স্পৰ্টছ ডেস্ক, 20 জুন : ক্ৰিকেটপ্ৰেমীলৈ দুঃখবৰ ৷ বৃহস্পতিবাৰে বেংগালুৰুত ভাৰতৰ প্ৰাক্তন ক্ৰিকেটাৰ ডেভিদ জনছনৰ মৃত্যু হয় ৷ কৰ্ণাটক ৰাজ্যিক ক্ৰিকেট সংস্থাৰ (কেএছচিএ) এক সূত্ৰই এই খবৰ নিশ্চিত কৰে ৷
আৰক্ষী সূত্ৰই জনোৱা অনুসৰি, এটা অট্টালিকাৰ চতুৰ্থ মহলাৰ পৰা তললৈ পৰাৰ ফলত প্ৰাক্তন ক্ৰিকেটাৰগৰাকীয়ে মৃত্যুক আকোৱালি লয় ৷ মৃত্যুৰ সময়ত জনছনৰ বয়স 52 বছৰ আছিল ৷ তেওঁ ইহসংসাৰত পত্নী আৰু দুটা সন্তান এৰি থৈ গৈছে । তেওঁ 2 খন টেষ্টত ভাৰতক প্ৰতিনিধিত্ব কৰি 8 ৰাণ সংগ্ৰহ কৰি তিনিটা ইউকেট দখল কৰিবলৈ সক্ষম হৈছিল ৷ তেওঁ ঘৰুৱা খেলত কৰ্ণাটকৰ হৈ খেলিছিল । তেওঁ 39 খন প্ৰথম শ্ৰেণীৰ মেচ খেলিছিল আৰু 437 ৰাণ সংগ্ৰহ কৰিছিল ৷ লগতে তেওঁ 8/55 ৰ সৰ্বশ্ৰেষ্ঠ অংকৰ সৈতে 125 টা উইকেট দখল কৰিবলৈ সক্ষম হৈছিল ৷ জনছনে অনিল কুম্বলে, জাৱাগল শ্ৰীনাথ, ভেংকটেশ প্ৰসাদ আৰু ডোডা গণেশৰ দৰে এক অবিশ্বাস্য বলিং গোট গঠন কৰিছিল ।
তেওঁ 1996 চনত নতুন দিল্লীৰ ফিৰোজশ্বাহ কোটলাত অষ্ট্ৰেলিয়াৰ বিৰুদ্ধে টেষ্ট খেলত আত্মপ্ৰকাশ কৰিছিল আৰু ডাৰ্বানৰ কিংছমিডত দক্ষিণ আফ্ৰিকাৰ বিৰুদ্ধে তেওঁৰ দ্বিতীয় আৰু অন্তিমখন টেষ্ট খেলিছিল ।
