লখিমপুৰ, ৮ এপ্রিল : শাসক বিৰোধী উভয়ৰ বাবে সন্মানৰ প্ৰশ্নত পৰিণত হৈছে লখিমপুৰ লোকসভা সমষ্টি । সমষ্টি দখলৰ বাবে তয়াময়া যুঁজ ৰাজ্যৰ ১৪ টা লোকসভা সমষ্টিৰ অন্যতম ১২ নং লখিমপুৰ লোকসভা সমষ্টি । সম্প্রতি লখিমপুৰ লোকসভা সমষ্টিটো শাসক বিৰোধী উভয় দলৰ বাবে সন্মানৰ প্ৰশ্ন হৈ পৰিছে ।
স্বাধীনতাৰ পাচত সৰহভাগ সময় কংগ্রেছৰ দখলত থকা এই সমষ্টিটো অগপ দলেও দখল কৰিছিল । পিচে ২০১৪ চনৰ পৰা পট পৰিৱৰ্তন ঘটিল সমষ্টিটোৰ ৰাজনৈতিক আবহাৱা । কংগ্রেছৰ দখল ওফৰাই বিজেপিয়ে আধিপত্য বিস্তাৰ কৰে সমষ্টিটোত । এইবাৰ শাসকীয় বিজেপি দলে বিগত দুটাকৈ নিৰ্বাচনত প্ৰক্ষেপ কৰা প্ৰাৰ্থী প্ৰদান বৰুৱাক পুনৰাই প্ৰাৰ্থিত্ব দি সমষ্টিটো দখলৰ যুঁজত নামিছে ।
পূৰ্বৰ সাংসদ জনকে প্ৰাৰ্থিত্ব দিলে বিজয়ৰ পথ সুগম হ’ব বুলি বিজেপিয়ে নিশ্চিত হৈ নিৰ্বাচনী যুজত নামিছে । দুবাৰকৈ দখল কৰা সমষ্টিটোত এইবাৰ বিজেপিৰ খোপনি উফৰিব লাগিলে দলটোৰ সন্মানত আঘাত লগাই নহয় সামগ্ৰীকভাৱে ৰাজ্যখনতে দলটোৰ ভাবমূর্তি ম্লান হোৱাৰ আশংকা কৰি বিজেপিয়ে সৰ্বশক্তিৰে যুঁজত নামিছে ।
দলীয় প্রার্থীৰ হৈ সমষ্টিটোত ছজনকৈ দলীয় বিধায়কে সমষ্টিত সমূহত দলীয় প্রার্থীগৰাকীৰ হৈ নিৰ্বাচনী প্ৰচাৰ চলাইছে ।মুখ্যমন্ত্রী হিমন্ত বিশ্ব শৰ্মা, মন্ত্রী ৰণোজ পেগু, জয়ন্ত মল্ল বৰুৱা আদিয়ে নিৰ্বাচনী প্ৰচাৰ চলাইছে । গৃহমন্ত্ৰী অমিত শ্বাহেও চলাব নিৰ্বাচনী প্ৰচাৰ ।
মুখ্যমন্ত্রীয়ে পুনৰ একাধিক সমষ্টিত প্ৰচাৰ চলাব, পদযাত্রা কৰিব । দিল্লী দিছপুৰ উবুৰি খাই পৰিছে লখিমপুৰ লোকসভা সমষ্টিত । তেওঁলোকৰ এটাই লক্ষ্য । যিকোনো মূল্যৰ বিনিময়ত দলীয় প্রার্থীৰ বিজয় সাব্যস্ত কৰিব লাগে । শাসকীয় দলৰ এনে তৎপৰতাৰ বিপৰীতে প্ৰধান বিৰোধী দল কংগ্রেছো বহি থকা নাই । তেওঁলোকৰ বাবেও সন্মানৰ প্ৰশ্ন হৈ পৰিছে লখিমপুৰ লোকসভা সমষ্টিটো ।
বিশেষকৈ প্ৰদেশ কংগ্রেছৰ সভাপতি ভূপেন বৰাৰ বাবে এই সমষ্টিটো কেৱল সন্মানৰ বিষয় হৈ থকা নাই । তেওঁৰ বাবে প্ৰত্যাহ্বান হৈ পৰিছে এই সমষ্টিটো । কিয়নো দীর্ঘদিন কংগ্রেছৰ দখলত থকা সমষ্টিটো বিগত সময়ত বিজেপিয়ে কাঢ়ি ল’লে । এইবাৰ ৰাজ্যত তেওৰ নেতৃত্বত আছে কংগ্ৰেছ দলটো ।
আনহাতে লখিমপুৰ লোকসভা সমষ্টিটোৰ সদৰ সমষ্টি থকা লখিমপুৰ জিলাখন তেওঁৰ গৃহ জিলা । গৃহ জিলাত শাসকীয় দলে সফলতা লাভ কৰিলে তেওঁৰ সন্মানত আঘাত পৰাটো খাটাং । ইফালে এইবাৰ এই সমষ্টিত দলীয় প্রার্থী নিৰ্বাচনৰ ক্ষেত্ৰত ভূপেন বৰাই দলৰ ভিতৰতে এখন যুঁজ দিব লগীয়া হৈছিল ।
তেওঁৰ পচন্দ প্ৰাৰ্থী উদয় শংকৰ হাজৰিকাক প্ৰাৰ্থিত্ব দিবলৈ গৈ তেওঁ এখন যুজৰ সন্মুখীন হ’ব লগীয়া হৈছিল । ৰাণী নৰহে প্ৰাৰ্থিত্ব দাবী কৰি হাইকমাণ্ডৰ ওচৰত হেঁচা দিয়াৰ ফলত এক সংকট সৃষ্টি হৈছিল । যাৰ বাবে প্ৰাৰ্থীৰ নাম ঘোষণা কৰাত যথেষ্ট পলম হয় ।
অৱশেষত তেওঁৰ পচন্দৰ প্ৰাৰ্থীক দলীয় মনোনয়ন দিবলৈ সক্ষম হয় । তেওঁৰ পচন্দৰ প্ৰাৰ্থীক টিকট দিয়াবলৈ সক্ষম হ’লেও প্ৰাৰ্থীগৰাকীৰ বিজয় নিশ্চিত কৰাটো তেওঁৰ বাবে কেৱল সন্মানেই নহয় । দলত তেওঁৰ স্থিতি, হাইকমাণ্ডৰ ওচৰত তেওঁ যে এজন সুদক্ষ ৰাজনৈতিক ব্যক্তি সেই দিশসমূহ প্ৰতিপন্ন কৰাৰ এক অগ্নি পৰীক্ষাত অৱতীর্ণ হ’ব লগীয়া হৈছে ।
কেৱল এয়াই নহয় । টিকটৰ পৰা বঞ্চিত প্ৰাৰ্থিত্ব প্ৰত্যাশী ৰাণী নৰহৰ শিবিৰটোৰ অসন্তুষ্টি তেওঁ কেনেদৰে মোকাবিলা কৰি দলীয় প্রার্থীগৰাকীক বিজয়ৰ দিশে আগুৱাই নিব পাৰে সেয়া ভূপেন বৰাৰ বাবে এক প্ৰত্যাহ্বান স্বৰূপ হৈ পৰিছে ৷
