স্প’ৰ্টছ ডেস্ক: চতুৰ্থবাৰৰ বাবে অলিম্পিকত অংশগ্ৰহণ কৰাৰ পিছতো পদক অবিহনে পেৰিছৰ পৰা উভতিছিল ভাৰতীয় খেলুৱৈ দীপিকা কুমাৰী । দলীয় শাখাৰ উপৰিও ব্যক্তিগত ইভেণ্টতো শেষ আঠৰ যুঁজত ব্যৰ্থ প্ৰমাণিত হৈছিল খেলুৱৈগৰাকী ৷
কিন্তু এই সকলো ব্যৰ্থতা পাহৰি দীপিকাই অংশগ্ৰহণ কৰিছিল মেক্সিকোত অনুষ্ঠিত হোৱা আৰ্চাৰী বিশ্বকাপত ৷ অভিজ্ঞ মহিলা ধনুৰ্বিদগৰাকীয়ে হেৰুওৱা ছন্দ ঘূৰাই পোৱাৰ লগতে প্ৰতিযোগিতাখনত অৰ্জন কৰিবলৈ সক্ষম হয় ৰূপৰ পদক ৷ দীপিকাই বিশ্বকাপত পঞ্চমটো ৰূপৰ পদক অৰ্জন কৰিবলৈ সক্ষম হৈছে ৷
লগতে পঢ়ক: কোৱাৰ্টাৰ ফাইনেলৰ বাবে যোগ্যতা অৰ্জন দীপিকা কুমাৰীৰ, বাহিৰ হ’ল ভজন কৌৰ - Paris Olympics 2024
দেওবাৰে অনুষ্ঠিত হোৱা ৰিকাৰ্ভ ইভেণ্টত স্বৰ্ণ জয়ৰ মেচত চীনৰ লি জিয়ামানৰ হাতত পোনপটীয়া ছেটত (0-6) পৰাস্ত হৈ ৰূপৰ পদকতে সন্তুষ্ট হ’বলগীয়া হৈছিল দীপিকা কুমাৰীয়ে । সমান্তৰালকৈ খেলুৱৈগৰাকীয়ে বিশ্বকাপত লাভ কৰা পদকৰ সংখ্যা ছয়টালৈ (এটা সোণ, পাঁচটা ৰূপ) বৃদ্ধি পায় ৷ 2022 চনত সন্তান জন্ম দিয়াৰ পিছত দীপিকাই প্ৰথমবাৰৰ বাবে বিশ্বকাপত অংশগ্ৰহণ কৰে ৷ ছেমি ফাইনেললৈকে উন্নত প্ৰদৰ্শন দাঙি ধৰা দীপিকাই ফাইনেলত প্ৰতিপক্ষৰ হাতত পৰাস্ত হ’বলগীয়া হয় ৷
🚨 DEEPIKA KUMARI WON SILVER MEDAL 🤩
— The Khel India (@TheKhelIndia) October 20, 2024
- 6th Medal for Deepika At World Cup Final 🎖️
- Only Medalist from India at 2024 Edition
WELL DONE DEEPIKA KUMARI, SHE HAS ANSWERED LOT OF QUESTION RAISED ON HER 🇮🇳♥️ pic.twitter.com/JgeboZ4BtZ
চাৰিবাৰৰ অলিম্পিয়ানগৰাকীৰ হাতত পৰাস্ত হয় মেক্সিকোৰ দুবাৰকৈ ব্ৰঞ্জৰ পদক বিজয়ী আলেজান্দ্ৰা ভেলেন্সিয়া ৷ যিয়ে পেৰিছত মিশ্ৰিত দল আৰু মহিলা দলৰ শাখাত প’ডিয়ামত স্থান লাভ কৰিছিল ৷ ভেলেন্সিয়াক 6-4 ছেটত পৰাস্ত কৰি ভাৰতীয় ধনুৰ্বিদগৰাকীয়ে ফাইনেলত প্ৰৱেশ কৰে ৷
আনহাতে, কোৱাৰ্টাৰ ফাইনেলত দীপিকাৰ হাতত 0-6 ছেটত পৰাস্ত হয় চীনৰ ইয়াং জিয়াওলেই । কিন্তু দেওবাৰে অনুষ্ঠিত হোৱা আৰ্চাৰী বিশ্বকাপৰ ফাইনেলত প্ৰতিপক্ষৰ হাতত পৰাজয়বৰণ কৰে ভাৰতীয় ধনুৰ্বিদগৰাকীয়ে ৷
