স্প’ৰ্টছ ডেস্ক, ১৭ ছেপ্টেম্বৰ : পুনৰবাৰ এছিয়াৰ শ্ৰেষ্ঠ হকী দল হিচাপে পৰিগণিত হৈছে ভাৰতীয় পুৰুষ হকী দল । এছিয়ান হকী চেম্পিয়নশ্বিপত চীনক পৰাস্ত কৰি ভাৰতে এছিয়ান হকীত নিজৰ আধিপত্য অক্ষুণ্ণ ৰাখে । ভাৰতীয় হকী দলে ফাইনেলত চীনক ১-০ গ'লত পৰাস্ত কৰে এই ঈপ্সিত লক্ষ্যত উপনীত হয় ।
আনহাতে, মকী হকী প্ৰশিক্ষণ ঘাটিত লাভ কৰা এই বিজয়ৰ জৰিয়তে ভাৰতে প্ৰতিযোগিতাখনৰ ইতিহাসত পঞ্চমবাৰৰ বাবে খিতাপ জয় কৰে । ইয়াৰ উপৰি সাতখন মেচৰ আটাইকেইখনতে জয়লাভ কৰা প্ৰতিযোগিতাখনৰ একমাত্ৰ অপৰাজিত দল হিচাপে পৰিগণিত হয় ।
অধিনায়ক হৰমনপ্ৰীত সিঙে মেচৰ চতুৰ্থ কোৱাৰ্টাৰত ভাৰতীয় ডিফেণ্ডাৰ যুগৰাজ সিঙক প্ৰদান কৰা এটা সুযোগ সুন্দৰভাৱে গ'ললৈ ৰূপান্তৰ কৰি দুয়োপক্ষৰ মাজত বিজয়ৰ ব্যৱধান গঢ়ি তোলে । যুগৰাজ সিঙৰ নিৰ্ণায়ক গ'লটো আহে মেচখনৰ ৫১ মিনিটত ।
ভাৰত আৰু চীনৰ মাজত প্ৰতিযোগিতাখনত তীব্ৰ প্ৰতিদ্বন্দ্বিতা হৈছিল । আনহাতে, হৰমনপ্ৰীত বাহিনী এক উৎকৃষ্ট ৰেংকিং আৰু পূৰ্বৱৰ্তী ৰেকৰ্ডৰ ভিত্তিত প্ৰতিযোগিতাখনত ফেভাৰিট হিচাপে অৱতীৰ্ণ হৈছিল । অৱশ্যে যুঁজ অবিহনে হাৰমনা দল নাছিল চীনো । ফলত ভাৰতে খিতাপ অৰ্জন কৰিবলৈ কঠোৰ যুঁজ দিবলগা হয় ।
পঞ্চমবাৰৰ বাবে এছিয়ান চেম্পিয়নছ ট্ৰফী জয় ভাৰতৰ
২০১১, ২০১৬ আৰু ২০২৩ চনত এককভাৱে প্ৰতিযোগিতাখনত জয়লাভৰ পিচত এইটো হৈছে ভাৰতৰ অভিলেখ ভংগকাৰী পঞ্চম খিতাপ । উল্লেখ্য, 2018 চনত ভাৰত আৰু পাকিস্তান যুটীয়া বিজয়ী আছিল । আনহাতে, পাকিস্তান হৈছে এই প্ৰতিযোগিতাখনত দ্বিতীয় সৰ্বাধিক সফল দল । পাকিস্তানে তিনিবাৰ প্ৰতিযোগিতাখন নিজৰ দখললৈ নিছে আৰু দক্ষিণ কোৰিয়াই ২০২১ চনত খিতাপ জয় কৰিছিল । ইয়াৰ বাবে এই প্ৰতিযোগিতাখনত চীনৰ প্ৰদৰ্শন হৈছে এতিয়ালৈকে সৰ্বশ্ৰেষ্ঠ । কিয়নো এছিয়ান হকী চেম্পিয়নশ্বিপত এইবাৰ প্ৰথমবাৰৰ বাবে ফাইনেলত প্ৰৱেশ কৰিছিল ।
তৃতীয় স্থানত পাকিস্তান
ইফালে তৃতীয় স্থানৰ বাবে খেলা মেচখনত পাকিস্তানে দক্ষিণ কোৰিয়াক ৫-২ গ'লত পৰাস্ত কৰে । পাকিস্তানে ছেমি ফাইনেলত চীনৰ বিৰুদ্ধে পৰাজিত হৈছিল । অৱশ্যে প্ৰতিযোগিতাখন তৃতীয় স্থানত সমাপ্ত কৰে ।
