স্পৰ্টছ ডেস্ক, 14 আগষ্ট : পেৰিছ অলিম্পিক 2024 ৰ চূড়ান্ত খেলৰ পূৰ্বে অযোগ্য ঘোষণা কৰা বিনেশ ফোগাট আন এক বৃহৎ আঘাতৰ সন্মুখীন হৈছে ৷ শেহতীয়া খবৰ অনুসৰি চি এ এছে (CAS) বিনেশ ফোগাটৰ অযোগ্যতা আৰু যুটীয়া পদকৰ আবেদন প্ৰত্যাখ্যান কৰিছে ৷ এই সিদ্ধান্তৰ পিছতে এতিয়া বিনেশ ফোগাটে ৰূপৰ পদক নাপাব আৰু খালী হাতেৰে ঘূৰি আহিব লাগিব ৷ এই খবৰ লাভ কৰি কেৱল বিনেশেই নহয়, পদকৰ আশা কৰি থকা প্ৰতিজন ভাৰতীয় হতাশ হৈছে ৷
পেৰিছ অলিম্পিক 2024ত 50 কিলোগ্ৰাম ফ্ৰীষ্টাইল মহিলা শাখাৰ ফাইনেলত প্ৰৱেশ কৰা বিনেশ ফোগাটক 100 গ্ৰাম ওজন বৃদ্ধিৰ বাবে অযোগ্য ঘোষণা কৰা হৈছিল ৷ বিনেশে তেতিয়া চি এ এছত এই সিদ্ধান্তৰ বিৰুদ্ধে আপীল কৰিছিল ৷ তেওঁৰ আবেদনৰ ওপৰত, ক্ৰীড়াৰ বাবে মধ্যস্থতা আদালতে শুনানী গ্ৰহণত সন্মত হৈছিল আৰু বিনেশ ফোগাটে তেওঁৰ যুক্তি আগবঢ়াইছিল ৷
বিনেশ ফোগাটৰ যুক্তি শুনাৰ পাছত, এতিয়া চি এ এছে তেওঁৰ অযোগ্যতাৰ সিদ্ধান্ত বাহাল ৰাখি যুটীয়া পদকৰ আবেদন নাকচ কৰিছে ৷ মধ্যস্থতা আদালতৰ এই সিদ্ধান্তৰ পিছত দেশখনে ইয়াৰ সপ্তমটো আৰু দ্বিতীয়টো ৰূপৰ পদকৰ আশা হেৰুৱাইছে ৷ অলিম্পিক শেষ হোৱাৰ পিছত বিনেশ পেৰিছত থাকে আৰু বাকী খেলুৱৈসকল ভাৰতলৈ ঘূৰি আহিছে ৷
উল্লেখ্য যে, ভাৰতৰ হৈ স্বৰ্ণ পদকৰ আশা উজ্জ্বল কৰি 50 কিলোগ্ৰাম ফ্ৰীষ্টাইল মহিলা শাখাৰ ফাইনেলত প্ৰৱেশ কৰা বিনেশ ফোগাটক অযোগ্য ঘোষণা কৰাৰ পিছত মল্লযোদ্ধাগৰাকীৰ লগতে হতাশ হৈ পৰিছিল প্ৰতিজন ভাৰতীয় ৷ সামাজিক মাধ্যমত বিনেশৰ সমৰ্থনত যুক্তি আগবঢ়াইছিল লগতে তেওঁক সমৰ্থন কৰিছিল ভাৰতীয় ৰাজনীতিক, শিল্পী, খেলুৱৈৰ লগতে বহুজনে ৷ অৱশ্যে ইয়াৰ পিছতে মল্লযুদ্ধৰ পৰা বিনেশে ৰাজহুৱাকৈ অৱসৰ ঘোষণা কৰিছিল ৷
লগতে পঢ়ক : ইংগুইনেল হাৰ্নিয়া কি ? যি ৰোগত ভুগিছে অলিম্পিকৰ পদক বিজয়ী নীৰজ চোপ্ৰা - Neeraj Chopra
