নিউজ ডেস্ক, 6 মে’: তৃতীয় তথা অন্তিম পৰ্যায়ৰ লোকসভা নিৰ্বাচনলৈ মাজত আছে মাথো কেইটামান ঘণ্টা ৷ ইতিমধ্যে বাক্সা নিৰ্বাচনী জিলাৰ অন্তৰ্গত ৪১ নং মানাহ আৰু ৪২ নং বাক্সা বিধানসভা সমষ্টিৰ ৪৭৬ টা ভোটকেন্দ্ৰৰ দায়িত্বত নিয়োজিত ৪৭৬ গৰাকী প্ৰিজাইডিং আৰু ১,৪২৮ গৰাকী প’লিং বিষয়াই ই ভি এম মেচিনকে ধৰি সকলো সামগ্ৰী সংগ্ৰহৰ কাৰণে উপস্থিত হৈছে জিলাৰ সদৰ মুছলপুৰত ৷
সোমবাৰে পুৱাতে দায়িত্বত নিয়োজিত বিষয়াসকলে আহি মুছলপুৰ উচ্চতৰ মাধ্যমিক বিদ্যালয় খেলপথাৰত উপস্থিত হয় ৷ উল্লেখ্য যে, দুয়োটা বিধানসভা সমষ্টিৰ ৩,৯৪,৮৫৪ গৰাকী ভোটাৰৰ ভোটগ্ৰহণৰ কাৰণে সাজু হৈছে সকলো প্ৰিজাইডিং আৰু প’লিং বিষয়া ৷
চিৰাং:
মঙলবাৰে অনুষ্ঠিত হ'বলগীয়া তৃতীয় পৰ্যায়ৰ লোকসভা নিৰ্বাচনক কেন্দ্ৰ কৰি সাজু হৈ উঠিছে ১৯ নম্বৰ চিদলী-চিৰাং বিধানসভা সমষ্টি ৷ এই সমষ্টি দুটাৰ দায়িত্বত নিয়োজিত প্ৰিজাইডিং আৰু প’লিং বিষয়াসকলে ই ভি এম-লৈ ভোটগ্ৰহণ কেন্দ্ৰলৈ যোৱাৰ বাবে সাজু হোৱা দেখা যায় ৷
কোকৰাঝাৰ লোকসভা সমষ্টিৰ অধীনৰ এই বিধানসভা সমষ্টি দুটাৰ মুঠ ভোটগ্ৰহণ কেন্দ্ৰ হৈছে ২৬৯ টা ৷ ইয়াৰে মহিলা বিষয়াৰ দ্বাৰা পৰিচালিত ভোটগ্ৰহণ কেন্দ্ৰৰ সংখ্যা ২০ টা আৰু আদৰ্শ ভোটকেন্দ্ৰৰ সংখ্যা হৈছে দুটা ৷
উল্লেখ্য যে, চিদলী-চিৰাং বিধানসভা সমষ্টিত মুঠ ১,১৮৪ গৰাকী বিষয়া-কৰ্মচাৰীক ভোটকেন্দ্ৰৰ দায়িত্বত নিয়োজিত কৰা হৈছে ৷ জিলা নিৰ্বাচনী বিষয়া পি বিজয় ভাস্কৰ ৰেড্ডীয়ে সংবাদ মাধ্যমৰ আগত প্ৰকাশ কৰা মতে, সমষ্টিটোৰ স্পৰ্শকাতৰ ভোটগ্ৰহণ কেন্দ্ৰসমূহত মাইক্ৰ’ অৱজাৰভাৰৰ ব্যৱস্থা গ্ৰহণ কৰা হৈছে ৷
নলবাৰী:
নলবাৰীতো ৭৫৬ টা ভোটকেন্দ্ৰলৈ ৰাওনা হৈছে প’লিং আৰু প্ৰিজাইডিং বিষয়াসকল ৷ জিলাখনৰ বৰক্ষেত্ৰী, নলবাৰী আৰু টিহু- তিনিটা বিধানসভা সমষ্টিৰ বিভিন্ন ভোটকেন্দ্ৰলৈ ৰাওনা হৈছে নিৰ্বাচনী বিষয়াসকল ৷ সোমবাৰে পুৱাৰে পৰা বিষয়াসকলে নিজ নিজ নিৰ্বাচনী সামগ্ৰী লৈ ভোটকেন্দ্ৰলৈ ৰাওনা হোৱা দেখা যায় ৷ বিপৰীতে দেওবাৰে বৰক্ষেত্ৰী অঞ্চলৰ চৰকে ধৰি ৫১ টা দুৰ্গম ভোটকেন্দ্ৰলৈ যাত্ৰা কৰে বিষয়াসকলে ৷ জিলাখনৰ মুঠ ৮০৭ টা ভোটকেন্দ্ৰৰ বিপৰীতে ভোটাৰ আছে 6,20,901 গৰাকী ৷ জিলাখনত মহিলা বিষয়া-কৰ্মচাৰীৰ দ্বাৰা পৰিচালিত হ’ব ৩৫ টা ভোটকেন্দ্ৰ ।
গোৱালপাৰা:
গোৱালপাৰা জিলাৰ চাৰিটা বিধানসভা সমষ্টিত অনুষ্ঠিত হ’ব তৃতীয় পৰ্যায়ৰ ভোটগ্ৰহণ প্ৰক্ৰিয়া ৷ জিলাখনৰ মুঠ ৯১০ টা কেন্দ্ৰত অনুষ্ঠিত হ’ব এই ভোটগ্ৰহণ ৷ ইতিমধ্যে সোমবাৰে পুৱাৰে পৰা প’লিং-প্ৰিজাইডিং বিষয়াসকলে কঠোৰ নিৰাপত্তাৰ মাজেৰে ইভিএম লৈ ৰাওনা হৈছে ভোটগ্ৰহণ কেন্দ্ৰসমূহলৈ ৷
উল্লেখযোগ্য যে, জিলাখনৰ ২ নং ধুবুৰী লোকসভা সমষ্টিত দুটা আৰু ৫ নং গুৱাহাটী লোকসভা সমষ্টিত দুটা বিধানসভা সমষ্টি অন্তৰ্গত হৈ আছে ৷ ভোটগ্ৰহণকাৰী দলসমুহে ই ভি এম সংগ্ৰহ কৰাৰ ক্ষেত্ৰত যাতে অলপো অসুবিধা অনুভৱ নকৰে, তাৰ বাবে প্ৰতিটো বিধানসভা সমষ্টিৰ বাবে সাজি উলিওৱা কাউন্টাৰসমূহত বেলেগ বেলেগ ৰঙৰ কাপোৰেৰে চকুত লগাকৈ সজোৱা হৈছে ৷
সেই অনুসৰি, ২ নং ধুবুৰী লোকসভা সমষ্টিৰ জলেশ্বৰ বিধানসভা সমষ্টিৰ বাবে ৰঙা ৰং আৰু ১৪ নং পূৱ গোৱালপাৰা সমষ্টিৰ বাবে বগা ৰঙৰ কাউণ্টাৰ দিয়া হৈছে ৷ সেইদৰে ৫ নং গুৱাহাটী লোকসভা সমষ্টিৰ ১৩ নং পশ্চিম গোৱালপাৰা (জনজাতি) সমষ্টিৰ বাবে নীলা ৰং আৰু ১৫ নং দুধনৈ (জনজাতি) বিধানসভা সমষ্টিৰ বাবে হালধীয়া ৰং দিয়া হৈছে ৷ লগতে, ষ্ট্ৰংৰুমৰ পৰা ই ভি এম উলিয়াই কাউন্টাৰলৈ অনা কৰ্মচাৰীসকলৰো বিধানসভা সমষ্টি অনুসৰি একে ৰঙৰ টি-চাৰ্টৰ ব্যৱস্থা কৰা হৈছে ৷
লগতে ২ নং ধুবুৰী আৰু ৫নং গুৱাহাটী লোকসভা সমষ্টিৰ বাবে ই ভি এম সংগ্ৰহ কৰাৰ বাবে জিলা আয়ুক্তৰ কাৰ্যালয়ত দুখনকৈ সুকীয়া প্ৰৱেশদ্বাৰৰ ব্যৱস্থা কৰিছে জিলা প্ৰশাসনে ৷ জিলাখনত মঙলবাৰে অনুষ্ঠিত হ’বলগীয়া নিৰ্বাচনত ৪০ টা ভোটগ্ৰহণ কেন্দ্ৰ পৰিচালনা কৰিব মহিলাই ৷ তদুপৰি মুঠ ২৮ টা ভোটগ্ৰহণ কেন্দ্ৰ চৰ অঞ্চলত থকা বাবে তালৈ যাবলৈ নাও আৰু ঘোঁৰা গাড়ীৰ ব্যৱস্থা কৰিছে জিলা প্ৰশাসনে ৷
কোকৰাঝাৰ:
৭ মে’ত অনুষ্ঠিত হ'ব তৃতীয় পৰ্যায়ৰ লোকসভা নিৰ্বাচনৰ ভোটগ্ৰহণ পৰ্ব । এই উপলক্ষে ১ নং কোকৰাঝাৰ (জনজাতি) লোকসভা সমষ্টিৰ ভোটগ্ৰহণ কেন্দ্ৰসমূহলৈ ই ভি এম, ভিভিপেট আদিকে ধৰি যা-যাৱতীয় সা-সামগ্ৰীলৈ প্ৰিজাইডিং বিষয়া, প’লিং বিষয়া, নিৰাপত্তাৰক্ষীকে ধৰি আন বিষয়াসকল নিজ নিজ কেন্দ্ৰলৈ ৰাওনা হৈছে ।
উল্লেখ্য যে, সোমবাৰে প্ৰিজাইডিং আৰু প’লিং বিষয়াসকল কোকৰাঝাৰ চহৰস্থিত বুনিয়াদী প্ৰশিক্ষণ কেন্দ্ৰত হাজিৰ হয় আৰু তাৰ পৰা ই ভি এম, ভিভিপেট আদিকে ধৰি যা-যাৱতীয় সা-সামগ্ৰী চমজি লৈ নিৰাপত্তাৰক্ষীসহ নিজ নিজ পলিং ষ্টেচনলৈ ৰাওনা হয় ।
কোকৰাঝাৰ লোকসভা সমষ্টিৰ ৰিটাৰ্ণিং বিষয়া প্ৰদীপ কুমাৰ দ্বিবেদীয়ে কয় যে, তৃতীয় পৰ্যায়ৰ নিৰ্বাচনৰ বাবে প্ৰশাসন সম্পূৰ্ণৰূপে সাজু হৈছে আৰু ইতিমধ্যে নিৰ্বাচনী বিষয়াসকল প’লিং ষ্টেচনলৈ ৰাওনা হৈছে । যি অঞ্চলত নেটৱৰ্ক নাপায়, তেনে ঠাইত ছেটেলাইট ফোনৰ ব্যৱস্থা কৰা হৈছে ।
নিৰ্বাচন আয়োগৰ নিৰ্দেশনা মৰ্মে নিৰ্বাচনী কাম-কাজসমূহ পৰিচালিত হৈ আহিছে আৰু কোকৰাঝাৰ লোকসভা সমষ্টিৰ নিৰ্বাচনত প্ৰায় ৮০০০ গৰাকী চেক্টৰ বিষয়া, জ’নেল বিষয়া, প্ৰিজাইডিং বিষয়া, প’লিং বিষয়া জড়িত হৈ আছে ।
নিৰ্বাচনৰ সৈতে জড়িত বিষয়া-কৰ্মচাৰীক কঢ়িয়াই নিয়া প্ৰতিখন গাড়ীত জিপিএছ লগোৱা হৈছে বুলি সদৰি কৰি নিৰ্বাচন সুকলমে অনুষ্ঠিত হ'ব বুলি আশা প্ৰকাশ কৰিছে ৰিটাৰ্ণিং বিষয়া প্ৰদীপ কুমাৰ দ্বিবেদীয়ে ।
প্ৰণিধানযোগ্য যে, কোকৰাঝাৰ লোকসভা সমষ্টিত মুঠ ন টা বিধানসভা সমষ্টি আছে । কোকৰাঝাৰ লোকসভা সমষ্টিত এইবাৰ ১৪,৯৪,৪০৪ গৰাকী ভোটাৰে নিৰ্ণয় কৰিব ১২ গৰাকী প্ৰাৰ্থীৰ ভাগ্য ৷ সমষ্টিটোত পুৰুষ ভোটৰ ৭,৪১,৩২৮ গৰাকী আৰু মহিলা ভোটাৰৰ সংখ্যা ৭,৪৩,২৩৬ গৰাকী ৷ সমষ্টিটোত মুঠ ভোটকেন্দ্ৰ আছে ১,৮৬২ টা ৷ প্ৰায় ৭ হাজাৰ আৰক্ষী-নিৰাপত্তাৰক্ষী নিৰ্বাচনৰ দায়িত্বত জড়িত হৈ আছে ।
বৰপেটা:
তৃতীয় পৰ্যায়ৰ নিৰ্বাচনৰ বাবে বৰপেটাৰ মাধৱ চৌধুৰী মহাবিদ্যালয়ত স্থাপন কৰা কেন্দ্ৰৰ পৰা ভোটগ্ৰহণকাৰী দলসমূহ নিজ নিজ ভোটকেন্দ্ৰলৈ সোমবাৰে ৰাওনা হয় । ইয়াৰ পূৰ্বে দেওবাৰে ব্ৰহ্মপুত্ৰৰ চৰ অঞ্চলত স্থাপন কৰা ১১২ টা কেন্দ্ৰলৈ ৰাওনা হোৱা দলবোৰ ইতিমধ্যে গন্তব্যস্থানত উপস্থিত হোৱা বুলি সদৰি কৰে বৰপেটাৰ ৰিটাৰ্ণিং বিষয়া তথা জিলা আয়ুক্ত আয়ুষ গাৰ্গে ।
উল্লেখযোগ্য যে, বৰপেটা নিৰ্বাচনী জিলাত মুঠ ১,০৩৪ টকা ভোটকেন্দ্ৰ আছে । জিলা আয়ুক্ত গাৰ্গে জনায় যে, সোমবাৰে সন্ধিয়াৰ ভিতৰত সকলো ভোটগ্ৰহণকাৰী দল নিজৰ নিজৰ স্থানবোৰত উপস্থিত হ'ব । নিৰ্বাচন বিভাগৰ তথ্য অনুসৰি, বৰপেটা নিৰ্বাচনী জিলাত ৯ ,৩২,৬২৯ গৰাকী ভোটাৰ আছে । ইপিনে ভোটকেন্দ্ৰবোৰৰ ভিতৰত দহটা সম্পূৰ্ণৰূপে মহিলাৰ দ্বাৰা পৰিচালিত হ'ব । বিশেষভাৱে সক্ষম লোকৰ দ্বাৰা পৰিচালিত হ'বলগীয়া ভোটকেন্দ্ৰৰ সংখ্যা হ'ল চাৰিটা ।
লগতে পঢ়ক: বঙাইগাঁৱত ইভিএমলৈ গন্তব্য় স্থানলৈ ৰাওনা প’লিং-প্ৰিজাইডিং বিষয়াসকল - Lok Sabha Election 2024
