স্প’ৰ্টছ ডেস্ক, 25 ছেপ্টেম্বৰ: 27 ছেপ্টেম্বৰৰ পৰা উত্তৰ প্ৰদেশৰ কানপুৰত অনুষ্ঠিত হ’ব ভাৰত-বাংলাদেশৰ মাজৰ দ্বিতীয়খন টেষ্ট মেচ ৷ গ্ৰীণপাৰ্ক ষ্টেডিয়ামত অনুষ্ঠিত হ’বলগীয়া এই টেষ্ট মেচত ছাত্ৰ-ছাত্ৰীৰ বাবে থাকিব বিশেষ সুবিধা ৷ শিক্ষাৰ্থীসকললৈ এই বিশেষ সুবিধা আগবঢ়াইছে মেচখনৰ আয়োজকে ৷ প্ৰায় 2000 বিদ্যালয়ত পঢ়ি থকা শিক্ষাৰ্থীয়ে বিনামূলীয়া টিকটৰে উপভোগ কৰিব এই মেচ ৷
কেৱল এয়াই নহয়, আয়োজকৰ তৰফৰ পৰা শিক্ষাৰ্থীসকলক যোগান ধৰা হ’ব বিনামূলীয়া খাদ্য আৰু খোৱাপানী ৷ তাৰোপৰি এই ষ্টেডিয়ামত আছে 20 হাজাৰ দৰ্শকৰ বাবে আসনৰ সুবিধা ৷ মেচখন উপভোগ কৰিবলৈ অহা দৰ্শকে যাতে কোনোধৰণৰ অসুবিধাৰ সন্মুখীন নহয়, তাৰ বাবে স্থান সঞ্চালক আৰু উত্তৰ প্ৰদেশ ক্ৰিকেট সংস্থাই গ্ৰহণ কৰিছে যাৱতীয় ব্যৱস্থা ৷
ষ্টেডিয়ামৰ ভিতৰত অধিক সংখ্যক ঠাইত থাকিব পাৰ্কিঙৰ ব্যৱস্থা । যাতে অত্যধিক গৰমতো দৰ্শকে সহজে ষ্টেডিয়ামৰ ভিতৰলৈ আহি তেওঁলোকৰ বাহনসমূহ পাৰ্ক কৰি খেল উপভোগ কৰিব পাৰে ৷
আয়োজকসকলে দাবী কৰা অনুসৰি, প্ৰায় 20,000 অধিক দৰ্শকে উপভোগ কৰিব পাৰিব ভাৰত-বাংলাদেশৰ মাজৰ টেষ্ট মেচ ৷ মঙলবাৰে আলোচনাৰ পিছত স্থান(ভেন্যু) পৰিচালক ড৹ সঞ্জয় কাপুৰে এই তথ্য প্ৰদান কৰে । অনুষ্ঠানটোত আতিথ্য(সেৱা) সঞ্চালক সঞ্জীৱ কুমাৰ সিং, ইউ পি চি এ-ৰ কোষাধ্যক্ষ প্ৰেম মনোহৰ গুপ্তা আৰু সঞ্চালক সঞ্চালক মনোজ পুন্দিৰ উপস্থিত আছিল ।
পিজ্জাৰ পৰা কানপুৰীয়ালৈকে, কুলচা-ঘুগুণীৰ পৰা মাখনলৈকে লাভ কৰিব সোৱাদ
স্থান পৰিচালক ড৹ সঞ্জয় কাপুৰে মেচখনৰ সময়ত দৰ্শকে যাতে থলুৱা খাদ্যৰ সোৱাদ লাভ কৰে, তাৰ প্ৰতি গ্ৰহণ কৰিছে সকলো প্ৰকাৰৰ ব্যৱস্থা ৷ সেই অনুসৰি, ষ্টেডিয়ামৰ ভিতৰত দৰ্শকে সোৱাদ ল’ব পাৰিব পিজ্জাৰ পৰা আৰম্ভ কৰি চোলে-কুলচালৈকে বহুধৰণৰ ব্যঞ্জন ৷
এই খাদ্যবোৰৰ বাবে নুন্যতম মূল্য নিৰ্ধাৰণ কৰা হৈছে ৷ দৰ্শকক আকৰ্ষণ কৰাৰ উদ্দেশ্যে ষ্টেডিয়ামৰ সকলো কেইখন প্ৰৱেশদ্বাৰতে নিৰ্মাণ কৰা হৈছে বিশেষ প্ৰকাৰৰ চেলফি পইণ্ট । মূঠৰ ওপৰত দৰ্শকৰ বাবে সকলো ধৰণৰ ব্যৱস্থা মজুত কৰিছে ষ্টেডিয়াম কৰ্তৃপক্ষই ৷ তদুপৰি শিক্ষাৰ্থীসকলৰ বাবে গ্ৰহণ কৰা বিশেষ ব্যৱস্থা অৱশ্যে কাৰ্যকৰী হ’ব ৰাজ্যখনৰ বিদ্যালয়সমূহৰ ক্ষেত্ৰতহে ৷
