.com/Q7Y87W33lf
পদকৰ আশাত সিন্ধু :
তৃতীয় অলিম্পিক পদকৰ সন্ধানত সিন্ধুৱে নিজৰ আধিপত্য বিস্তাৰ কৰিবলৈ কোনো ত্ৰুটি ৰখা নাই । বেডমিণ্টন ক'ৰ্টৰ প্ৰতিটো ইঞ্চি তেওঁৰ সুবিধাৰ বাবে ব্যৱহাৰ কৰিছিল আৰু প্ৰতিদ্বন্দ্বীক নৰম শ্বট খেলিবলৈ প্ৰলোভিত কৰিছিল । দ্বিতীয়বাৰৰ বাবে সিন্ধু আৰু ৰজ্জক মুখামুখি হৈছিল । ইয়াৰ পূৰ্বেও ভাৰতীয় শ্বাটলাৰগৰাকীয়ে মালদ্বীপৰ শ্বাটলাৰক পৰাস্ত কৰিছিল আৰু সেই ধাৰা পেৰিছতো অব্যাহত ৰাখিলে সিন্ধুৱে ।
খেলৰ প্ৰথম ৰাউণ্ডত সিন্ধু আৰু ৰজ্জকৰ যুঁজ আকৰ্ষণীয় আছিল । এটা সময়ত দুয়োগৰাকীৰে স্ক'ৰ ৪-৪ আছিল । কিন্তু সিন্ধুৱে নিজৰ অভিজ্ঞতা আৰু আত্মবিশ্বাস দেখুৱাই খেলখনত আগুৱাই গ'ল । এবাৰত সিন্ধুৱে ১০ পইণ্টৰ স্প্ৰী লাভ কৰে । প্ৰথম ৰাউণ্ডত পি ভি সিন্ধুৱে ২১ পইণ্টৰ সৈতে বিজয় সাব্যস্ত কৰে আৰু ৰজ্জকে সিন্ধুৰ কাৰিকৰী দক্ষতা অতিক্ৰম কৰিবলৈ ব্যৰ্থ হয় ।
একেদৰে দ্বিতীয় ৰাউণ্ডতো সিন্ধুৰ আধিপত্য অব্যাহত থাকে । প্ৰথম অৱস্থাত ৰজ্জকে প্ৰত্যাৱৰ্তনৰ সুযোগ পাইছিল যদিও মালদ্বীপৰ খেলুৱৈগৰাকীয়ে এই সুযোগ ল'ব নোৱাৰিলে । এই ৰাউণ্ডত পি ভি সিন্ধুৱে ২১-৬ পইণ্টৰ ব্যৱধানত বিজয় সাব্যস্ত কৰে । লগে লগে সিন্ধুৰ তৃতীয়টো অলিম্পিক পদকৰো পথ মুকলি হয় ।
